I Krọnikol 23 - Edo Bible (E Baibol Ẹdo) Version 1996

¹ Ugbẹn vbe Devid ghi wa kakabọ khian ọmaẹn nẹ, ọ keghi ma e Solomọn ne ovbi ẹre ọba Izrẹl.

Iwinna Avbe Livai

² E Devid keghi si avbe ekaolotu ivbi Izrẹl hia kevbe avbe ohẹn kevbe avbe Livai koko.

³ Ọ keghi ka ivbi e Livai ni re ikpia vbọ ni sẹ ukpo ọgban nẹ, kevbe ni gberra ọnii, ehia kegha re arriaisẹn eva irrọvbiyeva (38,000).

⁴ Ọba na viọ iran arriaisẹn enẹ yan ugie (24,000) vbọ ne iran gha winna iwinna khaemwisẹ vbe uwu Ọgua Osa, ọ keghi viọ iran arriaisẹn ehan (6,000) vbọ ne iran gha sin emwi ẹro kevbe ne iran gha bu ohiẹn.

⁵ Ọ keghi viọ arriaisẹn enẹ (4,000) yọ ne iran gha ba odẹ, iran arriaisẹn enẹ (4,000) ne iran gha rho e Nọyaẹnmwa, vbene iran gha na gha lo avbe emwi emaba kevbe ẹzi kẹn ne ọba viọ ye otọ ne a ya gha ru ọna.

⁶ E Devid keghi ghae avbe Livai ye otu eha zẹ vbene edọmwadẹ ọghọe khare, ena kegha re Gẹsiọn, e Kohat kevbe Merari.

⁷ E Gẹsiọn kegha mwẹ emọ ikpia eva, e Ladan kevbe Simẹi.

⁸ E Ladan kegha mwẹ emọ ikpia eha, ena ọ re Jẹhiẹl, e Zetam kevbe Joẹl.

⁹ Iran na ọ re ọ gha re ọkaẹgbẹe ivbi uniẹn Ladan. (E Simẹi kegha mwẹ emọ ikpia eha, ena ọ re Sielomot, Haziẹl kevbe Haran.)

^10-11 E Simẹi kegha mwẹ emọ ikpia enẹ, ena ọ re Jahat, e Zina, e Jeus kevbe Beraia zẹ vbe ne iran ya biẹlẹ iran lele egbe. E Jeus kevbe Beraia ma biẹlẹ emọ ni bun, rhunmwuda ọnii, a na ku iran gbe ka ọre uniẹn ọkpa.

¹² E Kohat kegha mwẹ emọ ikpia enẹ, ena ọ re Amram, Izia, e Hibrọn kevbe Uziẹl.

¹³ Ovbi ẹre ne ọdiọn ighẹ Amram ọrọre erha Errọn kevbe Mosis. (A keghi viọ Errọn kevbe uniẹn ọnrẹn ye obọkpa ne iran gha gbearoghe avbe emwi ni huanrẹn ẹdẹdẹmwẹdẹ, ne iran gha giẹn eturari, vbe ugamwẹ e Nọyaẹnmwa, ne iran gha ga ẹe, kevbe ne iran vbe gha ya eni e Nọyaẹnmwa fiangbe emwa ni.

¹⁴ Sokpan a keghi ka ivbi e Mosis ne ọmwa Osanobua ba avbe Livai.)

¹⁵ E Mosis kegha mwẹ emọ ikpia eva, ena ọ re Gẹsiọn kevbe Eliezẹ.

¹⁶ Ọkaolotu vbe avbe ivbi Gẹsiọn kegha re Siebuẹl.

¹⁷ Ọmọ okpia ọkpa kẹkan ọ re Eliezẹ gha mwẹ, ọnii ọ re Rehabaia, sokpan Rehabaia wa biẹlẹ emọ ni bun.

¹⁸ Izia ne ovbi e Kohat ne ukpogieva keghi biẹ ọmọ okpia ọkpa ne a tie ẹre Sielomit, rẹn ọ re ọ gha re ọkaẹgbẹe uniẹn ni.

¹⁹ Ẹ Hibrọn ne ovbi e Kohat ne ukpogieha keghi biẹlẹ emọ ikpia enẹ, ena ọ re Jeraia, Amaraia, e Jehaziẹl kevbe Jekamim.

²⁰ Uziẹl ne ovbi e Kohat ne ukpogienẹ keghi biẹlẹ emọ ikpia eva, ena ọ re Mika kevbe Isiaia.

²¹ Merari kegha mwẹ emọ ikpia eva, ena ọ re Mali kevbe Musi. E Mali kevbe gha mwẹ emọ ikpia eva, ena ọ re Eliaza kevbe Kis.

²² Sokpan Eliaza keghi wu vbe ne ẹ i na mwẹ emọ ikpia gberra emọ ikhuo. Ivbi ẹre ni ikhuo keghi rọnmwẹ ivbi ovbi erha iran ighẹ Kis.

²³ E Musi ne ovbi e Merari ne okpia ne ọdiọn kegha mwẹ emọ ikpia eha, ena ọ re Mali, Ede kevbe Jeremọt.

²⁴ Ena ọrọre ivbi uniẹn ọghe Livai vbe uniẹn kevbe ẹgbẹe. Te dọmwadẹ ọghọe vbe uwu iran wa gbẹnnẹ eni ye otọ. Ọkpọkpa vbe uwu ivbi uniẹn ọnrẹn nii, ni rre ọmọ ukpo ugie ra ne ọ sẹẹ ọnii, kegha mwẹ ne a ghae sẹ ọre egbe vbe Ọgua Osa e Nọyaẹnmwa.

²⁵ E Devid keghi kha wẹẹ, “E Nọyaẹnmwa ne Osanobua Izrẹl rhie ọfumwegbe ne emwa rẹn nẹ, rẹn tobọ ẹre gha vbe gha rre Jerusalẹm rhinrin ẹdẹ.

²⁶ Rhunmwuda ọnii nian, a i ghi vbe wẹ ne avbe livai gha dada Ẹkpẹti Ile ne a ya rẹn ighẹ Nọyaẹnmwa rre evba, kevbe avbe emwi hia ne a lo vbe ugamwẹ.”

²⁷ Zẹ vbene Devid wẹ ne iran ru ẹe, a kegha gbẹnnẹ eni ivbi e Livai ne ọ sẹ ukpo ugie nẹ ye ebe emwa ni winna.

²⁸ A ghi vbe ghae iran lele isi iwinna na hia; ne iran gha yi avbe ohẹn ni re ivbi uniẹn Errọn obọ vbe ugamwẹ Ọgua Osa, ne iran gha kpolo ore ni lẹga ẹre kevbe avbe ughugha ni rrọọ, ne iran vbe miẹn wẹ a ma mu awua ye avbe emwi ni huanrẹn rhọkpa.

²⁹ Ne iran gha gbearoghe ebrẹd ne a ya fi ohan ne Osanobua, avbe irhuarhua ne a ya ru izọese, avbe ebrẹd ne fẹrhẹfẹrhẹ ne a ma rhie eyist yi a ke le ẹe, avbe emwi izọese ne a ranmwẹ ne ọ kae kevbe irhuarhua ne a ye ẹvbi oliv gbe, ne iran gha mwa kevbe ne iran vbe gha ka emwi izẹọhẹ ọghe Ọgua Osa.

³⁰ Ne iran gha rho kevbe ne iran vbe gha rhie uyi ne Nọyaẹnmwa ota vbe owiẹ.

³¹ Ke ẹghẹ hia ne a ya giẹn ese ne a zọ ghe Nọyaẹnmwa vbe Ẹdẹ Ikẹtin, Emwiukpo Uki Ọgbọn, kevbe avbe emwiukpo ọvbehe hia. A keghi mwamwa ilele ne a ya gha rẹn zẹẹ, inu e Livai ne a zẹe wẹ ne ọ winna iwinna na vbe ẹghẹ ke ẹghẹ. A keghi wa zẹ avbe Livai wẹ iwinna iran ọrọre ne iran gha ga e Nọyaẹnmwa rhinrin ẹdẹ.

³² A keghi vbe fian ẹre okhuo ne iran, ne iran gha gbe aro ghe Owa Ukpọn ne a ya rẹn ighẹ e Nọyaẹnmwa rre evba kevbe Ọgua Osa, kevbe ne iran vbe gha yi etẹn iran obọ ighẹ avbe ohẹn ni re ivbi uniẹn Errọn, vbe ẹghẹ ugamwẹ vbe Ọgua Osa.