I Krọnikol 21 - Edo Bible (E Baibol Ẹdo) Version 1996

E Devid Ka Ẹvbo

¹ Esu keghi ho ne ọ si ẹti ye ivbi Izrẹl urhu, ọ na rhunmwuda ọnii ya Devid kha wẹ rẹn ra ka ẹvbo.

² E Devid keghi tama e Joab kevbe avbe ọkaokuo nekpa wẹẹ, “Wa la otọe Izrẹl sẹ ehe ne ọ sẹe ehe ne ọ rhanmwẹ ne uwa ka emwa ni rrọọ. I ho ne I rẹn inu emwa ni rrọọ.”

³ E Joab keghi khuẹnniẹn wẹẹ, “Osanobua ne ọ gie ivbi Izrẹl bun sẹ vbene iran ye na ukhukhu iyisẹn, eguọmwadia ruẹ iran hia khin, Umogun! Vbọzẹ ne u gha na ru emwi na ne u ya emwa hia khian emwa ni ru orukhọ!”

⁴ Sokpan, ọba na rhie gba yọ wẹ ne Joab ru ẹe vbene irẹn khare. E Joab keghi ladian, ọ na la otọ Izrẹl hia khinkhian, ọ na dọlegbe gha die Jerusalẹm.

⁵ Ọ keghi na iyẹn ma Devid ne ọba vbene emwa ni gha sẹtin yo okuo bun sẹhẹ: Iran ni rre Izrẹl kegha re arriaisẹn iyisẹn yan ẹbo ọkpa (1,100,000). Iran ni rre Juda kegha re arriaisẹn ekigbesiyenẹ yan arriaeva (470,000).

⁶ Rhunmwuda ighẹ e Joab ma yobọ ye emwi ne ọba ru na, ọ ma ka emwa Livai kevbe Bẹnjamin.

⁷ Emwi ne a ru keghi sọnnọ Osanobua, ọ na rhunmwuda ọnii rri ivbi Izrẹl oya.

⁸ E Devid keghi tama Osanobua wẹẹ, “Orukhọ dan ọ re I wa ru ne I na ru emwi na. Lahọ, yabọ mwẹ, emwi ukọnmwẹ ọ re I wa ruẹ.”

⁹ Ẹre Nọyaẹnmwa na khama e Gad ne akhasẹ e Devid wẹẹ,

¹⁰ “Ya tama e Devid wẹ I ra viọ emwi eha ne ẹẹn ne ọ zẹ vbọ ne ọ ghi zẹ vbọ ọre I ra ru.”

¹¹ E Gad keghi bu e Devid gha khian ọ tama rẹn vbene Nọyaẹnmwa kha hẹ, ọ keghi nọ rẹn wẹẹ, “De ne u zẹẹ vbọ?

¹² Ne ukhunmwu fi la ikpiia ra ne u ya uki eha lẹ ne ivbiyokuo eghian ni khuẹ khian ra ikpẹdẹ eha vbe wu ne Nọyaẹnmwa gha na ya umozo ẹre yan ruẹn, ọ ghi fi egboghogbogho fi ẹvbo ruẹ, ọ ghi gie odibo ẹre ne ọ rhie uwu gha die otọ Izrẹl hia? De ewanniẹn ne I gha rhie ne Nọyaẹnmwa?”

¹³ E Devid keghi wanniẹn tama e Gad wẹẹ, “Ẹrinmwi ọ re I ghe na sokpan, I ma ho ne emwa ne agbọn rria mwẹ ikhi. Gie Nọyaẹnmwa tobọ ẹre rria mwẹ ikhi rhunmwuda, rẹn mwẹ ekhọe agiẹngiẹn.”

¹⁴ Rhunmwuda ọnii, e Nọyaẹnmwa keghi gie egboghogbogho gie ivbi Izrẹl, arhin arriaisẹn ekigbesiyenẹ (70,000) keghi wulo vbe uwu iran. Iyeke ọnii,

¹⁵ ọ keghi gie odibo Osa ne ọ ya dunmwu e Jerusalẹm sotọ sokpan, ọ keghi fi ekhọe werriẹ, ọ tama odibo Osa ni wẹẹ, “Dobọyi! Ọnii sẹe!” Ẹghẹ nii otọ iguọghọka ọghe Arauna ne ọmwa Jebus ọ re ọ gha ye.

¹⁶ E Devid keghi bẹghe vbe odibo Osa na mudia ye ideghedeghe keẹe kevbe umozo vbe obọ, ọ mu egbe ne ọ dunmwu e Jerusalẹm sẹ otọ. Ẹre Devid kevbe avbe olotu emwa nii ne a miẹn wẹ ukpọn akhiẹ ọ re iran hia viọ rhuan, iran hia keghi vbokho uhunmwu rriotọ, vbene ugbaro iran na dekan otọ.

¹⁷ E Devid keghi na erhunmwu wẹẹ, “E U, Osanobua, mẹ ọ re ọ ru orukhọ, mẹ ọ re ọ wẹ ne a ka ẹvbo, vbe ivbi ẹrrẹe na ru? E Nọyaẹnmwa Osanobua mwẹ, rria imẹ kevbe ẹgbẹe mwẹ ikhi ne u sẹ emwa ruẹn rae.”

¹⁸ Odibo Osa e Nọyaẹnmwa keghi tama Gad wẹ ne ọ tama e Devid ne ọ ya gbe aka ne Nọyaẹnmwa vbe otọe iguọghọka ọghe Arauna.

¹⁹ E Devid keghi họn ẹmwẹ ne Nọyaẹnmwa tae, ọ kegha khian zẹẹ vbene Gad tama rẹn.

²⁰ Iran ghi sẹ evba iran do vba Arauna kevbe ivbi ẹre ne ikpia enẹ vbe iran khuọn ọka, avbe ivbi ẹre ghi bẹghe odibo Osa, iran keghi lẹ kua ya lẹre.

²¹ Ọwarọkpa vbe Arauna ghi wa bẹghe vbe Devid ne Ọba dee, ọ keghi kpa vbe ehe ne ọ na khuọn ọka, ọ keghi vbokho egbe ẹre rre sẹ otọ vbene ugbaro ẹre na dekan otọ.

²² E Devid keghi tama rẹn wẹẹ, “Khiẹn otọ ọguọghọ ọka ruẹ mẹ ne I gba aka yọ ne Nọyaẹnmwa ne ọ miẹn ehe na dobọ egboghogbogho na yi, I gha ha osa ẹre nuẹn fẹẹrẹ.”

²³ Arauna keghi kha wẹẹ, “Mu, Umogun ne u ya ẹe ru emwi ne ọ rhirhi khọn ruẹn. Ghe ẹkhuia ẹmila ehan vbe emwana ne u giẹn iran vbe nene aka. Vbe ghe ekpatako ne a ya wiẹn ọka ne u ya hie erhẹn yọ, kevbe ọka zẹ vbe emwi izẹọhẹ, I viọ ehia ne uẹn.”

²⁴ Sokpan ọba wanniẹn wẹẹ, “Ẹn o, I gha ha osa ehia ne uẹn. Mẹ i ra ya emwi ne ọ re ọwuẹ ra emwi ne I ma ha osa rhọkpa yi zọ ese ghe Nọyaẹnmwa.”

²⁵ Ọ keghi hae Arauna a giẹghẹ igoru arriaeha (600) ye otọ iguọghọka nii.

²⁶ Ọ keghi gba aka ne Nọyaẹnmwa vbe evba ọ na zọ ese ne a giẹn uan kevbe isara ghe Nọyaẹnmwa vbe evba. Ọ keghi na erhunmwu e Nọyaẹnmwa na rhie ewanniẹn ne ẹẹn vbene ọ na gie erhẹn ke ẹrinmwi rre do giẹn izọ ese ne ọ rre aka nii.

²⁷ E Nọyaẹnmwa keghi tama odibo Osa nii ne ọ rhie umozo ye otọ, odibo Osa nii keghi ru vberriọ.

²⁸ E Devid ke ya ọna rẹn wẹ Nọyaẹnmwa họn erhunmwu irẹn, ọ keghi rhunmwuda ọnii zọ ese vbe aka ne ọ rre otọ iguọghọka ọghe Arauna.

²⁹ Ẹghẹ ne a kha na, Owa Ukpọn ne a ya rẹn wẹ e Nọyaẹnmwa rre evba ne Mosis ru vbe otọe ẹgbo, kevbe aka ne a na giẹn ese, owa ugamwẹ ne a na ga vbe Gibiọn, ọ re iran he ye ye.

³⁰ Sokpan, e Devid ma sẹtin yo odọ ya ga e Nọyaẹnmwa rhunmwuda, ohan umozo ọghe Odibosa e Nọyaẹnmwa kegha mu ẹẹn.