I Krọnikol 2 - Edo Bible (E Baibol Ẹdo) Version 1996

Ivbi Uniẹn E Juda

¹ E Jekọb kegha mwẹ emọ iweva: e Riubẹn, e Simiọn, e Livai, e Juda, Isaka, e Zebulọn,

² Dan, e Josẹf, e Bẹnjamin, e Naftali, e Gad kevbe Asia.

³ E Juda kegha mwẹ emọ Isẹn, amwẹ ọnrẹn ighẹ Batsua ne ovbi e Kenan, keghi biẹlẹ emọ eha ne ẹẹn, ena ọre Ẹr, Onan kevbe Siẹla. Ẹr ne ovbi ẹre ne okpia ne ọdiọn keghi rhia sẹrriọ wẹ e Nọyaẹnmwa na gbe ẹe rua.

⁴ Ovbi amwẹ ọnrẹn ne a tie ẹre Tama keghi biẹlẹ emọ ikpia eva ne Juda, ena kegha re Pẹrẹs kevbe Zẹra.

⁵ E Pẹrẹs kevbe gha mwẹ emọ ikpia eva, ena ọre Hẹzrọn kevbe Hamul.

⁶ E Zẹra ne ọtiọnrẹn kegha mwẹ emọ ikpia ehan, ena ọre Zimri, Etan, Heman, Kalkọl kevbe Dada.

⁷ Ekani ne ovbi e Kami, ne ọkpa vbe uwu ivbi uniẹn Zẹra, keghi si ọkhọ dan ye ivbi Izrẹl uhunmwu vbe ekpa ne ọ na rhie vbe emwi ne a viọ rre vbe okuo, na a wẹ ne a ya ẹe fi ohan ne Osanobua.

⁸ Ọmokpia ọkpa ọre Etan biẹe, ọnii kegha re Azaraia.

Uniẹn Ọrọgbọ Ọghe Devid Ne Ọba

⁹ E Hẹzrọn kegha mwẹ emọ ikpia eha ena ọre Jeramil, e Ram kevbe Kelẹb.

¹⁰ Uviẹn ọghe uniẹn ni kevbe ẹgbẹe, Ram ya sẹ Jese, ọ re ọ na khin: E Ram, Aminadab, Nasiọn (ọmwa kpataki vbe ẹwae Juda.)

¹¹ E Salmọn, e Boaz.

¹² Obẹd kevbe Jese.

¹³ E Jese kegha mwẹ emọ ikpia ihinrọn. Vbene a ya biẹlẹ iran lele egbe ọre ọna khin: Eliab, Abinadab, Siama.

¹⁴ Netanẹl, Radai.

¹⁵ Ozẹm kevbe Devid.

¹⁶ Ọ kevbe gha mwẹ emọ ikhuo eva, e Zeruaia kevbe Abigẹl. E Zuraia ne ovbi e Jese ne okhuo kegha mwẹ emọ ikpia eha, ena kegha re Abisiai, e Joab kevbe Asahẹl.

¹⁷ Abigẹl keghi biẹ ọmọ okpia ọkpa ne a tie ẹre Amasa.

Ivbi Uniẹn E Hẹzrọn

¹⁸ E Kelẹb ne ovbi e Hẹzrọn ne okpia keghi rhie Azuba rọnmwẹ, ọ keghi biẹ ọmọ okpia ọkpa ne a tie ẹre Jeriọt. Okhuo nii keghi biẹlẹ emọ ikpia eha, ena ọre: Jesia, Siobab kevbe Adọn.

¹⁹ Ugbẹn vbe Azuba ghi wu nẹ, e Kelẹb keghi rhie okhuo ne a tie ẹre Efrat. Irẹn keghi biẹ ọmọ okpia ọkpa ne iran he ẹre Họ.

²⁰ Ovbi e Họ ne okpia kegha re Uri, eyẹ ọre kegha re Bazalẹl.

²¹ E Hẹzrọn ghi rre ọmọ ukpo iyeha, ọ keghi rhie ovbi e Makia ne okhuo ne ọtẹn e Giliad. Iran keghi biẹ ọmọ okpia ọkpa ne iran he ẹre Segub.

²² E Segub kegha mwẹ ọmọ okpia ọkpa ne iran tie ẹre Jea. e Jea na kegha khaemwisẹ yan ẹvbo eha yan ugie vbe iwewe Giliad.

²³ Sokpan, otọe arriọba e Gẹsiọ kevbe Aram keghi khọn munọ ẹvbo iyeha vbe uwu ne iran ye ighẹ igue ne a tie ẹre Jea kevbe Kenat kevbe avbe ẹvbo ni sikẹ ọre. Ivbi uniẹn e Makia ne erha e Giliad ọre emwa ni rre evba hia khin.

²⁴ Ugbẹn vbe Hẹzrọn ghi wu nẹ, e Kelẹb ne ovbi ẹre ne okpia na rhie Efrat ne erha ẹe wu sẹrae rọnmwẹ. Iran na biẹ ọmọ okpia ọkpa ne a tie ẹre Asiọ ọmwa ne ọ hu ẹvbo ne a tie ẹre Tẹkoa.

Ivbi Uniẹn E Jeramil

²⁵ E Jeramil ne ovbi e Hẹzrọn ne ọdiọn kegha mwẹ emọ ikpia isẹn, iran ọrọre: Ram ne ọ re ọdiọn, Buna, Orẹn, Ozẹm kevbe Ahija.

^26-27 E Ram kegha mwẹ emọ ikpia eha, Maaz, Jamin kevbe Ẹke. E Jeramil vbe gha mwẹ okhuo ọvbehe, ọnii keghi re okhuo ọkpa ne a tie ẹre Atara, iran keghi biẹ ọmọ okpia ọkpa ne a tie ẹre Onam.

²⁸ Onam kegha mwẹ emọ ikpia eva, ena kegha re Siamai kevbe Jadai, e Siamai kevbe gha mwẹ emọ ikpia eva, e Nadab kevbe Abisiọ.

²⁹ Abisiọ keghi rhie okhuo ọkpa ne a tie ẹre Abihail, iran keghi biẹlẹ emọ ikpia eva, Aban kevbe Molid.

³⁰ E Nadab ne ọtẹn Abisiọ keghi biẹlẹ emọ ikpia eva, ena kegha re Sẹlẹd kevbe Apeim, sokpan e Sẹlẹd nọ rrọọ keghi wu vbe ne ẹ i na mwẹ ọmọ.

³¹ Apeim ọ re ọ biẹ Isi, Isi ọ re ọ biẹ Siesian, e Siesian keghi biẹ Alai.

³² E Jada ne ọtẹn Siamai ne okpia kegha mwẹ emọ ikpia eva, ena ọ re Jeta kevbe Jonatan, sokpan, e Jeta keghi wu vbe ne ẹ i na mwẹ ọmọ.

³³ E Jonatan kegha mwẹ emọ eva, ena ọre Pẹlẹt kevbe Zaza, ena hia kegha re ivbi Jeramil.

³⁴ E Siesian ma biẹ emọ ikpia, sokpan emọ ikhuo, ọ kegha mwẹ ọviẹn ovbi Igipt ọkpa ne a tie ẹre Jarha,

³⁵ ọ na rhie ovbi ẹre ne okhuo ọkpa ne ẹẹn rhie rọnmwẹ. Iran keghi biẹ ọmọ okpia ọkpa ne a tie ẹre Atai.

³⁶ Uviẹn uniẹn nii kevbe ẹgbẹe Atai kpao ya sẹ egbe Elisiama ọ re ọna khin: Atai, Natan, e Zabad,

³⁷ Eflal, Obẹd,

³⁸ Jehu, Azaraia,

³⁹ Helẹz, Eleasa.

⁴⁰ Sismai, Sialọm.

⁴¹ Jekamaia kevbe Elisiama.

Emwa Ivbi Uniẹn Ọvbehe Ọghe Kelẹb

⁴² Ọtẹn Jeramil ne ọ re ovbi e Kelẹb ne ọdiọn kegha re Mesia. Mesia ọ re ọ biẹ Zif ne ọ biẹ Maresia ne ọ biẹ Hibrọn.

⁴³ E Hibrọn kegha mwẹ emọ ikpia enẹ, ena ọre Kora, Tapua, Rekẹm kevbe Siẹma.

⁴⁴ siẹma ọ re ọ gha re erha Raham kevbe erha nọkhua ọghe Jokeam. E Rekẹm ne ọtẹn e Siẹma ne okpia ọ re ọ biẹ Siemai,

⁴⁵ ne ọ biẹ Maọn ne ọ biẹ Bẹtzọ.

⁴⁶ E Kelẹb kegha mwẹ egbakhian ọkpa ne a tie ẹre Efa, okhuo ni kevbe biẹlẹ emọ ikpia eha ọvbehe ne ẹẹn, ena ọre Haran, Moza kevbe Gazẹz, e Haran kevbe gha mwẹ ọmọ okpia ọkpa ne a tie ẹre Gazẹz.

⁴⁷ (Okpia ọkpa ne a tie ẹre Jadai kegha mwẹ emọ ikpia ehan, ena ọ re Regem, Jotam, Gesian, Pẹlẹt, Efa kevbe Siaaf.)

⁴⁸ E Kelẹb kevbe zẹ ọse ọvbehe ne a tie ẹre Maaka, ọ na biẹlẹ emọ ikpia eva ne ẹẹn, ena ọ re Siẹba kevbe Tehana.

⁴⁹ Ọ ghi vbe sẹ okiekie, ọ kevbe biẹlẹ emọ ikpia eva ọvbehe, ena ọ re Siaaf ne ọ bu ẹvbo ne a tie ẹre Madmana, kevbe Siieva ne ọ bu avbe ẹvbo ne a tie ẹre Makbena kevbe Gibea. E Kelẹb keghi ye biẹ ọmọ okhuo ọkpa ne a tie ẹre Aksa.

⁵⁰ Ivbi uniẹn e Kelẹb ọ re ena vbe khin. E Họ kegha re ovbi e Kelẹb ne ọdiọn, deba amwẹ ọnrẹn ighẹ Efrat, E Siobal ne ovbi e Họ ne ọdiọn, ọ re ọ bu ẹvbo ne a tie ẹre kirriat Jearim.

⁵¹ E Saima ne ovbi ẹre ne ukpogieva keghi bu ẹvbo ne a tie ẹre Bẹtlẹhẹm, e Haref ne ovbi ẹre ne ukpogieha na bu ẹvbo ne a tie ẹre ọ Betgada.

⁵² E Siobal ne ọ bu e kirriat Jearim, ọre ọ gha re erha odede ọghe avbe emwa Harọe, kevbe obọkpa vbe a wa ẹvbo ni rre Menuhot ye ihe eva.

⁵³ Deba avbe ẹwae na ni rre kirriat Jearim: Itrait, Putit, Siumat kevbe Misrait (Ẹwae na ọ re avbe emwa ni rre Zora ke Estao vbe khin.)

⁵⁴ E Saima ne ọ bu e Bẹtlẹhẹm ọ re ọ vbe re erha odede ọghe emwa Netofat, Atrọt Bẹt Joab kevbe emwa Zorit ne vbe re ọkpa vbe uwu ẹwae eva ni gha rre Manahat.

⁵⁵ Avbe ẹwae na ne emwi ne a gbẹnnẹ kevbe ne a ghee gbẹnnẹ wa gua ẹre obọ ro, kegha rre ẹvbo ne a tie ẹre Jabẹz. Iran na ọ re emwa Tirat Simiat kevbe Sukat. Iran kegha re Kenit ne iran vbe ivbi Rekab gba gha rọnmwẹ egbe.