I Krọnikol 19 - Edo Bible (E Baibol Ẹdo) Version 1996

E Devid Khọn Amọn Kevbe Siria

¹ Ọ ghi kpee fua kherhe, e Nahas ne ọba Amọn keghi wu, e Hanun ne ovbi ẹre na rriọba.

² E Devid ne ọba keghi kha wẹẹ, “I gha kpe iku gie Hanun zẹ vbene imẹ vbe erha ẹe vba gha ye.” E Devid keghi rhunmwuda ọnii gie emwa ya gbe ọdamwẹ ne ẹẹn. Iran ghi sẹ Amọn, vbe iran ghi ya miẹn Hanun ne ọba Amọn.

³ Avbe ọkaolotu Amọn ke tama ọba wẹẹ, “Te uwẹ ro wẹ te Devid gie emwa na do miẹn ọẹn rhunmwuda ne ọ na ya ọghọ ne erha a? Te ọ gie iran rre zẹ vbe ọrhẹ ne iran do ghe otọe na ghe ne ọ miẹn ehe na do khọn rẹn!”

⁴ E Hanun na munọ emwa ne Devid gie ẹre uhunmwu, ọ na gbẹn iran ẹtu kua, ọ na giagia ẹwu iran la ẹkun, ọ na wẹ ne iran gha rrie.

⁵ Ekhue ma gie iran rrie. E Devid ghi họn emwi ne ọ sunu, ọ keghi gie ne a khama iran wẹ ne iran yakọ vbe Jẹriko, ne iran ghẹ he rre vbẹ i re te ẹtu iran sọn nẹ.

⁶ E Hanun ne ọba kevbe emwa Amọn rẹnrẹn wẹ iran ho ẹ Devid ẹmwẹ nẹ iran keghi rhunmwuda ọnii zẹ uwan esiliva ne ọ sẹ omwa etọni iyeva ne iran hae ya mọmọ ikẹkẹ okuo kevbe emwa ni hin ẹnrẹn vbo obọ Mẹsopotamia ne ọ ke odọọ kevbe Maka kevbe Zọba ne ẹvbo ni rre otọe Siria.

⁷ Ikẹkẹ okuo arriaisẹn evayan ọgban (32,000) ne iran mọmọ ẹn deba ivbiyokuo ọba ọghe Maka keghi bu agọ ye ọkpẹn Mẹdeba. Ivbi Amọn hia kevbe ke ẹvbo iran hia ladian iran na mu egbe igbinna.

⁸ E Devid ghi họn emwi ne ọ sunu khian, ọ na gie Joab kevbe ivbiyokuo hia gha khian.

⁹ Ivbi Amọn keghi ladian, iran na ya ghae ye unu odẹ ne a la la Raba ne ọre igiogbe ẹvbo iran, avbe ọba ni do yi iran obọ keghi ya ghae ye oha ne ọvbẹ aro.

¹⁰ E Joab ghi miẹn wẹ avbe eghian gha la irẹn aro la iyeke rre, ọ keghi hannọ iran ni maa sẹ vbe ivbiyokuo Izrẹl, ọ keghi viọ iran ye ehe ne iran na mu aro da ivbi e Siria.

¹¹ Ọ keghi viọ ivbiyokuo ni dekẹe ne Abisiai ne ọtiọnrẹn, ọ na vbe mwamwa enii viọ iran aro da ivbi Amọn.

¹² E Joab keghi tama rẹn wẹẹ, “U gha miẹn ighẹ obọ ivbi e Siria ra ke ukhunmwu mẹ, u ghi do yọmwẹ obọ, a dẹghe obọ ivbi Amọn ra ke ukhunmwu ne uẹn, I gha rre do yi uẹ obọ.

¹³ Wegbe ne u vbe din! Gie ima kakabọ gbinna ne emwa ima kevbe ne avbe ẹvbo Osanobua ima. Iho e Nọyaẹnmwa ọ re a gha ru.”

¹⁴ E Joab kevbe emwa rẹn ghi khian sikẹ odaro ne iran suẹn iran ne a gu gbinna, ivbi e Siria keghi lẹ.

¹⁵ Ivbi Amọn ghi miẹn wẹ ivbi e Siria lẹre iran keghi kpao vbe ehe ne Abisiai ye rre, iran na lẹ la adesẹ ore ẹvbo iran. Ẹre Joab na werriegbe gha rrie Jerusalẹm.

¹⁶ Ivbi e Siria ghi miẹn wẹ obọ ivbi Izrẹl ke odukhunmwu ne ọ ghe iran iran keghi ya viọ ivbiyokuo ke ẹvbo iran ni rre iyeke Ẹzẹ Yufretes rre, iran na viọ ne Siobak ne ọkaokuo nọkhua ọghe Hadadezẹ ne ọba e Zọba.

¹⁷ E Devid ghi họn, ọ na si ivbiyokuo Izrẹl koko, ọ keghi fian e Jọdan rra, ọ na ghae iran ye ehe ne iran na mu aro da ivbi e Siria. Okuo keghi saa.

¹⁸ Ivbi Izrẹl keghi khulo ivbi e Siria ghe iyeke, e Devid kevbe emwa rẹn keghi gbele emwa ni hin ikẹkẹ okuo arriaisẹn ihinrọn (7,000) vbe ivbi e Siria, deba ivbiyokuo ni ya owẹ khian arriaisẹn iyeva (40,000). Iran keghi vbe gbe Siobak ne ọkaokuo nọkhua ọghe ivbi e Siria.

¹⁹ Avbe ọba ni ga gie Hadadezẹ ghi miẹn wẹ obọ Izrẹl ke odukhunmwu ne iran, iran keghi ya rinmwian e Devid, iran na gha ga gie ẹe. Ivbi e Siria ma ghi dọlegbe ye ivbi Amọn obọ ọvbehe.