I Krọnikol 18 - Edo Bible (E Baibol Ẹdo) Version 1996

Okuo Ne Devid Khọnmiotọ

¹ Ọ ghi kpee fua kherhe, e Devid ne ọba keghi dọlegbe mu okuo gie ivbi e Filistin, ọ na khọn miẹn iran otọ. Ọ keghi mu e Gat kevbe igue ni lẹga ẹre hin ototọ ase iran rre.

² Ọ keghi khọn ivbi e Moab, iran na gha ga gie ẹe.

³ Vbe iyeke ọnii, e Devid keghi mu okuo gie Hadadezẹ ne ọba otọ e Siria ni rre Zọba vbe ọkpẹn otọ e Hama rhunmwuda, e Hadadezẹ keghi te gha ho ne ọ la odẹ uhunmwu e Yufretes la otọe ni do gha kha yan rẹn.

⁴ E Devid keghi khọn mu arriaisẹn (1,000) vbe avbe ikẹkẹ okuo ẹre deba iran ni hin ẹsin arriaisẹn ihinrọn (7,000) kevbe ivbiyokuo ni ye owẹ khian arriaisẹn ugie (20,000). Ọ keghi viọ ẹsin ni gha sẹtin si ikẹkẹ okuo iyisẹn (100) ye otọ, ọ na kun ni ghi dekẹe hia use.

⁵ Ugbẹn vbe ivbi e Siria ni rre Damaskọs ghi gie ivbiyokuo ne iran ya ye Hadadezẹ ne ọba obọ, e Devid ne ọba keghi dekun iran, ọ na gbele arhin arriaisẹn evayan ugie (22,000) vbọ.

⁶ Iyeke ọnii, ọ keghi bu agọ ivbiyokuo ye ẹvbo iran, iran na khian emwa ni rre ototọ ẹre, iran na gha ga gie ẹe. E Nọyaẹnmwa keghi gie obọ e Devid gha ke odukhunmwu vbe ehe hia.

⁷ E Devid keghi khọn mu avbe asa igoru ne ewọe e Hadadezẹ viọ re, ọ na hẹ iran werriegbe gha rrie Jerusalẹm.

⁸ Ọ keghi vbe kun oze ọrhẹnrhẹn vbe Tibhat kevbe Kun, ne ẹvbo ne Hadadezẹ gbearoghe, gha rrie. (Avbe oze nii ọ re Solomọn ghi ya ru ẹgbẹdin nọkhua, ke orre kevbe avbe ọkpan ne a lọ vbe Ọgua Osa.)

⁹ E Toi ne ọba Hamat keghi họn wẹ e Devid wa khọn ivbiyokuo e Hadadezẹ hia muotọ.

¹⁰ Ọ keghi rhunmwuda ọnii gie Joram ne ovbi ẹre ne ọ ya wẹ e Devid ne ọba do, ne ọ vbe gu ẹe ghọghọ ye ne obọ ẹre na ke ukhunmwu ne Hadadezẹ ne irẹn vbe Toi he ka gba gbinna yi inugba ne ọ khin. E Joram keghi viọ emwi ihaoko ne a ya igoru, esiliva kevbe oze ru gie Devid.

¹¹ E Devid na ya ehia fi ohan ne a ya gha ru ugamwẹ, deba avbe igoru kevbe esiliva ne ọ viọ kevbe avbe ẹvbo ne ọ khọn rẹn gha dee, avbe Idọm, e Moab, Amọn, Filistia kevbe Amalẹk.

¹² Abisiai ne a tie eni iye ẹe Zeruaia keghi khọn ivbi Idọm vbe Iya Umwẹ, ọ na gbele arriaisẹn evairrọvbugie (18,000) vbe uwu iran.

¹³ Ọ na bu agọ ivbiyokuo lele ehe hia vbe Idọm. Iran ni rre evba keghi do gha ga gie Devid ne Ọba. E Nọyaẹnmwa keghi gie Devid gha khọnmiotọ vbe ehe hia.

¹⁴ E Devid keghi rriọba yan otọ Izrẹl hia. Ọ keghi ru ẹe ne a miẹn wẹ a ya obọ esi gha mu emwa hia vbe ne a i na vbe zẹ ọmwarhọkpa ẹkpe.

¹⁵ E Joab ne ọtẹn Abisiai kegha re ọkaokuo nọkhua yan ivbiyokuo, e Jehosiafat ne ovbi Ahilud kegha re ne ọ sin emwi hia ẹro.

¹⁶ E Zadọk ne ovbi Ahitub kevbe Ahimẹlẹk ne ovbi Abiata, kegha re ohẹn, e Seraia kegha re ọgbenbe ẹguae.

¹⁷ E Benaia ne ovbi e Jehoiada kegha re ọkaolotu iran ne Devid ya khẹ egbe, ivbi e Devid ni ikpia kevbe gha rre ukpo ni yo vbe oga ọba ẹre.