I Krọnikol 16 - Edo Bible (E Baibol Ẹdo) Version 1996

¹ Iran keghi mu Ẹkpẹti Ile nii gha rrie ehe ne Devid ru ye otọ khẹ ọre, iran na mu ẹẹn ye uwu ẹre. Iran na zọ ese, iran na vbe sisara ghe Osanobua.

² E Devid ghi zọ ese nii fo nẹ, ọ keghi fiangbe emwa nii vbe eni e Nọyaẹnmwa, ọ na ghae evbare gba iran hia obọ.

³ Ọ keghi rhie ne orhiọnkpọkpa vbe Izrẹl ke ikpia kevbe ikhuo, ududu ebrẹd ọkpọkpa, ikele emiowo ne a tọẹn, kevbe avbe ọmọ erhan eso.

⁴ E Devid keghi zẹlẹ eso vbe uwu avbe e Livai ne iran ru ugamwẹ e Nọyaẹnmwa ne Osanobua Izrẹl vbe odaro Ẹkpẹti Ile nii, vbe ekpa ne iran gha na gha so ihuan rho ẹre.

⁵ A keghi zẹ Asaf olotu iran, vbene Zẹkaraia na gha re ne ọ zẹ diake ẹe. E Jeiẹl, Siemiramot, e Jẹhiẹl, e Matitaia, Eliab, e Benaia, Obẹd Idọm kevbe Jeiẹl na gha re ni kpe akpata. Asaf ghi gha kpe isẹ.

⁶ Avbe ohẹn eveva, e Benaia kevbe Jahaziẹl ghi gha kpe okpe vbe ẹghẹ ọre vbe odaro Ẹkpẹti Ile.

⁷ Ẹghẹ nii ọ re Devid na mu ẹmwẹ ihuan ne a so ya rho e Nọyaẹnmwa ye Asaf kevbe avbe Livai ne ihuare obọ.

Ihuan Urhomwẹ

⁸ Wa rhie ekpọnmwẹ ne Nọyaẹnmwa, wa guan ẹmwẹ ukpọlọmwẹ ọnrẹn wa na iyẹn emwi ne ọ ru ma ẹvbo hia.

⁹ Wa so ihuan urhomwẹ ghe Nọyaẹnmwa, ta emwi ọyunnuan ne ọ ru ladian.

¹⁰ Wa ghọghọ wẹ ọghe ọe ma khin. wa gi emwa ni ga ẹe hia gha ghọghọ.

¹¹ Wa bu e Nọyaẹnmwa ya nọ ẹre iyobọ wa vbe gha ga ẹe vbe ne a i na dobọyi.

^12-13 Wa ne ivbi uniẹn Jekọb, ọguọmwadia Osanobua, ivbi uniẹn Izrẹl ne Nọyaẹnmwa hannọ zẹ wa ye iwinna ọyunnuan ne Osanobua winnaẹn rre kevbe ohiẹn ne ọ buru.

¹⁴ E Nọyaẹnmwa ọrọre Osanobua mwa, iyi ẹre, ọghe otọ agbọn hia nọ.

¹⁵ Wa ghẹ ta mianmian ile ọghe Nọyaẹnmwa, ne irẹn tae ne ọ gha rrọọ etẹbitẹ.

¹⁶ Ile ne ọ gu Ebraham ta, emwi ne ọ ve Aizik re.

¹⁷ E Nọyaẹnmwa gu e Jekọb ta ile, egbe ne ọ gha rrọọ rhinrin ẹdẹ.

¹⁸ “I gha mu otọ Kenan nuẹn ọwuẹ ra gha nọ.” Erriọ ọ re ọ tae.

¹⁹ Ibozẹghẹ ọ re emwa e Nọyaẹnmwa gha khin orhunmwuyẹn vbe otọe Kenan.

²⁰ Iran kpolugho ke ẹvbo ọkpa gha rrie ọvbehe, ke otọe arriọba ọkpa gha rrie ọvbehe.

²¹ Sokpan, Osanobua ma gie ọmwarhọkpa kpokpo iran, ne ọ ya tan ifuẹn ga iran, ọ yobọ sekhae ne avbe ọba wẹẹ:

²² “Ghẹ kuan ọguọmwadia ni zẹe, ghẹ yobọ kan avbe akhasẹ mwẹ.”

²³ Wa so ihuan ne Nọyaẹnmwa, wa otọ agbọn hia wa gha na iyẹn ne ọ maa ni ẹdẹgbegbe wẹ, ọ miẹn ima fan nẹ.

²⁴ Wa ta ẹmwẹ uyi ẹre ma uhunmwu ẹvbo hia kevbe iwinna rẹn nekhua ma avbe emwa hia.

²⁵ E Nọyaẹnmwa kpolo, ne a kakabọ rho nọ te a ra gha rhie uyi ne ẹẹn sẹ avbe ẹbọ hia.

²⁶ Ẹbọ avbe agbọn ẹvbo nekpa hia, amazẹ kẹkan nọ sokpan e Nọyaẹnmwa ọ re ọ yi avbe ẹrinmwi.

²⁷ Uyi kevbe ẹtin lẹga ẹre ẹtin kevbe oghọghọ vuọn Ọgua Osa ẹre.

²⁸ Emwa hia ni rre agbọn, wa rho e Nọyaẹnmwa, rho uyi kevbe ẹtin ẹnrẹn.

²⁹ Wa rho eni e Nọyaẹnmwa ne ọ mwẹ uyi wa zẹ ọhẹ rre, ne uwa gha die Ọgua Osa ẹre wa ya uhunmwu rhanmwẹ otọ ne Nọyaẹnmwa, vbe ọ gha ladian vbe uhuanmwẹ ọnrẹn.

³⁰ Wa gha guọ vbe odaro ẹre, agbọn na hia a mu ẹkun agbọn sẹ otọ nẹ gbain vbe ihe ẹre a i ghi sẹtin vbọe ọvbehe.

³¹ Wa gha ghọghọ otọ kevbe iso wa tama agbọn ẹvbo hia ighẹ e Nọyaẹnmwa ọ re ọba!

³² Wa gha vannọ, okun kevbe emwi ni rre uwu uwa wẹ!

³³ Erhan ne oha hia gha davan ne oghọghọ vbe odaro e Nọyaẹnmwa, vbe ọ gha rre do rriọba yan agbọn.

³⁴ Wa rhie ekpọnmwẹ ne Nọyaẹnmwa, rhunmwuda ọ maa; etẹbitẹ ọ re aho ẹmwẹ ọmwa rẹn khin.

³⁵ Wa tama rẹn wẹẹ, “Miẹn ima fan Osanobua Ọmiọnmwafan mwa si ima koko; ne u miẹn mwa fan vbe obọ agbọn ẹvbo nii ne ima miẹn ehe na gha kpọnmwẹ ne a vbe gha rho eni ruẹn ne ọ huanrẹn.”

³⁶ Rho e Nọyaẹnmwa ne Osanobua Izrẹl wa rho ẹre nia kevbe rhinrin ẹdẹ! Ẹre emwa ni hia na kha wẹẹ, “Ise,” iran na rho e Nọyaẹnmwa.

Ugamwẹ Vbe Jerusalẹm Kevbe Gibiọn

³⁷ E Devid ne ọba keghi wa rhie Asaf kevbe avbe Livai ne ihua ẹre yọ fẹẹrẹ ighẹ ugamwẹ ne a ru vbe ehe ne a mu Ẹkpẹti Ile yi. Te a wẹ ne iran gha winna iwinna iran vbe evba ẹdẹgbegbe.

³⁸ Obẹd Idọm ne ovbi e Jedutun, deba arhin eva irrọ vbekigbe siyenẹ ọvbehe vbe uniẹn ọnrẹn kegha re ni ru iyobọ. E Hosa kevbe Obẹd Idọm kegha re ni khẹ onurho.

³⁹ Sokpan, e Zadọk ne ohẹn kevbe avbe ohẹn ne ihua ẹre kegha re ni yan ugamwẹ e Nọyaẹnmwa vbe he ne a na ga vbe Gibiọn.

⁴⁰ Iran ghi gha giẹn ohoho ese vbe uhunmwu Ogiukpo vbe owiẹ kevbe ota hia, zẹ vbene a gbẹn ọẹn ye uhi ne Nọyaẹnmwa gbẹn ne ivbi Izrẹl.

⁴¹ E Heman kevbe Jedutun keghi wa gu iran gha rre evba, deba emwa ọvbehe ne a wa hannọ ne iran gha so ihuan ne Nọyaẹnmwa rhunmwuda aho ẹmwẹ ọmwa ẹnrẹn ọghe etẹbitẹ.

⁴² E Heman kevbe Jedutun ọ re ọ vbe gha gbearoghe avbe okpe kevbe isẹ kevbe emwi ne a kpe ọvbehe ni dekẹ hia ne a kpee vbe a gha so ihuan urhomwẹ. Ivbi uniẹn Jedutun ọ re ọ gha gbe aro ghe avbe onurho.

⁴³ Ẹre dọmwadẹ ọghọe na gha rri owa. E Devid kevbe gha rrie owa ne ọ vbe ya tota ke emwa rẹn vbe omwa ẹghẹ eso.