I Krọnikol 15 - Edo Bible (E Baibol Ẹdo) Version 1996

A Muegbe Ne A Mu Ẹkpẹti Ile Kpao

¹ E Devid keghi bọlọ owa ọghe obọ ẹre ye Ẹvbo e Devid. Ọ na vbe dọlọ ihe eso yi ne Ẹkpẹti Ile ọghe Osanobua. Ọ na mu owa ukpọn yọ.

² Ẹre irẹn na kha wẹẹ, “Avbe Livai ọkpa ọ re ọ ra gha mu Ẹkpẹti Ile rhunmwuda, iran ọ re Nọyaẹnmwa zẹe ne ọ gha mu ẹẹn, ne iran vbe gha winna ne irẹn ẹdẹdẹmwẹdẹ.”

³ E Devid keghi rhunmwuda ọnii tie ivbi Izrẹl hia gha die Jerusalẹm ne a miẹn ehe na mu Ẹkpẹti Ile gha die ehe ne a dọlọ yi ye otọ khẹ ọre.

⁴ Vbe iyekọnii, ọ keghi gie ne a tie ivbi Errọn kevbe avbe Livai.

⁵ Uriẹl keghi viọ arhin iyehan (120) ba egbe ke ẹe kevbe uniẹn ọghe Kohat ne Livai gha dee.

⁶ Asaia keghi viọ arhin ugie yan uri (220) mwẹ obọ ke uniẹn Merari gha dee.

⁷ E Joẹl keghi viọ arhin ọgban yan iyisẹn (130) mwẹ obọ ke uniẹn Gisiọn gha dee.

⁸ Siemaia keghi viọ arhin uri (200) mwẹ obọ ke uniẹn Elizafan gha dee.

⁹ Eliẹl keghi viọ arhin iyenẹ (80) mwẹ obọ ke uniẹn Hibrọn gha dee.

¹⁰ Aminadab keghi viọ arhin iweva yan iyisẹn (112) mwẹ obọ ke uniẹn Uziẹl gha dee.

¹¹ E Devid keghi tie Zadọk kevbe Abiata ne ohẹn la owa, kevbe avbe Uriẹl, Asaia, Joẹl, Siemaia, Eliẹl kevbe Aminadab ne Livai.

¹² Ọ keghi tama avbe Livai na wẹẹ, “Wa ọrọre olotu avbe uniẹn avbe Livai, wa họnmwẹ egbe uwa kevbe ọghe Livai ne ihua uwa, ne uwa miẹn ehe na mu Ẹkpẹti Ile ọghe Nọyaẹnmwa Osanobua Izrẹl gha die ehe ne I dọlọyi ye otọ khẹ ọre.

¹³ Rhunmwuda ne uwa i na rre evba ne uwa mu ẹẹn vbe okaro, e Nọyaẹnmwa ne Osanobua ima keghi rri ima oya ye ne ima ma na ga ẹe vbene ọ te ke yi.”

¹⁴ Rhunmwuda ọnii, avbe Livai keghi ya họnmwegbe ne iran miẹn ehe na mu Ẹkpẹti Ile ọghe Nọyaẹnmwa ne Osanobua Izrẹl.

¹⁵ Avbe Livai keghi ya erhan dada ẹe vbe izabọ zẹ vbene Nọyaẹnmwa la unu e Mosis tae.

¹⁶ E Devid keghi tama olotu avbe Livai wẹ ne ọ zẹlẹ avbe Livai ne iran gha so ihuan kevbe ne iran vbe gha kpe akpata kevbe ukusẹ ọghe oghọghọ.

^17-21 Emwa ne iran zẹlẹe vbe uniẹn ne iran gha kpe avbe isẹ ẹrọnmwọ ọ re ena khin: E Heman ne ovbi e Joẹl, ọtiọnrẹn ighẹ Asaf ne ovbi e Berakia kevbe Etan ne ovbi e Kusiaia ne uniẹn e Merari. Iran kevbe zẹlẹ avbe Livai na ne iran ru iyobọ ne iran ni kpe akpata ne urhu ẹre ye ghẹnrẹn. Iran na ọrọre Zẹkaraia, Jaaziẹl, Siemiramot, Jẹhiẹl, Uni, Eliab, Maaseia kevbe Benaia. Avbe Livai ne iran zẹ ne ọ gha kpe akpata ne urhu ẹre ma vbe yo gbe ọre ena khin: Matitaia, Elifelehu, Mikneia, Azazaia deba Obẹd Idọm kevbe Jeiẹl ne ni khẹ Ọgua Osa.

²² A keghi zẹẹ Kienanaia ne ọ gha re ọkaolotu avbe Livai ne ikpemaba rhunmwuda ọ mobọ guẹ emwi ne a kpe ẹsẹse.

^23-24 A keghi zẹlẹe Berakia kevbe Ẹlkana deba Obẹd Idọm kevbe Jehaia ne iran gha khẹ Ẹkpẹti Ile. A keghi zẹlẹ avbe ohẹn ighẹ e Siebanaia, e Josiafat, Netanẹl, Amasai, e Zẹkaraia, e Benaia kevbe Eliezẹ ne iran gha kpe okpe vbe odaro Ẹkpẹti Ile.

A Mu Ẹkpẹti Ile Gha Rrie Jerusalẹm

²⁵ Ẹre Devid ne ọba, avbe olotu Izrẹl kevbe avbe ekaokuo nekhua na gha rrie owa Obẹd Idọm ne iran ya mu Ẹkpẹti Ile gha dee, iran keghi ru emwiukpo nọkhua.

²⁶ Iran keghi ye ẹmila ihinrọn kevbe ohuan ihinrọn zọ ese ne aro miẹn ehe na daa ẹe ighẹ Osanobua gha yi iran obọ ighẹ avbe Livai ni mu Ẹkpẹti nii.

²⁷ Etovbiohuẹ ne sẹguẹn ọre a ya do ẹwu ne Devid yọe, erriọ vbe nọ ne iran ni kpe ema, Kienanaia ne ọkaolotu iran kevbe avbe Livai ni mu nene Ẹkpẹti. E Devid keghi rhuan adaghọ.

²⁸ Ẹre ivbi Izrẹl hia na lele Ẹkpẹti Ile gha die Jerusalẹm deba uwemwẹ oghọghọ, kevbe urhu okpe, ẹkperẹ kevbe ukusẹ deba urhu akpata.

²⁹ Vbene a wa mu Ẹkpẹti nii la adesẹ ore ẹvbo, e Mikal ne ovbi e Sọl keghi rhie aro la ewindo ghe ẹre, ọ keghi ya dẹghe Devid ne ọba, ọ gha kuu, ọ gha vbọ yo vbọ rre ne oghọghọ, ẹmwẹ ọnrẹn keghi sọnnọ ẹn ruan.