I Krọnikol 14 - Edo Bible (E Baibol Ẹdo) Version 1996

Emwi Ne Devid Ru Vbe Jerusalẹm

¹ E Hiram ne ọba e Taia keghi gie ukọ ẹki ne a do bu e Devid. Ọ keghi viọ erhan sida kevbe avbe igbokuta kevbe avbe owinna ne ẹẹn ne ọ ya bọ ẹguae.

² Evba ọre Devid na rẹn wẹ te Nọyaẹnmwa ka irẹn uhe ye aga zẹ vbe ọba Izrẹl, ọ Kevbe gie arriọba ẹre gha maa, rhunmwuda emwa rẹn.

³ Ọ ghi sẹ Jerusalẹm, ẹ Devid keghi ye viọ ikhuo ni bun, ọ kevbe biẹlẹ emọ ikpia kevbe emọ ikhuo.

⁴ E Jerusalẹm ọ re a na biẹlẹ avbe emọ na ne ẹẹn. Iran ọ re, Siama, Siobab, Natan, e Solomọn,

⁵ Iba, Elisiua, Elpẹlẹt,

⁶ Noga, Nẹfẹg, Jafia,

⁷ Elisiama, Biliada kevbe Ẹlifẹlẹt.

A Khọn Miẹn Ivbi E Filistin Otọe

⁸ Avbe Filistin ghi họn ighẹ a ma e Devid ọba ọghe otọe Izrẹl hia, ivbiyokuo iran keghi ladian ne iran ya mu ẹẹn. Ẹre Devid na vbe ladian ne ọ ya vba iran.

⁹ Ivbi e Filistin ghi sẹ Iya Refeim, iran keghi suẹn gha fu emwi viọ.

¹⁰ E Devid keghi nọọn Osanobua wẹẹ, “Ne I gu iran gbinna ra, u gha gun mwẹ khọn miotọ ra.” E Nọyaẹnmwa keghi wanniẹn wẹẹ, “Ẹn, ya gu iran gbinna, I gha guẹ khọn miotọ!”

¹¹ Ẹre Devid na dekun iran vbe Bal Pẹrazim, ọ na khọn miẹn iran otọ. Rẹn keghi kha wẹẹ, “Osanobua rhie mwẹ ya khọn la iyokuo eghian mwẹ gberra zẹ vbe orogho amẹ.” Ọre ọ zẹe ne a na tie evba ni Bal Pẹrazim.

¹² Avbe ivbi e Filistin ghi lẹ, iran na sẹ avbe amazẹ iran rae. Ẹre Devid na wẹ ne a giẹn iran uan.

¹³ Ọ ma ghi vbe kpẹe, ivbi e Filistin keghi werriegbe gha die iya ni, iran na dọlegbe gha fu emwi viọ.

¹⁴ E Devid kevbe nọ Osanobua, ọ keghi wanniẹn wẹẹ, “Ghẹ dekun iran vbe emwa, sokpan, lẹga ne u ya la obọ nọkpa dekun iran vbe ọkpẹn erhan balsam.

¹⁵ U gha họn igiawẹ vbe uhunmwu erhan, u ghi dekun iran rhunmwuda I gha ke odaro ne uẹn ne I ya khọn iyokuo e Filistin muotọ.”

¹⁶ E Devid keghi ru vbene Osanobua khare, ọ na khulo ivbi e Filistin werriegbe ke Gibiọn kpao ya sẹ Gẹzẹ.

¹⁷ Ẹmwẹ e Devid keghi titi gba ehe hia, e Nọyaẹnmwa keghi gie ohan rẹn gha mu agbọn ẹvbo hia.