I Krọnikol 13 - Edo Bible (E Baibol Ẹdo) Version 1996

A Mu Ẹkpẹti Ile Kpao Vbe kirriat Jearim

¹ E Devid ne ọba ke gu avbe olotu arhin arriaisẹn kevbe iyisẹn zẹ iro.

² Ọ na tama ivbi Izrẹl hia wẹẹ, “A dẹghe wa yobọ yọ kevbe wẹ iho e Nọyaẹnmwa ne Osanobua mwa nọ, wa gie ima gie emwa bu ivbi ẹvbo ima nekpa kevbe avbe ohẹn kevbe Livai ni rre ẹvbo iran, ne a tama iran ne iran gie ima miẹn egbe vbe edinran.

³ Ma ghi ya mu Ẹkpẹti Ile e Nọyaẹnmwa, ne a wa yangbe vbe ẹghẹ ne Sọl na gha re ọba, rre.”

⁴ Iro na keghi wa yẹ emwa hia, iran na khuẹnniẹn yọ.

⁵ Ẹre Devid na si emwa ni hia ke ehe ne ẹvbo ni sẹe ehe ne ọ rhanmwẹ koko ke uwu Igipt vbe odẹ ekẹn ya sẹ Ada e Hamat vbe odẹ okuọ, ne iran miẹn ehe na ya mu Ẹkpẹti Ile Nọyaẹnmwa ke kirriat Jearim gha die Jerusalẹm.

⁶ E Devid kevbe emwa ni kegha rrie Baala, ọnii nọ wẹ kirriat Jearim vbe otọe Juda, ne iran ya mu Ẹkpẹti Ile Osanobua rre ne ọ mwẹ eni e Nọyaẹnmwa ne ọ tota ye ẹkete vbe odukhunmwu emwi ni zẹ ifuẹn nii.

⁷ Iran keghi mu Ẹkpẹti Ile nii ladian vbe owa Abinadab iran na mu ẹẹn yan okotọ ọgbọn. Uza kevbe Ahio kegha rhie aro lele ẹe kevbe ọkotọ nii.

⁸ Vbene Devid kevbe emwa nekpa na gha ya ẹtin iran hia iwu ne iran ya rhie ọghọ ne Osanobua. Iran kegha so ihuan iran na gha kpe avbe ẹzi kẹn, akpata ema, isẹ kevbe okpe.

⁹ Iran ghi sẹ ako otọ ne Kidọn na khuọn ọka, ẹmila keghi kpigogo, ọ re Uza na niẹn obọ ya da Ẹkpẹti Ile yi.

¹⁰ Vbe ọwarọkpa, ohu Uza keghi mu e Nọyaẹnmwa, ọ na gbe ẹe rua rhunmwuda ne ọ na ye obọ kan ẹkpẹti nii. Ọ keghi wu vbe odaro e Nọyaẹnmwa.

¹¹ Ọre a na gha tie evba ni Pẹrẹs Uza ke ẹghẹ ni gha dee, ohu keghi kakabọ mu e Devid rhunmwuda izohu ọ re Nọyaẹnmwa na rria Uza ikhi.

¹² Ohan Osanobua keghi gha mu e Devid ọ na kha wẹẹ, “Vbe imẹ a ghi ra ye ya sẹtin mu Ẹkpẹti Ile gha khian hẹ nian?”

¹³ Rhunmwuda ọnii, e Devid ma ghi mu ẹẹn gha rrie Jerusalẹm sokpan, ọ keghi sọrae ye owa Obẹd Idọm ne ovbi ẹvbo ne a tie ẹre Gat.

¹⁴ Ọ keghi gbe uki eha vbe evba. E Nọyaẹnmwa na fiangbe ẹgbẹe Obẹd Idọm kevbe emwi hia ni re ọghe ọe.