I Krọnikol 12 - Edo Bible (E Baibol Ẹdo) Version 1996

Ivbi Ẹwae Bẹnjamin Ni Ka Gha Lele Devid

¹ Ẹghẹ ne Devid na gha rre Ziklag ne ọ lẹ gha rrie ne ọ miẹn ehe na lẹ e Sọl fe, ivbiyokuo ne ọ kpee ne ọ ke yo okuo kevbe ne ọ gia mu ẹtin yan ni bun,

² ne ivbi ẹwae Bẹnjamin ne Sọl ke rre, keghi ya deba ẹre. Iran sẹtin ye obọ erha ọmwa ra obọ iye ọmwa fi ifẹnmwẹ ra umọvọn.

^3-7 Emwa ni gha viọ iran mwẹ khian kegha re Ahieza kevbe Joas ne ivbi e Siemaa ne ọ ke Gibea rre. Nene avbe ivbiyokuo ọrọre: E Jeziẹl kevbe Pẹlẹt ne ivbi Azmavẹt Beraka kevbe Jehu ni ke Anatọt rre Ismaia ne ọ ke Gibiọn rre, ọmwa ne ọ re ovbiyokuo ne ọ hin usi kevbe ọkpa vbe uwu avbe ọkaolotu “Iran ne Ọgban” E Jerimaia, Jahaziẹl, Johannan kevbe Jozabad ni ke Gẹdẹra rre Eluzai, Jerimot, Bealia, Siemarai kevbe Siefatia ni ke Harif rre Ẹlkana, Isiaia, Azariẹl, Joeze kevbe e Jasiọbim ne ivbi uniẹn e Kora E Joela kevbe Zebadaia ne ivbi e Jeroham ni ke Gẹdọ rre.

Iran Ni Lele Devid Vbe Ewae Gad

⁸ Eni iran ena khin ighẹ avbe ivbiyokuo ni hin usi kevbe ni kpee vbe okuo ne a yo, ni ke ẹwae e Gad rre do deba ivbiyokuo e Devid vbe ẹghẹ ne ọ na gha rre ehe ne a gbe odin ga vbe ato. Iran kegha re emwa ne asoro kevbe asa ne a lo mobọ gua ẹre obọ ro. Iran kevbe mu ohan vbe aro zẹ vbe oduma, iran kevbe rhulẹ zẹ vbe ẹrhuẹ ne uhunmwu oke.

^9-13 Vbene a ya mwamwa edọmwadẹ ọghe ọe ye ukpo ọ re ọna khin: Ẹzẹ, Obedaia, Eliab, e Mismana, e Jerimaia, Atai, Eliẹl, Johanan, Elzabad, Jerimaia kevbe Makbanai.

¹⁴ Eso vbe uwu avbe emwa ni ke uniẹn e Gad rre na kegha re ọkaokuo negiẹrẹ ni gbe aro ghe ivbiyokuo iyisẹn.

¹⁵ Vbe uki ne okaro ọghe ukpo ọkpa, ne Ẹzẹ e Jọdan na ro kpa ku oke, iran keghi fian ẹzẹ ni rra, iran na vẹ emwa ni rre iya ni kua ke odẹ ahọ ke odẹ orrie ọghe ẹzẹ ni.

Iran Ni Lele Ẹe Vbe Bẹnjamin Kevbe Juda

¹⁶ Ẹghẹ ọkpa, ikpia eso keghi si egbe koko vbe Bẹnjamin kevbe Juda, iran na bu e Devid vbe ehe ne ọ ye ne a gbe odin ga vbe ato.

¹⁷ E Devid keghi bu iran gha khian, ọ tama iran wẹẹ, “A dẹghe te uwa rre zẹ vbe ọse ne uwa do yọmwẹ obọ, I miẹn uwa yi, wa deba ima! Sokpan, dẹghe te uwa mwẹ ọnrẹn vbe ekhọe ne uwa do rhie mwẹ yan eghian mwẹ obọ, egbe ne a rhe ya miẹn wẹ I ma ru uwa emwirhọkpa, Osanobua avbe erha mwẹ odede gha rẹn, ọ ghi rria uwa ikhi.”

¹⁸ Orhiọn Osanobua keghi hin yan ọkpa vbọ, Amasai ne ọ ghi khian ọkaolotu nọkhua ọghe “Iran ne Ọgban” ọ keghi wẹẹ, “E Devid ne ovbi e Jese, otu ruẹ ma ye Ọ dunna ẹn ọ re ọwuẹ kevbe iran ni yuọ obọ Wẹ ọ re Osanobua yaba.” E Devid keghi rhan obọ miẹn iran, ọ na viọ iran ye ukpo vbe ivbiyokuo ẹre.

Iran Ni Lele Ẹe Vbe Manasẹ

¹⁹ Ivbiyokuo eso vbe ẹwae Manasẹ keghi ya deba e Devid vbe ẹghẹ ne ọ na lele ivbi e Filistin ladian vbe iran ra ya gu e Sọl gbinna. Vbene ẹmwata, ọ ma ru iyobọ ne ivbi e Filistin rhunmwuda ohan mu avbe ọba iran wẹ ọ gha fi iran ne Sọl ne arowa ẹre nẹdẹ, iran na wẹ ne ọ werriegbe gha rrie Ziklag.

²⁰ Ọ ghi werriegbe dee, avbe ivbiyokuo na ọ re ọ gberra ghe obọ ọghe Devid: Adna, e Jozabad, Jediaẹl, e Maikẹl, Jozabad, Elihu kevbe Ziletai. Ẹghẹ ne iran na gha rre Manasẹ ivbiyokuo arriaisẹn ọ re ọkpọkpa vbe uwu iran gha gbe aro ghe.

²¹ Iran kegha winna ne Devid vbe ukpo olotu ivbiyokuo ẹre rhunmwuda, ivbiyokuo ni hin usi ọre iran hia gha khin. Okiekie, iran kevbe gha re ekaolotu vbe ivbiyokuo Izrẹl.

²² Uhin ighẹ ẹdẹgbegbe ọre emwa ya gha deba ivbiyokuo e Devid, sẹrriọ wẹ vbe ọma ghi he kpẹe, ivbiyokuo ẹre keghi khian ọrhẹnrhẹn.

Avbe Ivbiyokuo E Devid

^23-37 Ẹghẹ ne Devid na gha rre Hibrọn, ivbiyokuo ne a ma ẹre emwi ni bun ọre ọ ya deba ẹre ne iran ru iyobọ ya ma ẹre ọba zẹ vbene Nọyaẹnmwa tae ye otọ. Avbe iran ni ọ re ena khin: E Juda: arhin uri i rrọ vbe arriaisẹn ihinrọn (6,800) ni mwẹ emwi igbinna ọghe asa kevbe asoro. E Simiọn: arhin iyisẹn yan arriaisẹn ihinrọn (7,100) ne a ma ẹre emwi ẹsẹse; E Livai: arhin arria eha yan arriaisẹn enẹ (4,600); Ivbi uniẹn Errọn ni lele Jehoiada: iyisen yan arriaeha yan arriaisẹn eha (3,700); Etẹn e Zadọk ne ọmọ ne igbinna gua ẹre obọ ro kegha re arhin eva yan ugie (22) nihiunsi; Bẹnjamin (uniẹn e Sọl tobọre): arhin arriaisẹn eha (3,000). Iran nibun sẹ vbe Bẹnjamin ọ re ọ wa yegbe ba e Sọl; Ifreim: arria enẹ yan arriaisẹn ugie (20,800) ni wa hin usi vbe ẹwae iran; E Manasẹ ne orrie: arhin arriaisẹn evairrọ vbe ugie (18,000) ne a zẹe ne iran ya ma Devid ọba. Isaka: Ekaolotu uri (200) deba emwa ni rre ototọ asẹ iran (avbe ekaolotu na rẹn emwi ne ọ kere ne Izrẹl ru ke ẹghẹ ne ọ ke yi ne a ya ruẹe;) E Zebulọn: arhin arriaisẹn ekigbe siyeha (50,000) emwa ni gie a ya egbe yan kevbe ni mu egbe vbe ẹghẹ hia ni iran ya gbinna, emwa ne a ma ẹre emwi vbene a lo emwi igbinna ne ọ rhirhi a gha khin hẹ; E Naftali: avbe ekaolotu arriaisẹn (1,000) do deba arhin arriaisẹn ehairrọ vbe iyeva (37,000) ne a viọ emwi igbinna asa kevbe asoro na; E Dan: arhin arriaeha yan arriaisẹn evairrọ vbe ọgban (28,600) ne a ma ẹre emwi; Asia: arhin arriaisẹn iyeva (40,000) ni mu egbe ne iran ya gbinna vbe okuo. Ẹwae ni rre odẹ ahọ e Jọdan kegha re Riubẹn, e Gad kevbe Manasẹ ne odẹ Ahọ: Arhin arriaisẹn iyehan (120,000) ne a ma ẹre vbene a lo emwi igbinna ne ọ rhirhi gha khin hẹ.

³⁸ Avbe ivbiyokuo na hia ni wa mu egbe okuo kegha rrie Hibrọn vbene iran na yan yọ wẹ te iran ra ma e Devid ọba Izrẹl hia. Iran ne ivbi Izrẹl ni dekẹe hia, emwi ọkpa ni ọre ọ rre iran ekhọe vbe emwi ne iran wẹ iran ra ru.

³⁹ Iran keghi gu e Devid gbe ikpẹdẹ eha vbe evba vbene iran na gha rri evbare ne emwa ẹvbo nii ne ihua iran le ni iran.

⁴⁰ Emwa kegha viọ evbare ughughan ke urria rre vbene iran na ya ẹsin ihẹ, ekẹtẹkẹtẹ, ẹmila amwẹ, ẹkhuia, hẹ evbare ni rre, avbe irhuarhua, ebe uwọnmwẹ, ọmọ erhan ne a kae re, ayọn, ofigbọn oliv, ke ehe ne ọ rrei rre, vbene Isaka ye kevbe Zẹbulọn kevbe Naftali. Iran kevbe viọ ẹmila kevbe ohuan gie iran gha gbele re. Ena hia kegha re ne a ya rhie maa vbene ẹko rhiẹnrhiẹn emwa hia hẹ, la ehe ne ẹvbo nii sẹe, ehe ne ọ rhanmwẹ.