I Krọnikol 11 - Edo Bible (E Baibol Ẹdo) Version 1996

E Devid Rrioba Izrẹl Ke Juda

¹ Ivbi Izrẹl hia keghi bu e Devid gha rrie Hibrọn, iran tama rẹn wẹẹ, “Esagiẹn ọkpa ma gba khin.

² Vbe ẹghẹ ne ọ gberra, uhin vbe Sọl he ye re ọba ima, wẹ ọ re ọ gha viọ ivbi Izrẹl ye okuo, e Nọyaẹnmwa Osanobua ruẹ keghi yan tama ruẹn wẹ u gha su emwa na, u ghi gha re ogie iran.”

³ Rhunmwuda ọnii, avbe ekaolotu ivbi Izrẹl hia keghi bu e Devid gha die Hibrọn, ọ na yo ulamwẹ ne iran, iran tue ori ye ọre uhunmwu iran keghi ma ẹre ọba Izrẹl zẹ vbene Nọyaẹnmwa la unu e Samuẹl tae zẹẹ.

⁴ E Devid ne ọba kevbe ivbi Izrẹl hia keghi mu okuo gie Jerusalẹm, e Jebus ọ re a tie ẹre ẹghẹ nii, ivbi e Jebus ne ivbi ọmotọ he ye rre evba.

⁵ Ivbi e Jebus keghi tama e Devid wẹẹ, “Ẹ i ra sẹtin la adesẹ ore ẹvbo,” sokpan, e Devid keghi khọn mu e Zaiọn ne a gbe odin gaa, ọ re a na do gha tie ẹre “Ẹvbo e Devid.”

⁶ E Devid keghi kha wẹẹ, “Ọmwa ne ọ rhirhi ka gbe ovbi e Jebus ọ re ọ ra gha re ọkaokuo nọkhua ọghe ivbiyokuo!” E Joab ne a tie iye ẹe Zeruaia keghi ke odaro igbinna nii, ọ re ọ na do gha re ọkaokuo nọkhua.

⁷ Rhunmwuda ne Devid na ya yin ẹvbo ne a gbe odin gaa nii,

⁸ a na do gha tie ẹre, “Ẹvbo e Devid.” Ọ keghi dọlegbe bọ ẹvbo nii, ọ na suẹn ọnrẹn vbe ehe ne a na ya ekẹn ran uye vbe obọ agọ ọghe oke nii, e Joab keghi ya khọn ehe ni ghi dekẹe vbe ẹvbo nii fo.

⁹ E Devid kegha wegbe yọ ẹdẹgbegbe, rhunmwuda, e Nọyaẹnmwa Noghodua deba ẹre.

Ivbiyokuo E Devid Ni Hin Usi

¹⁰ Eni avbe ivbiyokuo e Devid ni hin usi ọ re ena khin, iran na ọ re ọ yaba ivbi Izrẹl nekpa, ru iyobọ ne ẹẹn ne ọ rriọba zẹ vbene Nọyaẹnmwa kha re, iran kevbe ya arriọba ẹre igie muotọ.

¹¹ Ne okaro vbọ ọrọre Jasiọbim ne uniẹn Hakmọn, ne ọ gha re ọkaolotu “Iran ne Eha.” Ọ keghi ya umozo gu arhin iyisẹn yan uri gbinna vbe okuo ọkpa, ọ na gbele iran hia a.

¹² Ne ọ ghi zẹ lele “Iran ne Eha,” ni hin usi kegha re Eliaza ne ovbi e Dodo ne ovbi uniẹn Ahọ.

¹³ Rẹn mudia ke Devid gu ivbi e Filistin gbinna vbe okuo e Pas Demim. Ugbo ọka rẹn gha ye vbe ivbi Izrẹl vẹ kua vbe okuo.

¹⁴ Ẹre irẹn vbe emwa rẹn na mudia vbe adesẹ ugbo nii, iran na gu ivbi e Filistin gbinna. E Nọyaẹnmwa keghi rhie a khọnmiotọ ne ẹẹn.

¹⁵ Ọ ghi sẹ ẹdẹ ọkpa, eha vbe uwu avbe iyokuo ọgban nii hin usi sẹ kegha rrie okuta nọkhua ne Devid na gha rre ọkpẹn uvun okuta Adulam, vbe avbe ivbiyokuo e Filistin bu agọ ye Iya e Refeim.

¹⁶ Vbe ẹghẹ ne a kha na, e Devid kegha rre uhunmwu oke ne a gbe odin gaa. Ivbi e Filistin eso keghi mu e Bẹtlẹhẹm.

¹⁷ Ẹmwẹ owa keghi gha da e Devid, ọ keghi kha wẹẹ, “Vbọ rrọọ nian akpawẹ, I gha miẹn ọmwa ne ogha sa amẹ uhae ne ọ rre onurho e Bẹtlẹhẹm gun mwẹ wọn.”

¹⁸ Ivbiyokuo ni hin usi eha keghi ya uhunmwu ha agọ ivbi e Filistin gberra, iran keghi sa amẹ vbe uhae nii, iran na mu bu e Devid gha dee. Sokpan, ọ ma wọn ẹn, ọ keghi hihiẹ ọe ku otọ zẹ vbe emwi izọ ese ghe Nọyaẹnmwa,

¹⁹ ọ wẹẹ, “Ohan i gun mwẹ wọn ọna, te ọ ra yevbe ne a wọn esagiẹn emwa na ni rhie uhunmwu da ẹbe.” Rhunmwuda ọnii, ọ ma wọẹn. Iwinna udinmwẹ ne ivbiyokuo eha ni hin usi winnaẹn ọ re ọnii khin.

²⁰ Abisiai ne ọtẹn e Joab ọ re ọ gha re ọkaolotu iran ne “Ọgban Ni hin usi.” Ọ keghi ye asoro ẹre gu arhin iyisẹn eha (300) gbinna, ọ na gbele iran hia a, ọ na do hin usi sẹẹ vbe uwu ẹbu “Iran ne Ọgban,” ọ na do gha re olotu iran.

²¹ Rẹn ọ re ọ hin usi sẹẹ vbe uwu “Iran ne Ọgban,” sokpan ọ ma hin usi vba “Iran ne Eha.”

²² E Banaia ne ovbi e Jehoiada ne ovbi ẹvbo ne a tie ẹre Kabzil kevbe gha re ovbiyokuo ne ọ hin usi. Emwi udinmwẹ ni bun ọ re ọ ru, uwu ne ọ na gbele ivbiyokuo e Moab eva ni hin usi. Ẹghẹ ọkpa, ọ na la uwu uvun vbe ẹghẹ ne esia ya dee, ọ na ya gbe oduma.

²³ Ọ kevbe gbe ovbi Igipt ọkpa ne gẹdẹgbẹẹ ne ọ sẹ omwa emita ihinrọn vbe ukhiọnmwẹ vbe utanmwẹ, ọ na vbe mu asoro nọkhua mwẹ ne ọ ya gbinna. E Benaia keghi ya orhokhua yan rẹn, ọ na sanmwẹ ọre asoro hin obọ ovbi Igipt ni rre, ọ na ya gbe ẹe rua.

²⁴ Ena ọ re emwi udinmwẹ ne Benaia ru khin ọmwa ne ọ vbe re ọkpa vbe uwu “Iran ne Ọgban.”

²⁵ Rẹn kakabọ hin usi sẹẹ vbe uwu ẹbu “Iran ne Ọgban” sokpan ọ ma hin usi vba “Iran ne Eha.” E Devid keghi ya ẹe ru ọkaolotu iran ne ọ ya khẹ egbe.

^26-47 Avbe ivbiyokuo ni hin usi ni dekẹe ọre ena khin. Asahẹl ne ọtẹn Joab Elhana ne ovbi e Dodo, ovbi e Bẹtlẹhẹm E Siamot ne ọ ke Harọd rre E Helẹz ne ọ ke Pẹlẹt rre Ira ne ovbi Ikẹs ne ọ ke Tẹkoa rre Abiẹzẹ ne ọ ke Anatọt rre E Sibekai ne ọ ke Husia rre Ilai ne ọ ke Ahọ rre E Maharai ne ọ ke Nẹtofa rre E Heled ne ovbi e Baana ne ọ ke Nẹtofa rre Itai ne ovbi e Ribai ne ọ ke Gibea vbe otọ Bẹnjamin rre E Benaia ne ọ ke Piratọn rre E Hurai ne ọ ke iya ne ọ rre ọkpẹn Gaas rre Abiẹl ne ọ ke Aba rre Azmavẹt ne ọ ke Bahurim rre Eliaba ne ọ ke Siabọn rre E Hasiem ne ọ ke Gizọn rre E Jonatan ne ovbi e Siagi ne ọ ke Hara rre Ahiam ne ovbi e Siaka ne ọ ke Hara rre Elifal ne ovbi e Ọọ E Hẹfẹ ne ọ ke Mekera rre Ahija ne ọ ke Pelọn rre E Hẹzrọn ne ọ ke Kamẹl rre E Naharai ne ovbi Ezbai E Joẹl ne ọtẹn Natan E Miba ne ovbi e Hagri E Zelek ne ọ ke Amọn rre E Naharai ne ọ mu ẹwu ematọn igbinna mwẹ e Joab, ne ọ ke Birot rre Ira kevbe Garẹb ni ke Jetẹ rre Uraia ne ovbi e Hiti E Zabad ne ovbi Alai Adina ne ovbi e Siiza (ọkaolotu vbe uniẹn e Riubẹn ne ọ vbe mwẹ otọ ivbiyokuo ọgban ọghe obọ ẹre) E Hanan ne ovbi e Maaka E Josiafat nẹ ọ ke Mitan rre Uzaia ne ọ ke Astera rre Siama kevbe Jiẹl, ivbi e Hotan ni ke Aroẹ rre E Jediaẹl kevbe Joha ivbi e Simri ni ke Tis rre Eliẹl ne ọ ke Mahava rre Jeriba kevbe Jasiaviah, ne ivbi Elnaam Itma ne ọ ke Moab rre Eliẹl, Obẹd kevbe Jaasiẹl ne ọ ke Zoha rre