I Kọrinti 8 - Edo Bible (E Baibol Ẹdo) Version 1996

Ẹmwẹ Emwi Ne A Ya Ru Ẹbọ

¹ Vbe ekpa emwi ne a ya ru ẹbọ: Ẹmwata nọ wẹ, “ma hia ọre ọ rẹn emwi,” zẹ vbe ne itan kha re. Sokpan egbe irẹnmwi vberriọ, uhiomwẹ ọre ọ si ye ọmwa egbe, sokpan ahọ ẹmwẹ ọmwa ọre ọ de ọmwa igiẹ.

² Ọmwa ne ọ ro ighẹ rẹn rẹn emwi, ọ ma he rẹn emwi sẹ vbene ọ te kei nẹẹn.

³ Sokpan ọmwa ne ọ ho ẹmwẹ Osanobua, Osanobua rẹn ọnrẹn.

⁴ Vbe ekpa ọghe wẹ deghẹ ọ kere ne a gha rri emwi ne a ya ru ẹbọ, ma rẹnrẹn wẹ, emwi ne ẹbọ mudia ye ihe ẹre keghi re emwi ne ẹ i zẹdẹ rrọọ hiehiere. Ma rẹnrẹn wẹ, Osanobua ọkpa kẹkan ọre ọ rrọọ.

⁵ Gie a kha wẹ avbe ẹbọ ne emwa gho gele rrọọ, vbe agbọn na nọ kevbe ẹrinmwi, deba avbe “ni yaẹnmwa.”

⁶ Sokpan Osanobua ọkpa ma mwẹ, ọnii ọ re Evbavba ne ọ yi emwi hia, ọmwa ne ima rre agbọn na, Nọyaẹnmwa ọkpa kẹkan ọre ọ vbe rrọọ, ọnii ọrọre Jesu Kristi, ọmwa ne a la ekpa ẹre yi emwi hia, ọmwa ne ima la ekpa ẹre vbe rre agbọn.

⁷ Sokpan ẹ i re emwa hia ọre ọ rẹn ẹmwata na. Ẹmwẹ ẹbọ gu uwa eso obọ ro sẹrriọ wẹ, do sẹ ẹdẹnẹrẹ na, iran gha rri egbe evbare vberriọ, emwi ne ọ re ọghe ẹbọ ọre iran ye ka ẹe yi, ekhọe iran ma wegbe, iran ghi gha ro ighẹ evbare awua ọre iran re.

⁸ Vbene ọ rhirhi gha ye hẹ, evbare i sẹtin si ima sikẹ Osanobua sẹ ayọ, a deghẹ a ma re, emwi rhọkpa ma wi mwa, a gha vbe re, emwi na miẹn rhie i vbe rrọọ.

⁹ Sokpan, u ghi mwẹ ẹwaẹn ne u ghẹ ya ye rhunmwuda ighẹ u sẹtin ru emwi ne ọ khọn ruẹn ye ọmwa ne iyayi ẹre ma wo vbe egbe de ye orukhọ.

¹⁰ Rhunmwuda, a deghẹ ọmwa ne ekhọe ẹre ma wegbe vbe ekpa ẹmwẹ na, miẹn uwẹ, ne ọ mwẹ “irẹnmwi” vbe u rri evbare vbe aro ẹbọ, ẹ i re te ọnii gha rhie ẹtin ne irẹn ya gha rri evbare ẹbọ?

¹¹ Rhunmwuda ọnii nian, ọmwa ne ọ ma wegbe na ne Kristi wu na, ghi khian ne ọ fuẹn uan rhunmwuda “irẹnmwi” ruẹn!

¹² U gha ru vberriọ, te u rukhọ ghe Kristi, vbe ekpa ne u na ru avbe etuẹn khọ, u na rhia iran ekhọe ne ọ ma wo vbe egbe rua.

¹³ A deghẹ evbare sẹtin ya etẹn mwẹ ru orukhọ, mẹ tobọ mwẹ i ghi rri emiowo ẹdẹ, ne I ghẹ ya ya ọtẹn mwẹ ru orukhọ.