I Kọrinti 7 - Edo Bible (E Baibol Ẹdo) Version 1996

Ẹmwẹ Orọnmwẹ

¹ I ra guan yan emwi ne uwa gbẹn ebe ẹre gun mwẹ. Ọ wa maa a deghẹ okpia wẹ rẹn i rhie okhuo.

² Sokpan, ugbẹn vbe a ghi miẹn nian wẹ ẹmwẹ oghẹ tua gbe, ọ kere ne dọmwadẹ okpia gha mwẹ amwẹ, kevbe ne dọmwadẹ okhuo vbe gha mwẹ ọdọ ẹre.

³ Ọ kere ne okpia gha ru emwi ọdọ kevbe ne okhuo vbe gha ru emwi amwẹ, ne iran gba gha ru ne egbe vbe ne iran gha na sẹ egbe ọkẹn.

⁴ Amwẹ ma ghi yan egbe ẹre ọvbehe, sokpan ọdọ ọre ọ yan rẹn, erriọ vbe nọ zẹẹ, ọdọ ma ghi yan egbe ẹre ọvbehe, sokpan amwẹ ọre ọ yan rẹn.

⁵ Wa ghẹ gha ya emwi hin egbe unu, sokpan a ma wẹ wa gba ta ẹe nẹ wẹ ne uwa ru vberriọ la omwa ẹghẹ eso, ne uwa miẹn ehe na na erhunmwu, sokpan wa ghi vbe dọlegbe suẹn gha ru emwi ọdọ vbe amwẹ, ne a ghẹ gie ne ẹ i sẹtin ziengbe ya de ye edanmwẹ e Setan.

⁶ Ẹre te I yi ẹre iyi ne uwa, sokpan zẹ vbe emwi ne a fan obọ ẹre ne ọmwa ne ọ gha ru.

⁷ Vbe ẹmwata, ọ gha te yẹ mwẹ akpawẹ emwa hia wa ye vbene imẹ ye, sokpan dọmwadẹ ọghọe ọre ọ mwẹ emwi ne Osanobua ya wẹẹ, ọghe ọna ughaẹn, ọghe nọkpa ughaẹn.

⁸ Sokpan zẹ vbe ọghe iran ne ọ ma he rhie okhuo ra ne ọ ma he rọnmwẹ ọdọ, kevbe avbe ẹgbẹ, emwi ne I khare ọrọre wẹ, ọ gha wa maa sẹ ne uwẹ ọkpa heko gha rrọọ khian vberriọ zẹ vbene imẹ ye na.

⁹ Sokpan adeghẹ u i ra sẹtin ziengbe, ya rhie okhuo, a rhie okhuo ọre ọ fu egbe sẹ ne a gha rri ororo ba ẹmwẹ emwi ne ọ khọn ọmwa.

¹⁰ Ọghe iran ni rọnmwẹ ọdọ, emwi ne I tama iran, ẹ i re imẹ ọ re ọ ta ẹe sokpan ẹmwẹ Nọyaẹnmwa nọ, wẹ ne okhuo ne ọ rre owa ọdọ ghẹ kpa sẹ ọdọ ẹre rae.

¹¹ A deghẹ ọ ru vberriọ, wẹ ne ọ ghẹ ghi rọnmwẹ ọdọ ọvbehe, ra ne ọ wa ya gu ọdọ ẹre dọlọ kugbe, ọdọ ghe vbe khu amwẹ ọnrẹn.

¹² Ne emwa ni dekẹe, emwi ne I tama iran (ẹmwẹ obọ mwẹ nọ, ẹ i re ọghe Nọyaẹnmwa): ọrọre wẹ, a deghẹ okpia ne ọ yayi mwẹ okhuo ne ọ ma yayi, ighẹ okhuo ni na kue yọ ne iran gba gha rrọọ, wẹ ne ọ ghẹ khuẹe.

¹³ Debare, a deghẹ okhuo ne ọ yayi rọnmwẹ ọdọ ne ọ ma yayi, ighẹ okpia ni kue ne iran gba gha rrọọ, wẹ ne okhuo ni ghẹ sẹ ọe rae.

¹⁴ Rhunmwuda ọdọ ne ọ ma yayi ni ghi do gha re ne Osanobua rhan obọ miẹn rhunmwuda ne a na ku ẹe kugbe ba amwẹ ọnrẹn, amwẹ ne ọ ma yayi ni ghi vbe do gha re ne Osanobua sẹtin rhan obọ miẹn rhunmwuda ne a na ku ẹe gbe ba ọdọ ne ọ yayi. Akpawẹ ẹ i ye vberriọ, te ivbi iran ghẹ gha ye vbe ivbi e ne ọ ma yayi, sokpan vbene ọ ghi ye na, iran khian ne Osanobua sẹtin rhan obọ miẹn.

¹⁵ Vbene ọ rhirhi gha ye hẹ, a deghẹ ne ọ yayi ni ho ne ọ sẹ ne ọ ma yayi rae, gi ẹe ru vberriọ. Ọ gha ye vberriọ, ne ọ re ne ọ yayi vbọ, ọre ne okpia nọ ra ne okhuo, sẹtin zẹ ne a gha ru vbọ, rhunmwuda te Osanobua tie uwa ne uwa gha rrọọ vbe ọfumwegbe.

¹⁶ Vbe uwẹ a ya rẹn hẹ yi, wẹ ne amwẹ ne ọ yayi, ighẹ u i ra sẹtin miẹn ọdafọn fan? Ra wẹ ne ọdọ ne ọ yayi, vbe uwẹ ya rẹn hẹ ighẹ wẹ i ra sẹtin miẹn amwọ ọn fan?

Gha Rrọọ Vbene Osanobua Ya Tie Ruẹ

¹⁷ We ne dọmwadẹ ọghọe gha ru vbene Osanobua ya wẹẹ, kevbe zẹ vbene ọ ye vbe Osanobua tie ẹre. Emwi ne I ma emwa re vbe esọsi hia ọre ọnii khin.

¹⁸ A deghẹ ọmwa ne ọ rhuẹre khuẹnniẹn utiemwẹ Osanobua, wẹ ne ọ ghẹ ya khiẹn ama ne a ya rhuẹ ọre kua. A deghẹ ọmwa ne ọ ma rhuẹ khuẹnniẹn utiemwẹ Osanobua, we ne ọ ghẹ ya rhuẹ.

¹⁹ Rhunmwuda, a rhuẹre ra a ma rhuẹ i mwẹ esa ne ọ khin, emwi ne a kha ọrọre ne a gha họn ẹmwẹ Osanobua.

²⁰ Wẹ ne dọmwadẹ ọghọe gha ye vbe ne ọ ye ẹghẹ ne Osanobua na tie ẹre.

²¹ Ọviẹn ọre u khin vbe Osanobua tie ruẹ ra? Ghẹ vbe gbẹn okhuo, sokpan a deghẹ u miẹn otọ ne u gha ya rhan egbe, lo ẹre.

²² Rhunmwuda, ọviẹn ne Osanobua tie nẹ, nọyan egbe ẹre ghi nọ vbe obọ Nọyaẹnmwa, erriọ vbe nọ zẹẹ, ọmwa ne ọ yan egbe ẹre ne Kristi tie re, ọviẹn ọnrẹn nọ.

²³ Te Osanobua dẹlẹ uwa ha osa, wa ghẹ ye gbe khian ọviẹn ọmwaikọmwa.

²⁴ Etẹn mwẹ, edọmwadẹ ọghọe hẹko gha gu Nọyaẹnmwa rrọọ zẹ vbene ọ ye ẹghẹ ne a na tie ẹre.

Ẹmwẹ Iran Ni I Mwẹ Ọdọ Kevbe Ẹgbẹ

²⁵ Ẹn hẹn, vbe ekpa ẹmwẹ iran ni ma rọnmwẹ ọdọ, Nọyaẹnmwa ma rhie iyi rhọkpa yọ mẹ, sokpan I gha guan ẹmwẹ obọ mwẹ yọ zẹ vbe ọmwa ne a sẹtin rhie ẹmwẹ ọnrẹn, vbe ekpa itohan Nọyaẹnmwa.

²⁶ A gha do ghe ẹko rriaramwẹ ne ọ rrọọ ẹghẹ na, mẹ yayi wẹ okpia hẹ ko ziengbe ye ihe ne ọ ye ọre ọ maa sẹ.

²⁷ A deghẹ u mwẹ amwẹ, ghẹ khu ẹe, a deghẹ u i mwẹ amwẹ, ghẹ vbe gha gualọ okhuo ne u gha rhie.

²⁸ Sokpan a deghẹ u rhie okhuo, u ma ru a i ghẹ ru. A deghẹ okhuo ne ẹ i mwẹ ọdọ vbe rọnmwẹ ọdọ, ọ ma ba emwi ku ru. Sokpan ọ gha te yẹ mwẹ nuẹn akpawẹ te u sẹtin rhie uhunmwu ke ẹmwẹ orhikhan ẹdẹgbegbe ne iran na khian gha ye ladian.

²⁹ Emwi ne I kha ọna khin etẹn mwẹ, ovbi ẹghẹ kherhe ma ghi mwẹ, kevbe ẹghẹ na kpao nian, wa gie emwa ni rhie okhuo gha yin zẹ vbe ọhae.

³⁰ Emwa ni viẹ, zẹ vbe emwa ne ọ ma miẹn akhiẹ, emwa ni giẹ, zẹ vbe emwa ne ẹ i rre uwu ọyẹnmwẹ, emwa ni dẹlẹ emwi, zẹ vbene a miẹn wẹ iran ma yan emwi ne iran dele.

³¹ Emwa ni lo emwi agbọn na, zẹ vbene a miẹn wẹ, iwinna rẹn ma mu iran. Rhunmwuda, agbọn na, zẹ vbene ọ ye na, ẹ i ghi ra kpẹe sẹ ayọ.

³² I gha wẹ ne uwa kannọ ohawa obọ hin egbe rre. Okpia ne ọ re ọhae, ifi iwinna Nọyaẹnmwa ọre ọ muẹn, rhunmwuda, ọ hia ne ọ ru ne ọ yẹ Nọyaẹnmwa.

³³ Sokpan ifi emwi agbọn na ọre ọ mu ne ọ mwẹ amwẹ, rhunmwuda te ọ hia ne ọ ru ne ọ yẹ amwẹ ọnrẹn.

³⁴ Rhunmwuda te a ghi si ẹe vbe obọ eva. Okhuo ne ọ ma rọnmwẹ ọdọ ra uvbi he ọ ma rẹn okpia, ẹmwẹ iwinna Nọyaẹnmwa ọre ọ muẹn, rhunmwuda rẹn ho ne ọ gha re ne ọ ye egbe kevbe orhiọn ga, sokpan okhuo ne ọ mwẹ ọdọ, ifi ẹmwẹ agbọn na ọre ọ muẹn, rhunmwuda, ọ ho ne ọ ru ne ọ yẹ ọdọ ẹre.

³⁵ I ta ẹmwẹ na rhunmwuda, te I ho ne I ye uwa obọ. Ẹ i re te I ho ne I tama uwa ehe ne uwa gha khian sẹ. Sokpan te I ho ne uwa gha ru vbene ọ kere kevbe vbene ọ hẹnhẹn, kevbe ne uwa miẹn ehe na mu egbe ye ẹmwẹ iwinna Nọyaẹnmwa vbene a i na vbe si obọ zẹ.

³⁶ Zẹ vbe ọghe avbe egbakhian ne ọ ma he ho ne iran wa rọnmwẹ egbe, a deghẹ okpia ni ghe ẹre ighẹ rẹn i gu okhuo nii yin ẹse, a deghẹ ọ fifi ẹre egbe gbe, ọ na wẹ ọ te kei ne iran rọnmwẹ egbe, zẹvbe ne ọ rre ẹre ekhọe, a ghẹ ru i rre ọna.

³⁷ Sokpan a deghẹ okpia ọkpa wẹ rẹn i ho ne ọ rhie okhuo, vbe ne a na miẹn wẹ, ẹ i re te a ya obọ yẹn ọnrẹn ẹho tae, a deghẹ ọmwa ne ọ rẹn emwi ne irẹn ru nọ, ighẹ ọ vbe tae nẹ vbe ekhọe ẹre, emwi ne irẹn gha ru, emwi esi ọre ọ ru, a deghẹ ọ ma rhie ọvbokhan okhuo ni rọnmwẹ.

³⁸ Ọmwa ne ọ rhie okhuo ọghọe rọnmwẹ yin ẹse, sokpan ne ọ ma rhie okhuo rọnmwẹ ọre ọ yevbe yin ẹse sẹ.

³⁹ Okhuo ne ọ rre owa ọdọ, ẹ i ghi re ne ọ yan egbe ẹre ugbẹn vbe ọdọ ẹre rre agbọn. Sokpan a deghẹ ọdọ ẹre wu, ọ sẹtin rọnmwẹ okpia ọvbehe ne ọ yẹ ọre. Sokpan, ne ọ ghẹ mwẹ ọ ma gha re orọnmwẹ iyayi.

⁴⁰ Vbene ọ rhirhi gha ye hẹ, ọ hẹko ziengbe ye ihe ne ọ ye, ọ re ọ gha fu ẹre egbe sẹ. Ọghe ekhọe mwẹ ọre I tae ni. Mẹ yayi ighẹ mẹ vbe mwẹ Orhiọn Osanobua.