I Kọrinti 6 - Edo Bible (E Baibol Ẹdo) Version 1996

Etẹn Ni Munọ Egbe Yo Iko

¹ Adeghẹ ọkpa vbe uwu uwa gu ọtẹn ọvbehe muan ẹmwẹ, vbe ekhue ra gi ẹe mu ẹzọ bu avbe enibuohiẹn ni ma yayi hẹ yi? Ẹ i re emwa Osanobua ọre ọ kere ne ọ bu ẹre?

² Wa ma rẹn ighẹ emwa Osanobua ọre ọra bu ohiẹn, agbọn na? Ẹn hẹn, a deghẹ wa ọre ọra bu ohiẹn agbọn na, wa i sẹtin bu ena ighẹ iku ẹmwẹ ra?

³ Wa ma rẹn ighẹ ma ọre ọ khian bu ohiẹn avbe odibosa ra? Inu inu ghi nọ ne emwi agbọn na?

⁴ Adeghẹ ẹmwẹ vberriọ sunu, te uwa ghi ra muẹn bu iran ne ẹ i mwẹ ukpo ne ọ ye vbe esọsi ra ne iran bu ẹre ne uwa?

⁵ Wa gie ekhue gha mu uwa! Ẹ i mwẹ a ma miẹn ọmwa ọkpa ne ọ waan vbe uwu uwa, ne ogha sẹtin bu ohiẹn etẹn eva ni muan ẹmwẹ.

⁶ Ne uwa gha na te ru vberriọ, ọtẹn ọkpa ghi mu ọtẹn ọvbehe ye iko, ne iran ni ma yayi gha bu ohiẹn ni.

⁷ Ne a na miẹn wẹ wa zẹdẹ mu egbe ye iko hiehie rhie maa ighẹ te emwi hia wa kulo gbe uwa. Wa ma rẹn ighẹ a yagha uwa ọre ọ maa sẹ? Wa ma rẹn ighẹ a gbe uwa miẹn uwa emwi ọre ọ maa sẹ?

⁸ Ẹn o, wa tobọ uwa gha yagha egbe, wa tobọ uwa gha gbe egbe miẹn egbe emwi, uhin ya sẹ egbe etẹn uwa ne arẹnegbe.

⁹ Sokpan, wa rẹnrẹn ighẹ Arriọba Osanobua i ra sẹ emwa dan obọ. Wa ghẹ rẹrẹ egbe uwa: Avbe ni gbe alama, iran ni ga ẹbọ, iran ni ghẹẹ, ikpia ni tie ikpia ne ihua iran ovbe.

¹⁰ Iran ni rhaa, iran ni zuan, iran ni da ayọn gbe egbe, iran ni ta ẹrrẹe ọtakhọ, ra iran ni gbe olighi, ne Arriọba Osanobua gha sẹ ọre obọ, ẹ i rrọọ.

¹¹ Erriọ eso vbe uwu uwa te ye, sokpan, akhuẹ uwa hin oru khọ rre nẹ, a ya uwa fi ohan ne Osanobua nẹ, a dọlọ uwa kugbe ba Osanobua vbe ekpa eni Jesu Kristi Nọyaẹnmwa kevbe vbe ekpa Orhiọn Osanobua mwa.

Wa Lo Ikinnegbe Uwa Ne Uyi Osanobua

¹² Orhiọnkpa sẹtin kha wẹ, “I sẹtin ru emwi ne ọ rhirhi khọn mwẹ.” Ẹmwata nọ sokpan ẹ i re emwi hia ọre ọ khẹ kuẹ. Ma sẹtin kha wẹ, “I sẹtin ru emwi ne ọ rhirhi khọn mwẹ.” Sokpan mẹ i ra gie ifi emwi rhọkpa mu mwẹ.

¹³ Ọmwa ọvbehe sẹtin kha wẹẹ, “Ẹko ọ yan evbare, evbare ọ yan ẹko.” Ẹmwata nọ, sokpan Osanobua gha rhie ufomwẹ ye e eva. A ma rhie egbe ne ọmwa ne ọ yagha gbe alama oghẹ, sokpan ne ọ gha ga Nọyaẹnmwa. Nọyaẹnmwa vbe kpehe ne egbe.

¹⁴ Osanobua ne ọ huẹn Nọyaẹnmwa kpao vbe orinmwi, ọ gha vbe ya ẹtin ẹnrẹn huẹn ima kpaegbe.

¹⁵ Wa rẹnrẹn wẹ efẹn ọkpa vbe egbe Kristi ọre uwa khin. Te imẹ ghẹ ghi mu efẹn ọkpa vbe egbe Kristi ne I ya ku ẹe gbe ba egbe igberagia ra, awua!

¹⁶ Ra wa ma rẹn ighẹ ọmwa ne ọ ku egbe ẹre kugbe ba igberagia ighẹ ọ ye egbe ẹre khian ọkpa ba ẹre nẹ? Ebe wa tae sẹsẹsẹ wẹ, “Iran eva ghi do gha re egbe ọkpa.”

¹⁷ Sokpan ọmwa ne ọ ku egbe ẹre gbe ba Nọyaẹnmwa, ghi do gha gu irẹn re ọkpa vbe ekpa ọghe orhiọn.

¹⁸ Wa gha lẹ ne oghẹ, orukhọ ke orukhọ ọvbehe ne ọmwa a rhirhi ru, ẹ i mwẹ emwi ne ọ ru ikinnegbe re, sokpan ọmwa ne ọ ru oghẹ, ikinnegbe ẹre ọre ọ ru khọ.

¹⁹ Wa ma rẹn ighẹ owa Orhiọn Ne Ọ Huanrẹn ọ re egbe uwa khin, Orhiọn Ne Ọ Huanrẹn ne Osanobua rhie ne uwa, ne ọ rre uwu uwa? Wa i ghi re ọghe egbe uwa, ọghe Osanobua ọre uwa khin.

²⁰ Te ọ dẹ uwa ha osa, rhunmwuda ọnii, wa gha lo egbe uwa ne uyi Osanobua.