I Kọrinti 5 - Edo Bible (E Baibol Ẹdo) Version 1996

Oghẹ Ne Ọ Re Uwu Esọsi

¹ I họn ẹmwẹ uyinmwẹ alama oghẹ vbe obọ uwa, egbe ne ohan i gie avbe enigẹbọ danmwẹ ghe, rhunmwuda, a tama mwẹ wẹ arhin ọkpa rhie amwẹ erha ẹe rọnmwẹ.

² De ne uwa ghi tọn egbe mu ba nian? Vbe ẹmwata, te ọ kere ne uwa gha khiẹ, ọmwa ne ọ ru emwi na, ne uwa si ẹe ladian hin uwu ẹbu uwa rre.

³ Zẹ vbe ọghomwẹ, a gha rhe miẹn ighẹ I khian rrei ne uwa vbe ekpa ọghe egbe, sokpan I gu uwa rre evba vbe ekpa ọghe orhiọn, vbe eni Nọyaẹnmwa Jesu, mẹ bu ohiẹn ọmwa na ne ọ ru emwi ne ọ mu ohan vberriọ nẹ, vbene a miẹn wẹ te I gu uwa rre odọ.

⁴ Wa gha do iko, mẹ gha vbe gha rre evba vbe ekpa ọghe orhiọn, vbekpa ẹtin Nọyaẹnmwa Jesu ne ọ gu ima rre evba.

⁵ Wa rhie ọmwa na ne Setan ne a gbe ikinnegbe ẹre uan, ne a miẹn ehe na miẹn orhiọn rẹn fan vbe Ẹdẹ Nọyaẹnmwa.

⁶ Ọ ma kei ne uwa na tọn egbe mu! Wa ma họn vbe a ya ẹe kpa itan wẹ, “Eyist kherhe ọre ọ ya ebrẹd hia hue.”

⁷ Wa rhie eyist ọwiẹyi orukhọ na hi ehe ne uwa ye rre, ne uwa miẹn ehe na huan fo. Ẹghẹ nii, wa ghi do ye vbe ẹlubọ ne a ma he rhie eyist yi, I rẹnrẹn ighẹ egbe emwi vberriọ ọre uwa khin. Rhunmwuda a le evbare Alagberra mwa nẹ nian, ugbẹn vbe a miẹn wẹ, a ya Kristi ne ọre Oteghe Ohuan Alagberra mwa, zọ ese nẹ.

⁸ Wa gie ima do ugie emwi ukpo mwa, sokpan ẹ i re ne a ya ebrẹd ne eyist nẹdẹ ni ye do, eyist orukhọ kevbe alama, sokpan ọghe ebrẹd ne ẹ i mwẹ eyist, ebrẹd uhuanmwẹ kevbe uhunmwu ẹmwẹ.

⁹ Vbe ebe ne I ka gbẹn gie uwa, I tama uwa ne uwa ghẹ gha gu iran ni gbe alama mu obọ.

¹⁰ Ẹ i re iran ni ma yayi, ni gbe alama, ra ni zuan ra ni gbe olighi, ra ni ga ẹbọ, ọre I kha. Wa gha wẹ ne uwa gha lẹ ne iran, ọnii rhie maa ighẹ te uwa ghi ra kpao hin agbọn na rre fẹẹrẹ.

¹¹ Emwi ne i kha ọrọre wẹ, wa gha miẹn ọmwa ne ọ tie egbe ẹre ọtẹn, ne ọ yayi, ọ na gha gbe alama, ọ zuan, ọ ga ẹbọ, ọ ta ọtakhọ, ọ da ayọ gbe egbe, ra ọ gbe olighi, wa ghẹ gu ẹe mu obọ, wa ghẹ kue gu ọmwa vberriọ rri evbare.

¹² Emwi ne ọ khian ọrọre wẹ, ọ ma kan mwẹ kan iran ne ẹ i rre otu mwa ne I gha bu ohiẹn iran.

¹³ Osanobua ọre ọ ra bu ohiẹn iran sokpan wẹ ma rẹn ighẹ ọ kere ne uwa gha hu ohiẹn emwa ne uwa gba rre otu? Zẹ vbene ebe kha re, “Wa yuo ọmwa dan ni hin uwu ẹbu uwa rre.”