I Kọrinti 4 - Edo Bible (E Baibol Ẹdo) Version 1996

Avbe Ukọ Kristi

¹ Wa ghi gha ghe ima zẹ vbe eguọmwadia Kristi ne a viọ ẹmwata ne ọ rre oro Osanobua nẹẹn hẹmwẹ.

² Emwi ọkpa ne a ho vbe obọ ọmwa ne a rhie emwi nẹẹn dayi ọrọre wẹẹ, ne ọ gha re ọmwa ne ọ gie arowa ẹre mu ẹtin yan.

³ Ẹmwẹ ne uwa gha bu ohiẹn mwẹ ma kan mwẹ. Mẹ tobọ mwẹ i vbe bu ohiẹn egbe mwẹ.

⁴ Ekhọe mwẹ i gun mwẹ gui, sokpan, ọnii ma rhie maa ighẹ I i mwẹ orukhọ. Nọyaẹnmwa ọrọre ọmwa ne ọ bu ohiẹn mwẹ.

⁵ Rhunmwuda ọnii, wa ghẹ gha bu ohiẹn ọmwarhọkpa ọ te do sẹ ẹghẹ ne ọ kei yi. Wa sẹ ibuohiẹn ne okiekie rae khẹ ẹghẹ ne Nọyaẹnmwa gha na rre, rẹn ọre ọra we dọmwadẹ ọghọe uhe ua, ọ ghi ta iro ne ọmwa do zẹ vbe ekhọe ẹre ladian. Ẹghẹ ni ọre Osanobua gha na tian dọmwadẹ ọghọe vbene ọ ke gie ẹe.

⁶ Rhunmwuda uwa, etẹn mwẹ, ẹmwẹ Apọlọs kevbe egbe mwẹ ọre I ta na. Te I ya egbe mwa ru igiemwi ne uwa miẹn ehe na rẹn emwi ne a ya ẹmwẹ na kha wẹẹ, “Wa gha ru vbene a yi ẹre iyi.” Ọmwa rhọkpa vbe uwu uwa ghẹ gha ya ọmwa ọkpa ghagha, ne ọ gha zan ọmwa ọvbehe.

⁷ Gha ọ tama ruẹn yi ighẹ u maa sẹ emwa ọvbehe? Ẹre Osanobua ọre ọ viọ emwi ne u mwẹ hia nuẹn? A deghẹ erriọ nọ, de ne a ghi ghagha baa vbọ, vbene a miẹn wẹẹ ẹ i re te a ya ẹe ru ọmwa ẹse.

⁸ Wanwanna nian, emwi ne uwa ho hia sẹ uwa obọ nẹ. Wa hia fe nẹ nian, wa hia wa rri ọba, vberriọ, ma i re ọre. Ẹmwata, ọ gha te yẹ mwẹ ghe akpawẹ wa gele rri ọba, ma ghẹ ghi gu uwa rrie nene ọba.

⁹ Rhunmwuda, ọ yẹ mwẹ vbene a miẹn wẹẹ, ma ne ukọ ọre Osanobua hẹ ke odieke zẹ vbe emwa ne a wẹ ne a ya gbele ua ye ada, ne agbọn vbe ẹrinmwi miẹn gha ghe.

¹⁰ Ma khian akpa rhunmwuda Kristi, sokpan wa hia khian umẹwaẹn vbe uwu Kristi! Ma khian ne ọ maa wo vbe egbe, sokpan wa wo vbe egbe! A tila ima an, sokpan, a ya ọghọ ne uwa.

¹¹ Do sẹ wanwanna, ma ya ohanmwẹ kevbe ohanmwẹ amẹ gbe egbe, ma silo osọnmwẹ ukpọn ye egbe, a gba ima, ma zozo la ehe hia.

¹² Ma kakabọ winna ne ima ya gha gaga egbe mwa. A gha rhovbiẹ ima, ma ghi gha na erhunmwu, a gha kpokpo mwa, ma ghi zin egbe.

¹³ A gha talọ ku ima, ma ghi gha ya ẹmwẹ rọkhọrọkhọ wan nien ẹmwẹ. Ma ye vbe iku ne ọ kẹkẹ ẹe nẹ, ne a kpolo ku otiku vbe agbọn, ma ọrọre ekherhe agbọn na do sẹ banbanna.

¹⁴ Ẹ i re wẹ te I ho ne ekhue mu uwa ọre I na gbẹn ebe vbe nian gie uwa, te I ru ẹe ne I ya bu uwa ude zẹ vbe ivbi mwẹ ni ghan mẹ.

¹⁵ Rhunmwuda, ogha khọn uwa ne uwa gha mwẹ emamwaemwi arriaisẹn igbe vbe ẹdẹ agbọn uwa vbe uwu Kristi, erha ọkpa kẹkan ọre uwa mwẹ. Rhunmwuda, zẹ vbe ẹdẹ agbọn uwa vbe uwu Kristi, mẹ ọrọre erha uwa rhunmwuda ighẹ mẹ ọre ọ rhie nene Iyẹn Ne ọ maa bu uwa gha dee.

¹⁶ Rhunmwuda ọnii, wa lahọ, wa gha ghe mwẹ ru emwi.

¹⁷ Rhunmwuda ọnii ọre I ra na gie Timoti bu uwa gha dee. Ọmọ ne ọ ghan kevbe ne ọ gie a mu ẹtin yan, ọre ọ khin mwẹ re vbe uwu Nọyaẹnmwa. Ọ gha ma uwa owẹ ne I vin ne I ru emwi lele vbe ẹdẹ agbọn mwẹ vbe uwu Kristi Jesu, ne I vbe ma emwa re vbe esọsi hia vbe ehe hia.

¹⁸ Eso vbe uwu uwa tọn egbe mu, iran ro wẹ I i ghi dee do miẹn uwa ro.

¹⁹ Vbene ọ rhirhi gha ye hẹ, a deghẹ Nọyaẹnmwa ho ro, I gha rherhe do miẹn uwa aro ban. Ẹghẹ ni ọre I gha na miẹn emwi ne iran ni tọn egbe mu na gha sẹtin ru, i ghẹ ẹ i re ẹmwẹ ne iran gha sẹtin ta ọre a kha.

²⁰ Rhunmwuda Arriọba Osanobua ẹ i re ọghe ogbetalọ, sokpan ọghe ẹtin nọ.

²¹ De ne ọ yẹ uwa sẹẹ, vbọ? Ne I rhie asan bu uwa gha dee ra ne I gha dee vbe ọghọ kevbe ute?