I Kọrinti 3 - Edo Bible (E Baibol Ẹdo) Version 1996

Eguọmwadia Osanobua

¹ Ne a ta ẹmwata, etẹn mwẹ, I ma he gu uwa guan zẹ vbene I ya gu iran ni mwẹ nene orhiọn ne ọ huanrẹn nẹ guan. Vbene I ya gha gu emwa kẹkan ọghe agbọn na guan, ọre I ya gha gu uwa guan zẹ vbe ibiẹka vbe iyayi.

² I vbe ya ewẹn gha koko uwa rhunmwuda wa ma he sẹ ne ọ rri evbare ne ọ wo vbe egbe. Do sẹ wanwanna, wa ma he sẹ.

³ Rhunmwuda emwi agbọn na he wa ye gu uwa obọ ro. Ugbẹn vbe a miẹn wẹ, wa ye gbe ọvo egbe, wa gu egbe gui, ẹ i re te ọnii rhie maa ighẹ emwa kẹkan ọ ghe agbọn na ọre uwa he ye khin, wa keghi wa yin zẹ vbene iran guẹe.

⁴ Ugbẹn vbe eso vbe uwu uwa sẹtin kha wẹẹ, “Otu e Pọl mẹ ye,” nọkpa vbe wẹẹ, “Otu Apọlọs mẹ ye,” ẹ i re te uwa ye ru vbene emwa ne agbọn kẹkan ru vberriọ.

⁵ A deghẹ erriọ nọ, gha ọre Pọl yi? Gha ọre Apọlọs? Eguọmwadia kẹkan ọghe Osanobua ọre ima khin ne ọ ya uwa do yayi. Iwinna ne Osanobua wa ne dọmwadẹ ọghọe ọre ọ winnaẹn.

⁶ Me kọ emwiokọ, Apọlọs keghi gbe amẹ khakhae. Sokpan Osanobua ọre ọ ru ẹe ne ọ na zọọ.

⁷ Ke ne ọ kọe, kevbe ne ọ ghe amẹ khakhae ẹ i mobọ mwẹ esa, Osanobua ọrọre ne a kha, rhunmwuda rẹn ọre ọ ru ẹe ne emwiokọ na zọọ.

⁸ Alughaẹn ẹ i rrọọ ne nọ kọe kevbe ne ọ gbe amẹ khakhae. Osanobua gha san dọmwadẹ ọghọe ẹse zẹ vbe ne ọ winnaẹn.

⁹ Rhunmwuda otu ne ima gba winna ne Osanobua ma khin. Wa ọrọre ugbo Osanobua. Owa ne Osanobua bọ ẹe ọre uwa khin.

¹⁰ Vbe uwu ne I na lo emwi ne Osanobua ya we mwẹ, I keghi bọ owa zẹ vbe ọmwa ne ọ rẹn iwinna ẹsẹse. I keghi gbe ẹyotọ. Ọmwa ọvbehe ọre ọ ghi ra do mu yan rẹn. Sokpan dọmwadẹ ọghọe ghi ye egbe ẹro vbene ọ họ ẹe hẹ.

¹¹ Rhunmwuda Osanobua ya Jesu Kristi ru ẹyotọ ẹre nẹ, a i ghi vbe gbe ẹyotọ ọvbehe yan ọnii.

¹² Eso gha ya igoru ra oze ra okuta ighobioye mu yan ẹyotọ nii, eso gha ye erhan, irunmwu ra ohunhun bọ yan rẹn.

¹³ A gha rẹn vbene iwinna edọmwadẹ ọghọe ye hẹ vbe Ẹdẹ Kristi, ẹdẹ ne ọ gha we ehia uhe ua. Rhunmwuda, erhẹn ne Ẹdẹrriọ gha rhie iwinna edọmwadẹ ọghọe maa, erhẹn gha danmwẹ ọẹn ghe, ne a miẹn ehe na rẹn vbene ọ ye hẹẹ.

¹⁴ A deghẹ emwi ne ọmwa bọ yan rẹn miẹn uhunmwu vbe obọ erhẹn ni, a ghi san rẹn ẹse.

¹⁵ Sokpan iwinna ne ọmwaikọmwa winnaẹn gha giẹn uan, iwinna rẹn la ọ rhiae rrie, sokpan rẹn tobọ ẹre gha miẹn uhunmwu, vbe ne a miẹn wẹ te ọ ya uhunmwu ha erhẹn ladian.

¹⁶ Vbe ne ẹmwata, wa rẹnrẹn ighẹ, Ọgua Osa ọre uwa khin, kevbe wẹ, Orhiọn Osanobua di uwu uwa ya.

¹⁷ Rhunmwuda ọnii, ọmwaikọmwa ne ọ mu owa Osanobua rhia, Osanobua gha vbe mu ẹn rhia. Rhunmwuda emwi ne ọ huanrẹn ọre owa Osanobua khin, owa ẹre ọre uwa tobọ uwa khin.

¹⁸ Ọmwa rhọkpa ghẹ rẹrẹ egbe. Deghẹ a miẹn ọmwa ọkpa vbe uwu uwa ne ọka egbe ẹre ye umẹwaẹn, zẹ vbene emwa ne agbọn ya kha ighẹ ọmwa wan, wẹ ne ọ heko khian akpa, ne ọ miẹn ehe na do gha wan vbe ẹmwata.

¹⁹ Rhunmwuda, emwi ne emwa ne agbọn tie ẹre emwi ẹwaẹn, ukọnmwẹ nọ vbe aro Osanobua. Zẹ vbene ebe ta ẹe, “Uwu iguemwi ne iran gu ẹe, ọre Osanobua na khuẹn ifi mu avbe umẹwaẹn.”

²⁰ Ebe vbe ta ẹe vbe ihe ọvbehe wẹẹ, “Nọyaẹnmwa rẹnrẹn wẹ iro ekhọe avbe umẹwaẹn akuọkan nọ.”

²¹ Rhunmwuda ọnii, we ne ọmwa rhọkpa ghẹ ya emwi ne emwa ne agbọn sẹtin ru rhuọ: Vbe ẹmwata, wa ọre ọ yan emwi hia.

²² E Pọl, Apọlọs, e Pita, agbọn na, uwu, ẹfe ẹghẹ ne a ye na, ẹghẹ ne ọ dee, wa ọre ọ yan ehia.

²³ Ọghe Kristi wa khin, ọghe Osanobua ọre Kristi khin.