I Kọrinti 16 - Edo Bible (E Baibol Ẹdo) Version 1996

Ọhẹ Ne A Zẹ Gie Emwa Ne Agba Re Iyayi

¹ Vbe ekpa igho ne a wẹ ne a zẹ ya ru iyobọ gie emwa Osanobua ni rre Judia, wa ghi vbe ru vbe ne I wẹ ne avbe esọsi ni rre Galatia ru.

² Vbe ikpedẹ ne okaro ọghe uzọla hia, dọmwadẹ ọghọe ghi fian igho rhie ye otọ zẹ vbene igho ne ọ khuaẹn vbe sẹ, ne a ya ẹe gbakhua hin, a i rẹn vbe I gha rre, ne a ghẹ ghi vbe gha gbẹn okhuo igho ne a koko.

³ I gha ghi rre, I ghi gbẹn egbe rhie ne emwa ne uwa ho, ne iran rhie emwi ihaoko uwa gha rrie Jerusalẹm.

⁴ I gha ghe ẹre ighẹ, ọ vbe kei ne imẹ yo, iran ghi lele mwẹ gha khian.

Emwamwa E Pọl

⁵ I gha rrie odọghe uwa vbe I a ghi la Masidonia fo nẹ, rhunmwuda odẹ Masidonia ọre I ra la.

⁶ Ọ gha kẹe I gha kpẹe vbe ehe ne uwa ye kherhe, u gha ghe, la ẹghẹ okhuakhua fo, ẹkpo nii i wa ghi yọ mwẹ obọ ne I ya gha rrie ehe ne I rhirhi gha rrie vbe I a ghi ke evba kpao.

⁷ Rhunmwuda, I ma ho ne a miẹn wẹ, te I do van tuẹ uwa vbe I a gha gberra. I ho ne I wa kpẹe vbe ehe ne uwa ye deghẹ Nọyaẹnmwa ho ro.

⁸ I ho ne I gha rre Ẹfisọs rhinrin ya sẹ ẹdẹ Pẹntikọst.

⁹ Otọ wa rrọọ ẹsẹse vbe emwa, ne ọmwa gha na winna iwinna nọkhua kevbe ne aro rhie re, a gha rhe miẹn wẹ osuan wa bun vbọ ẹsẹse.

¹⁰ Deghẹ Timoti do van odọghe uwa, vbene ọ rhirhi gha ye hẹ, wa ghẹ mwẹ wa ma mu ẹre aro ze vbe ehe ne uwa ye, rhunmwuda vbene imẹ winna ne Nọyaẹnmwa ọre irẹn vbe winna.

¹¹ Ọmwa rhọkpa ghẹ ye aro gbe ẹe re, sokpan wa ghi ru iyobọ nẹẹn ne ọ ya si okhian rẹn vbe ọfumwegbe, ne ọ miẹn ehe na dọlegbe bu mwẹ gha dee. Rhunmwuda, te I rhie aro ye odẹ gha khẹ ne irẹn vbe avbe etẹn ne ikpia werriegbe rre.

¹² Ẹn hẹn, vbe ekpa ọghe ọtẹn mwẹ ighẹ Apọlọs, ọ kpẹre ne I kegha kpikpi ẹe ne irẹn vbe etẹn nekpa do tuẹ uwa, sokpan, ọ ma he mu ẹre ekhọe ne ọ rre vbe ẹghẹ na, vbene ọ rhirhi gha ye hẹ, ọ gha miẹn obọ, ọ gha rre.

Ẹmwẹ Okiekie

¹³ Wa khẹ ye egbe, wa mudia gbain vbe uwu iyayi na, wa din, wa vbe wegbe.

¹⁴ Wa gha ye aho ẹmwẹ ọmwa winna iwinna uwa hia.

¹⁵ Wa rẹn Stefanas kevbe ẹgbẹe ọre, iran ọre emwa ni ka gha yayi vbe Gris, iran keghi wa mu egbe ye ẹmwẹ ne a gha ga emwa Osanobua. Wa lahọ etẹn mwẹ,

¹⁶ wa gha lele igiemwi emwa vberriọ deba emwa ọvbehe ni vbe deba iran winna ne iran na vbe ga.

¹⁷ Urremwẹ Stefanas, Fọtunatọs, kevbe Akaikọs wa ye ẹko rhiẹnrhiẹn mwẹ, iran ọre ọ ghi di ehe ne uwa kpao sẹrae ya.

¹⁸ Iran ọre ọ ghi gha ya egbe rhorho mwẹ zẹ vbene iran vbe gha ya egbe rhorho uwa. Emwa vberriọ wa ke ne a rẹn ẹsẹse.

¹⁹ Avbe esọsi ni rre Esia wẹ uwa do, Akuila kevbe Priskila deba esọsi ne ọ ru ugamwẹ vbe owa iran, kakabọ gie otuẹ uwa ọghe Ne ọ yayi.

²⁰ Etẹn hia ni rre edinran we uwa do. Wa ye isoso unu etẹn tuẹ egbe uwa.

²¹ Obọ mwẹ ọre I ya gbẹn ọna: Pọl we uwa do.

²² Ọmwaikọmwa ne ọ ma ho ẹmwẹ Nọyaẹnmwa, gha dee! Maranatha — Nọyaẹnmwa, rre!

²³ Te ẹsọhẹ Nọyaẹnmwa Jesu gha deba uwa gha rrọọ.

²⁴ Te aho ẹmwẹ ọmwa gha deba uwa hia gha rrọọ vbe uwu Kristi Jesu.