I Kọrinti 12 - Edo Bible (E Baibol Ẹdo) Version 1996

Emwi Ne Orhiọn Ne Ọ Huanrẹn Ya We Ọmwa

¹ Vbe ekpa ẹmwẹ emwi ne Orhiọn Ne Ọ Huanrẹn ya we ọmwa, I ho ne uwa rẹn uhunmwu ẹmwẹ ne ọ rrọọ etẹn mwẹ.

² Wa rẹnrẹn wẹ, ẹghẹ ne uwa na gha re emwa ni ga ẹbọ kẹkan, avbe amazẹ ọre ọ gha ye uwa ru enegbe iran, iran na vbe gha ye uwa ba odẹ ku vbe ẹghẹ hia.

³ Ọ kere ne uwa rẹn khekherriọ wẹ, a i miẹn ọmwa ne Orhiọn Osanobua lo ne ọ gha sẹtin kha wẹ, “Emwi ọ gha rruan Jesu.” A i vbe miẹn ọmwa ne ọ gha sẹtin miẹn kue wẹ, “Jesu ọrọre Nọyaẹnmwa,” a deghẹ ẹ i re Orhiọn Ne Ọ Huanrẹn ọre ọ dia ẹre.

⁴ Emwi Orhiọn ne a ya wẹ ọmwa ughughan ọre ọ rrọọ, sokpan Orhiọn Osanobua ọkpa nii ọre ọ ya ẹe we ọmwa.

⁵ Odẹ ne a la ga ughughan ọre ọ rrọọ, sokpan Nọyaẹnmwa ọkpa ọre a yae ga.

⁶ Ẹrhiọn ne a ya winna ughughan ọre ọ rrọọ, sokpan Osanobua ọkpa nii ọre ọ rhie ẹrhiọn iwinna ne ọmwa ya winna iwinna hia.

⁷ A ghi gie Orhiọn nii gha zẹ edunna ladian vbe egbe emwa eso, ne ẹwerẹ emwa hia.

⁸ Orhiọn ni ghi ya ẹmwẹ ẹwaẹn ne a guan we arhin ọkpa, vbe ne Orhiọn nii na vbe ya ẹmwẹ irẹnmwi we ọmwa ọvbehe.

⁹ Orhiọn ọkpa nii ọre ọ ya amuẹntinyan we emwa eso, vbene ọ na vbe ya ẹtin ne a ya mu ọmwa egbe rran we ọmwa ọvbehe.

¹⁰ Orhiọn ọkpa nii ọre ọ rhie ẹtin ne a ya winna iwinna ọyunnuan ne emwa eso, ne ọmwa ọvbehe, ẹwaẹn ne a ya rẹn emwi ne a ya we ọmwa ne ọ ke ọghe Orhiọn rre, kevbe ne ọ ma ke ọe rre.

¹¹ Ọ rhie ẹtin ne a ya ye urhu ne a ma rẹn guan ne emwa eso, ọ kevbe rhie ẹtin ne a ya zẹ edu urhu ne a ma rẹn na ne emwa eso. Sokpan Orhiọn ọkpa nii ọ re ọ ru avbe emwi na hia, ọ ghi ya emwi ughughan we dọmwadẹ ọghọe zẹ vbe ne ọ yẹ ọre.

Egbe Ọkpa Ne Ọ Mwẹ Ina Ughughan

¹² Rhunmwuda te Kristi ye vbe egbe ọkpa ne ọ mwẹ ina ughughan, egbe ọkpa ye nọ, a gha rhe miẹn ighẹ ina ughughan ọ re ọ rrọọ.

¹³ Erriọ ọre ọ ye ne ima hia, e Ju kevbe ne ẹ i re Ju, eviẹn kevbe ne ẹ i re eviẹn, a sa amẹ ne ima ye uwu egbe ọkpa nii nẹ vbe ekpa Orhiọn ọkpa nii, a keghi vbe rhie Orhiọn ọkpa nii ne ima hia wọn vbọ.

¹⁴ Rhunmwuda ẹ i re ina ọkpa kẹkan ọre egbe mwẹ, sokpan ni bun ọre nọ.

¹⁵ A deghẹ te owẹ kha re wẹ, “Rhunmwuda ighẹ mẹ i re obọ, mẹ i re ọkpa vbe ina ni rre egbe.” Ọ ni ma rhie maa ighẹ ẹ i gele re ina egbe.

¹⁶ A deghẹ te ehọ vbe kha wẹ, “Rhunmwuda ighẹ mẹ i re aro, mẹ i re efẹn ọkpa vbe egbe,” ọnii ma rhie maa ighẹ, ẹ i gele re efẹn ọkpa vbe egbe.

¹⁷ Akpawẹ ikinnegbe ima hia ighẹ aro wa nọ, de emwi ne ima ghẹ ghi ya gha họn ẹmwẹ yi? Akpawẹ ehọ wa nọ, vbe a ghẹ ghi ya gha họn ẹwia hẹ?

¹⁸ Sokpan vbene ọ ye na, Osanobua viọ ina egbe ye egbe, zẹ vbene ọ yẹ ọre.

¹⁹ Akpawẹ ina ọkpa ọre ikinnegbe khin, ẹ i ghẹ gha re egbe.

²⁰ Sokpan vbene ọ ye na, ina bun sokpan egbe ọkpa nọ.

²¹ Rhunmwuda ọnii, aro i sẹtin khama obọ wẹẹ, “I i mwẹ emwi ne I ya a ru.” Ra ne uhunmwu tama owẹ wẹẹ, “I i mwẹ emwi ne I ya ru.”

²² Vberriọ, a gha wẹ ne a viọ ehe ne ọ yevbe ne ẹ i mwẹ esa vbe egbe mwa kua, egbe mwa i guae, avbe ehe ne ima ro ighẹ ẹ i mwẹ esa ni, ọre a mu aro ye ẹmwẹ ọnrẹn sẹẹ.

²³ A vbe ehe ne ima ro ni wẹ iran mobọ mwẹ esa ne iran ye, ọre ima mu tetete.

²⁴ Avbe ehe ne a wẹ ẹ i mobọ mose vbọ, ọre a mu aro ye ẹmwẹ ọnrẹn sẹẹ, vbene ehe ne ọ mose vbe egbe ima i na mwẹ emwi ne ọ yae ru, Osanobua tobọ ẹre keghi viọ egbe ima kugbe vbene a gha na miẹn wẹ, a vbe ehe ne ẹ i mwẹ uyi vbọ nii, ọre a gha rhie uyi na.

²⁵ Rhunmwuda onii, iwannegbe i rre egbe, sokpan dọmwadẹ ina ughughan ni rrọọ, ọ re ọ zẹ ye ẹmwẹ enekpa?

²⁶ A deghẹ efẹn ọkpa vbe egbe miẹn obalọ, ehe ni dekẹe hia ghi guee miẹn obalọ nii, a deghẹ a vbe tian ọkpa vbọ, ni dekẹe hia ghi gu ẹe ghọghọ.

²⁷ Rhunmwuda ọnii, egbe Kristi ọre uwa hia khin, orhiọn ọkpọkpa keghi vbe re efẹn ọkpa vbọ.

²⁸ Rhunmwuda ọnii khekherriọ, te Osanobua rhie ihe edọmwadẹ ọghọe nẹẹn vbe uwu esọsi, okaro avbe ukọ, vbe ukpo ne ogieva, avbe akhasẹ, vbe ukpo ne ogieha avbe ọmamwaemwi, vbe iyeke ọnii, iran ni winna iwinna ọyunnuan, iran ne a rhie ẹtin ne a ya sinmwi ọmwa na ghi lele ẹe, ra iran ni ye emwa ọvbehe obọ, ra ne ọ dia iran ye odẹ, ra ne iran gha ye urhu ne a ma rẹn guan.

²⁹ Ẹ i re ehia ọre ọ wa re ukọ ra akhasẹ ra ọmamwaemwi, ẹ i re ehia ọre ọ wa sẹtin winna iwinna ọyunnuan.

³⁰ Ra ne a ya gha sinmwi emwa, ra ne a gha ya urhu ne a ma rẹn guan, ra ne a gha zẹ edu emwi ne a ya avbe urhu na kha.

³¹ Rhunmwuda ọnii, wa mu aro ye ẹmwẹ emwi ne a ya we ọmwa ne ọ re emwi kpataki ne ọ sẹre. Vbene ọ rhirhi a gha ye hẹ, ne ọ ma sẹ vbe uwu ehia ọre ọna khin.