I Kọrinti 11 - Edo Bible (E Baibol Ẹdo) Version 1996

¹ Rhunmwuda ọnii, wa gha ru emwi khọ mwẹ zẹ vbene imẹ ru emwi khọ Kristi.

Ẹmwẹ Ne A Mu Gue Uhunmwu Vbe Ẹghẹ Ugamwẹ

² I tian uwa rhunmwuda ne uwa na ye mwẹ rre vbe ẹghẹ hia, ne uwa na vbe ru vbene I ma uwa ẹre.

³ Sokpan I ho ne uwa rẹn wẹ, Kristi kpọlọ sẹ emwa hia fẹẹrẹ, ọdọ ọre ọ kpọlọ sẹ amwẹ ọnrẹn, Osanobua keghi vbe sẹ Kristi.

⁴ Rhunmwuda ọnii, okpia ne ọ na erhunmwu ra ne ọ kpe orhu Osanobua vbe uwu ẹbu ugamwẹ, ọ na rhie emwi gue uhunmwu ẹnrẹn, te ọ yagha e Kristi.

⁵ Erriọ vbe nọ, okhuo ne ọ na erhunmwu ra te ọ kpe orhu Osanobua vbe uwu ẹbu ugamwẹ, vbe ne ọ ma na rhie emwi gue uhunmwu ẹnrẹn, te ọ fa ọdọ ẹre ua, alughaẹn izẹdẹ rrọọ ne irẹn kevbe okhuo ne a khiokhio ẹre eto.

⁶ A deghẹ okhuo ma gue uhunmwu ẹnrẹn, ọ sẹtin wa gbẹn eto ẹre khekherriọ. Vbene a ghi na miẹn wẹ, emwi ekhue nọ ne okhuo gbẹn eto, ra ne ọ khiokhio eto ẹre mu otọ, wẹ ne ọ gha gue uhunmwu ẹnrẹn khekherriọ.

⁷ Okpia i re ne ọ gha gue uhunmwu ẹnrẹn, akpa ọghe ama kevbe uyi Osanobua ọre irẹn khin. Sokpan akpa ọghe uyi okpia ọre okhuo khin.

⁸ Rhunmwuda, ẹ i re okpia ọre a yi ke egbe okhuo ladian, sokpan uwu okpia ọre a ke yi okhuo ladian.

⁹ Erriọ vbe nọ, a ma rhunmwuda okhuo yi okpia, sokpan rhunmwuda okpia ọre a na yi okhuo.

¹⁰ Rhunmwuda iran ne a vbe odibosa khekherriọ, ọ kere ne okhuo gua gue uhunmwu ẹnrẹn, ne ọ miẹn ehe na rhie maa wẹ ototọ asẹ ọdọ ẹre ọre irẹn ye.

¹¹ Vbene ọ rhirhi gha ye hẹ, zẹ vbe uyinmwẹ ima ni rre uwu Nọyaẹnmwa, okhi. i re ne ẹ i rre ototọ okpia, okpia i vbe re ne ẹ i rre ototọ okhuo.

¹² Rhunmwuda, zẹ vbene a yi okhuo ke egbe okpia rre, erriọ ọre okhuo vbe biẹ okpia, obọ Osanobua ọre emwi hia ke rre.

¹³ Wa tobọ uwa roro ẹe, ọ kere ne okhuo gha na erhunmwu ghe Osanobua vbe uwu ẹbu ugamwẹ vbe ne ọ ma na rhie emwi rhọkpa gue uhunmwu ra?

¹⁴ Wa ghe ẹre, uyinmwẹ tobọ ẹre wa rhie maa uwa wẹ emwi ekhue ọre eto ne ọ taẹn khin okpia re.

¹⁵ Sokpan emwi uzọmọ ọre ọ khin okhuo re. Te a rhie eto ne ọ taẹn nẹẹn ne ọ ya gha gue.

¹⁶ Sokpan, a deghẹ ọmwaikọmwa ghi wẹ rẹn ra gha gbe agbanmwẹ ha ọnii, emwi ọkpa ne I ra miẹn ta yọ ọrọre wẹ, ima kevbe avbe esọsi Osanobua, ne ọ mwẹ ilele ọvbehe ne a ya ru ugamwẹ, ẹ i rrọọ.

Evbare Ota Nọyaẹnmwa

¹⁷ Vbe igiodẹ ne I ra ru ne uwan na, I ma tian uwa hiehie, rhunmwuda esọsi ne uwa do i dọlọ emwi yi, te ọ rhia ua.

¹⁸ Vbe ne okaro, a tama mwẹ wẹ otu ni gu egbe suan rre uwu esọsi uwa, I keghi vbe yayi vbe obọ ọkpa ighẹ ẹmwata nọ.

¹⁹ (Vbe ne a i na gbe awẹawẹ, ẹ i mwẹ iwannegbe ma gha rre ẹkpo uwa ne iran ni ru emwi esi miẹn ehe na wa gia rẹn taara.)

²⁰ Wa gha do si egbe koko zẹ vbe otu, ẹ i re evbare ota Nọyaẹnmwa wa do gha re.

²¹ Rhunmwuda, wa gha rri evbare, dọmwadẹ ọghọe ghi wa deyan evbare ọghọe gha re, sẹrriọ wẹ, ehe ne ohanmwẹ na gbe eso, ayọn ghi gha gbe eso.

²² Wa i mwẹ owa obọ uwa ra, ehe ne uwa gha na gha re, ne uwa vbe gha daa? Ra te uwa zan esọsi Osanobua ne uwa vbe gha fa iran ne ẹ i mwẹ ruan? Vbe uwa we ne I gie uwa guan hẹ vbe emwi na yi? Ne I gha tian uwa ra? Hiehiere, I i zẹdẹ tian uwa.

²³ Rhunmwuda, obọ Nọyaẹnmwa ọre I na miẹn emwi ne I ma uwa re, wẹ, Nọyaẹnmwa Jesu, vbe asọn ne a rhie ẹre maa, ọ rhie ebrẹd.

²⁴ Ọ kpọnmwẹ Osanobua, ọ fiaẹn, ọ keghi kha wẹẹ, “Ọnọna ọrọre egbe mwẹ ne uwa. Wa gha ru ọna ya ye mwẹ rre.”

²⁵ Erriọ vbe nọ zẹẹ, vbe iyeke evbare ota, ọ rhie ukpu, ọ keghi wẹẹ, “Ukpu na ọrọre ile ọgbọn ọghe Osanobua ne a ya esagiẹn mwẹ yi ẹre okhi. Ẹghẹikẹghẹ ne uwa a rhirhi ya wọn ẹn, wa gha ru ẹe ya ye mwẹ rre.”

²⁶ Rhunmwuda ẹghẹikẹghẹ ne uwa a rhirhi ya rri ebrẹd na, wa na vbe wọn vbe ukpu na rhinrin Nọyaẹnmwa te do rre, uwu ẹre ọre uwa rhie wewe.

²⁷ Ọnii rhie maa khekherriọ wẹ, a deghẹ ọmwaikọmwa re vbe ebrẹd Nọyaẹnmwa, ọ na vbe wọn vbe uwu ukpu ẹre, vbe odẹ ne ọ ma kei, ọ rri abe orukhọ ne ọ ru ghe egbe kevbe esagiẹn Nọyaẹnmwa.

²⁸ Rhunmwuda ọnii, ọ kere ne dọmwadẹ ọghọe gualọ otọ egbe ẹre nẹ, ọ ke do rri ebrẹd nii, ne ọ vbe da vbe ukpu nii.

²⁹ Rhunmwuda, a deghẹ ọ ma rẹn otọe emwi ne a ya egbe Nọyaẹnmwa kha vbe ọ gha rri ebrẹd nii, ọ na vbe da vbe uwu ukpu nii, te ọ we ne Osanobua bu ohiẹn gbe ẹe vbe ọ gha rri ọe kevbe ọ gha da ẹe.

³⁰ Ọnii ọ re ọ si ẹe ne ni bun vbe uwu uwa na khuọnmwi, ni bun huẹhuẹ, eso kevbe wulo.

³¹ Deghẹ ma ka gualọ otọ egbe ima ghe nẹ, ma i ghi gie Osanobua bu ohiẹn gbe ima.

³² Sokpan te Nọyaẹnmwa bu ohiẹn ima, ọ ghi vbe rri ima oya ne a ghẹ miẹn ehe na bu abe uwu gbe ima, deba emwa ne agbọn.

³³ Rhunmwuda ọnii, etẹn mwẹ, wa gha si koko ighẹ wa ra rri evbare Nọyaẹnmwa, wa gha mudia khẹ egbe.

³⁴ Deghẹ ne ohanmwẹ gbe rrọọ, wẹ ne ọ rri evbare vbe owa ẹre ne uwa ghẹ miẹn ehe na gha de ye irria ikhi Osanobua, vbe ekpa ne ọ ghi do kẹe, I gha guan yọ vbe i a rre.