I Kọrinti 10 - Edo Bible (E Baibol Ẹdo) Version 1996

Ne A Mwẹ Ẹwaẹn Vbe Egbe Ẹbọ

¹ Etẹn mwẹ, I ho ne I ye uwa emwi ne ọ sunu vbe egbe avbe erha mwa odede ni lele Mosis khian rre. Okuku mu aghọnghọn gue iran, iran keghi vbe fian Okun Ne Ọ Baa rraa hẹnnẹdẹn.

² A keghi sa amẹ ne iran hia vbe uwu okuku kevbe uwu okun zẹ vbe emwa ni lele Mosis khian.

³ Iran rri evbare orhiọn ọkpa nii.

⁴ Iran hia keghi vbe wọn amẹ orhiọn ọkpa nii, rhunmwuda, uwu okuta orhiọn nii ne ọ lele iran gha khian, ọre iran hia na wọn, okuta nii keghi re Kristi tobọ ẹre.

⁵ Uhin ighẹ ọ rhe ye rriọ, ẹko iran hia ma rhiẹnrhiẹn Osanobua rhunmwuda ọnii ọ keghi zagha ikun iran lele uwu ato hia.

⁶ Igie emwi ọre a ye avbe emwi na hia rhie ne ima, na a ya yan ma ima ne ima ghẹ gha gualọ emwi dan zẹ vbene iran ru.

⁷ Ra ne a avbe gha ga ẹbọ zẹ vbene eso vbe uwu iran ru. Zẹ vbene ebe kha re, “Emwa nii keghi tota gha re, gha da, iran keghi kpaegbe gha kuu.”

⁸ Ne ima ghẹ ru awua oghẹ, vbene eso vbe uwu iran ru ne iran arriaisẹn eha yan ugie na wulo edẹ ọkpa.

⁹ Wa ghẹ gia danmwẹ e Nọyaẹnmwa ghee, vbene eso ru vbe uwu iran, ne ẹyẹn na gbele iran uan.

¹⁰ Wa ghẹ gha vian, vbene eso vbe gha ru ne Ogie Uwu na fuẹn iran uan.

¹¹ Emwi na hia sunu ne a ya rhie igie emwi ne emwa ọvbehe, a keghi gbẹnnẹ ọẹn ye otọ zẹ vbe ne a ya bu ima ude. Rhunmwuda, ẹghẹ ima keghi re ẹghẹ ne ufomwẹ na sẹ otọ fo nẹ.

¹² Ọmwa ne ọ ro ighẹ rẹn mudia nẹ, ọ mwẹ ẹwaẹn ne ọ ghẹ ya de.

¹³ Edanmwẹ ne uwa he miẹn hia, egbe ne emwa ọvbehe hia vbe miẹn nọ. Rhunmwuda, Osanobua gha yan an, te ọ muẹn sẹ, ẹ i ra kue ne a danmwẹ uwa ghe gberra vbene ẹtin uwa sẹe, sokpan ẹghẹ ne a na danmwẹ uwa ghe nii, ọ gha rhie ẹtin ne uwa ya ya egbe miẹn ẹnrẹn, ne uwa miẹn ehe na sẹtin do ọe fe.

¹⁴ Rhunmwuda ọnii, ọse mwẹ ni ghan, wa gha lẹ ne ẹbọ ne a gaa.

¹⁵ Te I gu uwa guan na zẹ vbe umẹwaẹn, wa tobọ uwa ya ekhọe gua sẹ emwi ne I kha.

¹⁶ Ukpu afiangbe ne ima kpọnmwẹ Osanobua yi, ma gha wọn vbọ, ẹ i re esagiẹn Kristi ọre ima na wọn? Ebrẹd ne ima giagia, ma gha rri ọe, ẹ i re efun egbe Jesu ma na re?

¹⁷ Rhunmwuda ighẹ ebrẹd ọkpa nọ, ma hia gha rhe gha bun, egbe ọkpa ma khin, rhunmwuda ebrẹd ọkpa ma na re.

¹⁸ Wa ghe avbe emwa Hibru, iran ni re vbe emwi ne a ya zẹ ese, te iran ghae vbe ugamwẹ ne a ke ya ga Osanobua.

¹⁹ De emwi ne I yae kha yi? Wẹ ẹbọ ra emwi ne ya ru ẹe mwẹ esa?

²⁰ Hiehiere. Emwi ne I kha ọrọre wẹ, emwi ne a ya zẹ ese vbe aro ẹbọ, esu ọre a yae ru na ighẹ ẹ i re Osanobua. Mẹ ma ho ne uwa gu esu gha mu obọ.

²¹ Wẹ i ra sẹtin gha wọn vbe ukpu ọghe Nọyaẹnmwa kevbe ukpu avbe esu.

²² Ra te uwa ra ya Nọyaẹnmwa khian ne oya ọmwa da? Wa yayi ighẹ ma wo vbe egbe sẹ ọre ra?

²³ Iran kha re wẹ, “Ma sẹtin ru emwi ne ọ rhirhi khọn mwa.” Ẹmwata nọ, sokpan ẹ i re emwi hia ọre ọ ke re. “Ma sẹtin ru emwi ne ọ rhirhi khọn mwa,” sokpan ẹ i re emwi hia ọre ọ mwẹ iyohọ ne ọmwa.

²⁴ Ọ ma kei ne ọmwa wa gha rẹn ọghe enegbe ẹre ọkpa, ọ kere ne ọ vbe gha rẹn ọghe emwa ọvbehe.

²⁵ U sẹtin rri emwikemwi ne a khiẹn vbe ẹki, vbe ne a i na vbe nọ ọta rhunmwuda osẹe ekhọe.

²⁶ Rhunmwuda, zẹ vbene ebe kha re, “Agbọn ke emwi hia ni rre uwu ẹre, ọ ghe Nọyaẹnmwa nọ.”

²⁷ Deghẹ ọmwa ne ọma yayi tie ruẹ ne u do gu ẹe rri evbare, u na wẹ u gha yo, emwi ne ọ rhirhi mu ye otọ vbe odaro ruẹ, rri ọe vbe ne a i na vbe nọ ọta, rhunmwuda osẹe ekhọe.

²⁸ Sokpan, a deghẹ a ghi tama ruẹn nẹ wẹ, “Ẹbọ ọre a ya emwi na ru,” ghẹ rri ọe rhunmwuda ọmwa ne ọ tama ruẹn ni kevbe rhunmwuda osẹe ekhọe.

²⁹ Ẹ i re osẹe ekhọe ọ wuẹ ọre I kha, sokpan ọghe ọmwa nii. Ọmwa ọkpa sẹtin kha wẹ, “Vbe ọ zẹ ne ekhọe ọmwa ọvbehe gha na mu idobo yọmwẹ egbe vbe emwi ne I ru yi?

³⁰ A deghẹ mẹ kpọnmwẹ Osanobua ye evbare mwẹ, vbe ọ zẹ ne ọmwa rhọkpa gha na gha zan mwẹ ba ẹmwẹ evbare ne I mẹ kpọnmwẹ yi nẹ?”

³¹ Vbene ọ rhirhi gha ye hẹ, ne uwẹ a rhirhi ru vbọ, te u re nọ re ra te u re ne ọ da, gha ru ehia ne uyi Osanobua.

³² Gha yin vbene a gha na miẹn wẹ u ma hẹ vba avbe Ju ra iran ne ẹ i re Ju ra esọsi Osanobua.

³³ Wa gha ru vbene I ru. Te imẹ hia ne I gha yin ẹse ma emwa hia vbe emwi hia ne I ru, vbene imẹ i na mu ẹmwẹ ọ maa ọghe egbe mwẹ roro, gberra ọ maa ọghe emwa hia vbene iran gha na miẹn imiẹnfan hẹ.