I Kọrinti 1 - Edo Bible (E Baibol Ẹdo) Version 1996

¹ E Pọl ne a la ekpa iho Osanobua tie ne ọ do gha re Ukọ ọghe Jesu Kristi, kevbe Sọstenes, ọtẹn mwẹ ne okpia, ọre ọ gbẹn ebe na,

² gie esọsi Osanobua ne ọ rre Kọrinti, gie emwa ne a tie re ne iran do gha re emwa ni huanrẹn Osanobua, emwa ni khian ọghọe rhunmwuda ighẹ iran ya egbe ba Kristi Jesu, deba emwa hia ni ghi na erhunmwu ghe Nọyaẹnmwa Jesu Kristi nẹ, zẹ vbe Nọyan iran kevbe ima.

³ Te Osanobua ne Erha mwa, kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa.

Afiangbe Vbe Uwu Jesu

⁴ Ẹghẹ hia ọre I ya kpọnmwẹ Osanobua mwẹ ne uwa, rhunmwuda ẹsọhẹ ne ọ la obọ Jesu Kristi rhie ne uwa.

⁵ Rhunmwuda te uwa ghi ya emwi hia fe nian, kevbe ẹmwẹ ne a guan kevbe irẹnmwi, rhunmwuda ighẹ wa rhie egbe ba Kristi.

⁶ Ikpẹ orhu ẹmwẹ Kristi wa gbinna nẹ vbe uwu uwa sẹrriọ.

⁷ Wẹ wa ma he vbabọ emwi afiangbe ọkpa ẹdẹ, vbe uwu ẹghẹ ne uwa ya diakhẹ Nọyaẹnmwa Jesu Kristi ne ọ rhie egbe maa.

⁸ Rẹn gha ya uwa mudia gbain ya sẹ ufomwẹ, ne a miẹn ehe na miẹn wẹ, ọ gha sẹ Ẹdẹ Jesu Kristi Nọyaẹnmwa, wa ghi gha re emwa ne a miẹn wẹ ẹ i mwẹ abe.

⁹ Osanobua ne ọ tie uwa ne uwa do gha gu Jesu Kristi ne Ovbi ẹre mu obọ, ọmwa ne ọ kere ne a mu ẹtin yan nọ.

Iwannegbe Ne Ọ Rre Uwu Esọsi

¹⁰ I ya ẹtin Nọyaẹnmwa Jesu Kristi rinmwian uwa etẹn, ne uwa gie ẹmwẹ uwa hia ha gu egbe ro vbe ẹmwẹ ne uwa ta, ne iwannegbe ghẹ gha rre ẹkpo uwa, wa gha re ọkpa vbe iro ne uwa zẹ, kevbe emwi ne uwa họ ne uwa ru.

¹¹ Rhunmwuda, emwa eso ni ke owa e Klọe rre, wa tama mwẹ etẹn mwẹ ighẹ wa muan egbe ẹmwẹ.

¹² Gu mwẹ wa tae vbe nian wẹ ẹmwẹ ughughan wa hia ta. Orhiọnkpa ghi wẹ, “Otu e Pọl mẹ ye,” ọmwa ọvbehe ghi vbe wẹẹ, “Otu Apọlọs mẹ ye.” Eso ghi vbe wẹ, “Otu e Pita mẹ ye,” eso ghi vbe wẹ, “Otu e Kristi mẹ ye.”

¹³ Te a ghi ghae Kristi ye otu ra! E Pọl ọre ọ wu ne uwa vbe uhunmwu ugbugbe ra? Te a sa amẹ ne uwa ne uwa gha re erhuanegbe Pọl ra?

¹⁴ I kpọnmwẹ Osanobua ighẹ I ma sa amẹ ne ọmwa rhọkpa gberra e Krispọs kevbe Gaiọs.

¹⁵ Ọmwa ne ọ gha sẹtin kha ighẹ te a sa amẹ ne irẹn ne ọ gha re ọrhuanegbe mwẹ ẹ i rrọọ.

¹⁶ (Ẹn hẹn, I gele vbe sa amẹ ne Stefanas kevbe emwa owa ẹre. I ma ghi yerre a deghẹ I ye vbe sa amẹ ne emwa ọvbehe gberra enii.)

¹⁷ Kristi ma gie mwẹ ne I do gha sa amẹ ne emwa. Iyẹn Ne ọ maa ọre ọ wẹ ne I do kpe orhu ẹre, vbe ne a i na vbe ya aguẹmwẹ ẹwaẹn emwa ne agbọn tae, rhunmwuda emwi vberriọ gha ya uwu ne Kristi wu vbe uhunmwu ugbugbe khian nẹ i ghi mwẹ ẹtin hiehiere.

Jesu Ne Ẹtin Kevbe Ẹwaẹn Osanobua

¹⁸ A gha ta ẹmwẹ uwu ne Kristi wu vbe uhunmwu ugbugbe ma iran ni ra fuẹn uan, ẹmwẹ eghẹrẹ nọ vbe ehọ iran. Sokpan, zẹ vbe ọghe ima ne a ra miẹnfan, ẹtin Osanobua nọ.

¹⁹ Rhunmwuda, Ebe ne ọ huanrẹn tae wẹẹ, “I gha fuẹn ọnrẹn uan ighẹ ẹwaẹn iran ni waan, I ghi bi irẹnmwi iran ni waan kọ ye efẹn ọkpa.”

²⁰ De ehe ne avbe umẹwaẹn ghi ye vbọ khekherriọ ra iran ni rẹn emwi? Ra iran ni guara muan ẹmwẹ vbe agbọn na. Osanobua rhie maa nẹ ighẹ ẹwaẹn agbọn na, ukọnmwẹ nọ.

²¹ Rhunmwuda Osanobua, vbe ekpa ẹwaẹn ne ọ wanrẹn, ọ keghi ru ẹe wẹ ne emwa ne agbọn i ghẹ sẹtin ya ẹwaẹn iran gualọ irẹn miẹn, sokpan, Osanobua keghi wẹẹ, ikpẹ orhu “akpa” ne ima kpe, ọre irẹn gha la ekpa ẹre miẹn iran ni yayi fan.

²² Avbe Ju ho ne a winna iwinna ọyunnuan ma iran, iran ke rhie nene ẹmwẹ. Iran ne ẹ i re Ju gualọ ogie ẹwaẹn vbọ.

²³ Sokpan, Jesu vbe uhunmwu ugbugbe ma kpe orhu ẹre, ẹmwẹ ne ọ mu avbe Ju ohu, nọ vbe re ẹmwẹ eghẹrẹ vbe obọ iran ne ẹ i re Ju.

²⁴ Sokpan ọ gha sẹ egbe iran ne Osanobua tie re, kevbe avbe Ju kevbe avbe iran nẹ ẹ i re Ju, ẹmwẹ ikporhu na ọrọre Jesu ne ọre ẹtin kevbe ẹwaẹn Osanobua.

²⁵ Rhunmwuda, emwi ne ọ yevbe ukọnmwẹ ọghe Osanobua wan sẹ ẹwaẹn emwa ne agbọn, kevbe emwi ne ọ yevbe a ma wo vbe egbe ọghe Osanobua, wo vbe egbe sẹ ẹtin emwa ne agbọn.

²⁶ Wa ghi ye rre vbene uwa gha ye hẹ vbe Osanobua tie uwa, etẹn mwẹ wẹ, ibozẹghẹ vbe gha mwẹ ẹtin, ibozẹghẹ ọre ọ vbe gha rre ukpo ne ọ yo vbe aro agbọn.

²⁷ Sokpan te Osanobua wa yan ru ẹe wẹ, ne irẹn hannọ emwi ne agbọn tie ẹre akpa, ne ọ miẹn ehe na ya ekhue mu avbe umẹwaẹn.

²⁸ Rẹn hannọ emwi ne agbọn i ka yọ kevbe ne iran kpọzọ ua kevbe ne iran tie ẹre emwi kẹkan, ne ọ miẹn ehe na fuẹn iran uan ighẹ avbe emwi ne agbọn ghe gẹdẹgbẹ.

²⁹ Ọnii rhie maa wẹ, ọmwa ọkpa ne ọ gha sẹtin rhuọ vbe odaro Osanobua ẹ i rrọọ.

³⁰ Sokpan Osanobua ku uwa kugbe ba Kristi Jesu nẹ, Osanobua kevbe ru ẹe ne Kristi gha re ẹwaẹn ima, ekpa ẹre ọre a na ya ima khian ni mudia ẹse vbe odaro Osanobua, ma keghi khian emwa Osanobua, a na fannọ ima ye otọ.

³¹ Rhunmwuda ọnii zẹ vbene ebe khare, “Ọmwaikọmwa ne ọ ho ne irẹn rhuọ, wẹ ne ọ gha ye emwi ne Nọyaẹnmwa ru rhuọ.”