I Jọn 5 - Edo Bible (E Baibol Ẹdo) Version 1996

Ukhọnmwẹ Ne Ima Khọn Agbọn Miotọ

¹ Ọmwaikọmwa ne ọ yayi ighẹ Jesu ọrọre nene Mẹzaia, ovbi Osanobua nọ, ọmwa ne ọ hoẹmwẹ erha ne ọ biẹ ọmọ, te ọ vbe hoẹmwẹ ovbi ẹre ba ẹre.

² Vbenian ọre ima na rẹn ighẹ ma ho ẹmwẹ ivbi Osanobua, vbe ekpa ne a na hoẹmwẹ ọnrẹn kevbe ne a na vbe ru vbene iyi ẹre kha re.

³ Rhunmwuda emwi ne a ya ahoẹmwẹ Osanobua kha ọre ọna khin, ọ rhie maa ima wẹ, ma ru vbene iyi ne irẹn yi khare. Iyi ne ọ yi, i vbe re ne ọ lọghọ ne ima gbe.

⁴ Rhunmwuda, ọmwaikọmwa ne ọ ghi re ovbi Osanobua nẹ, te ọ sẹtin mu agbọn gbe otọ, vbenian ọre ima ya khọn agbọn miotọ, iyayi ọre a ya ruẹe.

⁵ De ọmwa ne ọ gha sẹtin khọn agbọn miotọ yi? Rẹn ni nọ ighẹ ọmwa ne ọ yayi wẹ Ovbi Osanobua ọre Jesu Kristi khin.

Osẹe Vbe Ekpa Jesu Kristi

⁶ Jesu Kristi ọrọre ọmwa ne ọ rre, ọ rre ke irẹn kevbe amẹ ọghẹ isamẹ ọnrẹn kevbe esagiẹn ọghe uwu ẹre. Ẹ i re rẹn vbe amẹ ọkpa ọre ọ rre, sokpan ke irẹn kevbe amẹ kevbe esagiẹn. Nene Orhiọn tobọ ẹre vbe se osẹe wẹ ẹmwata ọ na khin, rhunmwuda, ẹmwata ọre nene Orhiọn khin.

⁷ Osẹe eha ọre ọ rrọọ.

⁸ Orhiọn, amẹ, kevbe esagiẹn, te iran eha na wa gu egbe ro.

⁹ Emwa ne agbọn gha se ọsẹe ma ya ẹe yi, osẹe ne Osanobua sẹe ọre ọ diae sẹ ẹsẹse, ọna ọrọre osẹe ne Osanobua sẹe vbe ekpa Ọmọ.

¹⁰ Rhunmwuda ọnii, ọmwaikọmwa ne ọ ya Ovbi Osanobua yi, mwẹ osẹe na vbe uwu ekhọe ẹre. Sokpan ọmwaikọmwa ne ọ ma ya Osanobua yi, ya ẹe khian ọhọn ohoghe nẹ, rhunmwuda osẹe ne Osanobua sẹe vbe ekpa Ovbi ẹre ọ ma yae yi.

¹¹ Nene osẹe ọre ọna khin: Osanobua rhie arrọọ ne ẹ i fo ne ima nẹ, nene arrọọ na keghi re ọghomwa vbe uwu Ovbi ẹre.

¹² Ọmwaikọmwa ne ọ mwẹ Ọmọ, ọ mwẹ arrọọ na, ọmwaikọmwa ne ẹ i mwẹ Ovbi Osanobua, ẹ i mwẹ arrọọ.

Arrọọ Ne Ẹ I Fo

¹³ I gbẹn ebe na gie uwa ne uwa miẹn ehe na rẹn ighẹ uwa mwẹ ẹfe ne ẹ i fo, wa ni ya eni Ovbi Osanobua yi.

¹⁴ Ọna ọ si ẹe ne afianma i na fian ima vbe odaro Osanobua, aro ima dae wẹ, rẹn gha ru ẹe, a deghẹ ma nọ rẹn emwi, zẹ vbene ọ gua egbe emwi ne irẹn ho ro.

¹⁵ Ẹghẹikẹghẹ ne ima ya nọ rẹn emwi, ọ wa họn, ugbẹn vbe ima ghi rẹn nẹ wẹ, ẹmwata ọ na khin, ma rẹnrẹn wẹ emwi ne ima nọ rẹn ọre ọ rhie ne ima.

¹⁶ A deghẹ orhiọnkpa mu ọtiọnrẹn vbe ọ ru orukhọ ne ẹ i si uwu, wẹ ne ọ na erhunmwu ghe Osanobua, ne ọ gha rhie arrọọ nẹẹn. Ọghe iran ne orukhọ iran i re ne ọ si uwu ọre a kha. Sokpan orukhọ ne ọ si uwu rrọọ. I ma wẹ ne uwa na erhunmwu ghe Osanobua ye ọnii.

¹⁷ Emwi ne a baku ru hia, orukhọ iran hia khin, sokpan orukhọ ne ẹ i si uwu rrọọ.

¹⁸ Ma rẹnrẹn wẹ ovbi Osanobua ne ọ gha wa gha ru orukhọ khian, ẹ i rrọọ, rhunmwuda, Ovbi Osanobua ọre ọ rhie ẹre mwẹ vbe ne a i na mwẹ ẹbe. Ọmwa Dan ni, i sẹtin kuan rẹn.

¹⁹ Ma rẹnrẹn wẹ ọghe Osanobua ma khin kevbe wẹ Ọmwa Dan ni ọre ọ kha yan agbọn na hia.

²⁰ Ma rẹnrẹn wẹ Ovbi Osanobua rre nẹ, ọ keghi vbe rhie irẹnmwi ne ima sẹrriọ wẹ, te ima ghi rẹn Osanobua ẹmwata, uwu Osanobua ẹmwata ọre ẹdẹ agbọn ima ye, vbe uwu Jesu Kristi ne Ovbi ẹre. Ọna ọrọre Osanobua ẹmwata, ọna ọ vbe re ẹfe ne ẹ i fo.

²¹ Ivbi mwẹ, wa gha lẹ ne ẹbọ ohoghe.