I Jọn 2 - Edo Bible (E Baibol Ẹdo) Version 1996

Kristi Idaehọ Mwa

¹ Ivbi mwẹ, te I gbẹn ebe na gie uwa ne uwa ghẹ miẹn ehe na rukhọ, sokpan, a deghẹ ọmwaikọmwa ghi vbe ru orukhọ, ma mwẹ ọmwa ne ọ rinmwian ne ima vbe ehe ne Evbavba ye, ọnii ọre Jesu Kristi ne ọmwata.

² Rhunmwuda Kristi tobọ ẹre ọrọre ne a rhunmwuda ẹre ya orukhọ mwa bọ mwa, ẹ i vbe re orukhọ ọghomwa ọkpa, sokpan orukhọ emwa hia.

³ Ma gha lele uhi ne Osanobua yi ru emwi, ẹghẹ nii ọre aro mwa gha na dae ighẹ ma gele rẹn ọnrẹn.

⁴ A deghẹ orhunmwu ọkpa khare wẹ, “Mẹ rẹn ọnrẹn” ighẹ ẹ i vbe ya uhi ẹre ru emwi, ọmwa vberriọ, ọhọn ohoghe nọ, ẹmwata i vbe rre uwu ẹre.

⁵ Sokpan ọmwa ne ọ ya ẹmwẹ ọnrẹn ru emwi, ọrọre ọmwa ne a ye aho ne ọ mwẹ ghe Osanobua khian ne ọ gbae. vbenian ọre ima gha ya rẹn ighẹ uwu Osanobua ọre ima ye.

⁶ Ọmwa ne ọ kha re ighẹ uwu Osanobua ọre irẹn ye, we ne ọ gha yin zẹ vbene Jesu Kristi yinrin.

Iyi Ọgbọn

⁷ Wa ne ọse mwẹ, iyi ne i gbẹn gie uwa na i re ọghọgbọn, iyi nẹdẹ nii nọ, ne uwa ka mwẹ ke omuhẹn gha dee. Iyi nẹdẹ na ọrọre ikporhu ne uwa ka họn nẹ.

⁸ Vbene ọ rhirhi gha ye hẹ, iyi ne I gbẹn gie uwa, ọghọgbọn nọ, a miẹn ẹmwata ne ọ rrọọ vbe uwu Kristi nẹ, uwanmwẹ ọre ọ ghi wa ladian nian.

⁹ Ọmwa ne ọ khare ighẹ uwu uwanmwẹ rẹn ye, ọ na gha khuiwu ọtiọnrẹn, uwu ebiebi ọre ọ ye, ye do sẹ wanwan na.

¹⁰ Ọmwa ne ọ ho ẹmwẹ ọtiọnrẹn, uwu uwanmwẹ ọre ọ ye, rhunmwuda ọnii, emwi ọkpa i vbe rre uwu irẹn ne ọ gha si ọmwa ọvbehe fi orukhọ.

¹¹ Sokpan ọmwa nọ khu iwu ọtiọnrẹn, uwu ebiebi ọre ọ ye, uwu ẹre ọre ọ na khian, ọ ma vbe rẹn ehe ne irẹn rrie, rhunmwuda ebiebi rhu ẹre aro nẹ.

¹² Ivbi mwẹ, I gbẹn ebe gie uwa rhunmwuda, a la ekpa eni Jesu ya orukhọ uwa bọ uwa nẹ.

¹³ I gbẹn ebe gie uwa, wa ne avbe erha emọ, rhunmwuda, wa rẹn ne ọ rrọọ ke omuhẹn gha dee, I gbẹn ebe gie igbama, rhunmwuda wa mu ẹn gbe otọ nẹ ighẹ Ọmwa Dan ni.

¹⁴ I gbẹn ebe gie uwa, wa ne ibiẹka, rhunmwuda, wa rẹn Evbavba. I gbẹn gie uwa, wa ne Erha, rhunmwuda, wa rẹn irẹn ne ọ wa rrọọ ke omuhẹn gha dee. I gbẹn gie uwa, wa ne igbama, rhunmwuda, wa wo vbe egbe, ẹmwẹ Osanobua rre uwu uwa, wa vbe maẹn Ọmwa Dan ni.

¹⁵ Wa ghẹ ho ẹmwẹ agbọn na, ra emwikemwi ne ọ ghi re ọghe agbọn na nẹ. A deghẹ wẹ ho ẹmwẹ agbọn na, aho ọghe Erha, ẹ i rre uwu uwẹ.

¹⁶ Emwi hia ni re ọghe agbọn na, emwi ne ọ yẹ egbe orukhọ na, emwi ne emwa ne agbọn bẹghe ne ọ vbe ya ghan, ọkpa ne ọ ke ehe ne Evbavba ye rre, ẹ i rrọọ, agbọn na ọre ehia ke rre.

¹⁷ Agbọn na, kevbe emwi ne agbọn gualọ ni rrọọ hia, te ehia rhie gberra khian, sokpan, ọmwa ne ọ ru vbene Evbavba ho ọ gha rrọọ ẹdẹdẹmwẹdẹ.

Oghian Kristi

¹⁸ Ivbi mwẹ, ufomwẹ sẹ otọ fo nẹ. A khama uwa wẹ, Oghian Kristi gha rre, banbanna nian, eghian Kristi ni bun rhie egbe ma nẹ, rhunmwuda ọnii, ma rẹnrẹn wẹ, ufomwẹ sẹ otọ fo nẹ.

¹⁹ Vbe ẹmwata, ẹ i re otu ima iran na ye o, ọ ni ọ si ẹe ne iran na kpao sẹ ima rae, akpawẹ otu ima iran ye, te iran gha gu ima tota. Sokpan iran kpao sẹ mwa rae, ne aro miẹn ehe na dae wẹ, ẹ i re otu mwa iran ye.

²⁰ Sokpan, Kristi tue Orhiọn Ne Ọ Huanrẹn yan uwa nẹ, rhunmwuda ọnii, wa hia rẹn nene ẹmwata nẹ.

²¹ Rhunmwuda ọnii, ẹ i re rhunmwuda ighẹ wa ma rẹn nene ẹmwata ọre ọ ya mwẹ gbẹn ebe gie uwa, sokpan rhunmwuda ighẹ wa rẹn ọnrẹn nọ, wa keghi vbe rẹn wẹ ohoghe i sẹtin ke uwu ẹmwata ladian ẹdẹ.

²² Gha ọ ghi re nene ọhọn ohoghe khekherriọ? Rẹn nọ ighẹ ọmwa ne ọ khare ighẹ Jesu i re nene Kristi: Ọnọna ọrọre nene Oghian Kristi, ọ ma rhan obọ miẹn Erha kevbe Ọmọ.

²³ Rhunmwuda, ọmwa ne ọ ma rhan obọ miẹn Ọmọ, ọ ma rhan obọ miẹn Erha, ọmwa ne ọ rhan obọ miẹn Ọmọ, Erha wa vbe guẹe rrọọ ba re.

²⁴ Rhunmwuda ọnii, gie a miẹn ighẹ u rhie ẹre ye ekhọe ẹmwẹ ne uwa họẹn vbe omuhẹn. A deghẹ emwi ne u họẹn vbe omuhẹn mudia vbe ekhọe ruẹ, ẹghẹ nii, u gha gu Ọmọ kevbe Erha mu otu kugbe vbe ẹghẹ hia.

²⁵ Ọnọna ọrọre emwi ne Kristi vbe kha ighẹ, rẹn gha rhie ne ima, ọnii nọ wẹẹ, arrọọ ne ẹ i mwẹ ọfo.

²⁶ I gbẹn ebe na gie uwa vbe ekpa iran ni ho ne iran gha mu uwa rẹrẹ.

²⁷ Sokpan zẹ vbe ọ ghe uwa, Kristi tue Orhiọn rẹn yan uwa nẹ. Ugbẹn vbe Orhiọn a ye gha rre uwu uwa, wa i ghi vbe gualọ ọmwa ọvbehe ne ọ gha ma uwa emwi. Rhunmwuda, Orhiọn ni ọre ọ ma uwa emwi vbe ekpa emwi hia, emwi ne ọ ma uwa ẹre, ẹmwata vbe nọ, ohoghe i rrọọ, wa gha rhie emwi ne ọ ma uwa ẹre khekherriọ, ne uwa vbe gha rre uwu Kristi.

²⁸ Erriọ nọ, wa ne ivbi mwẹ, wa mudia vbe uwu irẹn, ne afianma ghẹ fian ima vbe ẹdẹ ne ọ gha ya egbe ladian, ne ima ghẹ ya ya ekhọe lẹre hin ehe ne ọ ye rre, vbe Ẹdẹ ne ọ gha rre.

²⁹ Wa rẹnrẹn wẹ, ọmwata ọre Kristi khin, rhunmwuda ọnii, ọ kere ne uwa rẹn khekherriọ wẹ, ọmwaikọmwa ne ọ ru emwi emwata, ovbi Osanobua nọ.