I Jọn 1 - Edo Bible (E Baibol Ẹdo) Version 1996

Ẹmwẹ Arrọọ

¹ Ẹmwẹ arrọọ ne ọ wa rrọọ ke omuhẹn gha dee, ọre ima gbẹn ebe ẹre gie uwa na. Ma họẹn nẹ, ma ye aro ima miẹn ọẹn, vbe ẹmwata, te ima miẹn ọẹn, ma na vbe ye obọ kan rẹn.

² Ugbẹn vbe arọọ na ghi khian ne a ye aro bẹghe nẹ, ma tobọ mwa miẹn ọẹn, rhunmwuda ọnii, ma keghi ta ẹmwẹ ọnrẹn, ma keghi ta ẹmwẹ arrọọ etẹbitẹ nii, ne ọ gha gu Evbavba rrọọ, ne a vbe do rhie ma ima, ma uwa.

³ Emwi ne aro mwa sẹe, kevbe ne ehọ mwa họẹn, ọre ima vbe tama uwa ne uwa miẹn ehe na ya egbe ba mwa vbe uwu ne ima na gu Evbavba mu obọ kevbe Ovbi ẹre ighẹ Jesu Kristi.

⁴ Te ima gbẹn ebe na ne ọyẹnmwẹ mwa miẹn ehe na gha re ne ọ gbae.

Uwanmwẹ Ọre Osanobua Khin

⁵ Ọna ọrọre ẹmwẹ ne ima họn vbe unu Ovbi ẹre, ne ima vbe do tama uwa: Uwanmwẹ ọre Osanobua khin, ebiebi i vbe rre uwu irẹn hiehiere.

⁶ Adeghẹ ma khare khekherriọ ighẹ rẹn ma gba mu obọ, ma na vbe gha ye rre uwu ebiebi, ọhọn ohoghe ma khin, vbe ẹmwẹ ne ima guan kevbe emwi ne ima ru.

⁷ Sokpan deghẹ ma rre uwu uwanmwẹ zẹ vbene irẹn vbe rre uwu uwanmwẹ, ẹghẹ nii, ọre ima na gu egbe mu obọ, esagiẹn Jesu ne Ovbi ẹre ghi ye ima khian ne ọ huanrẹn hin orukhọ hia rre.

⁸ Deghẹ ma khare ighẹ ma i mwẹ orukhọ, te ima rẹrẹ egbe mwa, ẹmwata i vbe rre uwu ima.

⁹ Sokpan a deghẹ ma miẹn orukhọ mwa kue ma Osanobua, rẹn gha mu eyan ọghọe sẹ, ọ ghi ru vbene ọ keyi, ọ gha ya orukhọ mwa bọ mwa, ọ ghi vbe kpe mwa hin uwu abakuru mwa hia rre.

¹⁰ Ma gha kha ighẹ ma ma ru orukhọ, ma ye Osanobua mwa khian ọhọn ohoghe, ẹmwẹ ọnrẹn i vbe re uwu ima.