Iwinna 4 - Edo Bible (E Baibol Ẹdo) Version 1996

Pita Kevbe Jọn Vbe Odaro Iko

¹ Ehe ne Pita vbe Jọn na wa gu avbe emwa ni guan, avbe igie ohẹn, olotu iran ni khẹ odẹ vbe Ọgua Osa, kevbe avbe Sadusi keghi bu iran gha dee.

² Ohu mu iran rhunmwuda ne avbe ukọ na ma avbe emwa ni emwi wẹ Jesu rhiọkpaegbe vbe idin, ọna keghi re emwi ne a ya ta ẹe rhuan wẹ, a gha ye huẹn emwa ni wulo nẹ hin idin rre.

³ Rhunmwuda ọnii, iran mu nọ iran, iran keghi khui iran ye ẹwẹdọ vbe ẹdẹ te ya gbe, rhunmwuda ẹdẹ khian nẹ.

⁴ Sokpan iran ni họn ẹmwẹ nii keghi yayi, ikpia ni rrọọ sẹ omwa arriaisẹn isẹn.

⁵ Ẹde ghi gbe, olotu avbe Ju, avbe ediọn, kevbe iran ni ma emwa Uhi, keghi si egbe koko vbe Jerusalẹm.

⁶ Iran keghi ya vba Anas ne ogie ohẹn kevbe Kaiafas, Jọn kevbe Alẹkzanda deba emwa eso vbe ẹgbẹe ogie ohẹn.

⁷ Iran viọ avbe ukọ ni mudia ye odaro iran, iran keghi nọ iran wẹẹ, “Vbe uwa ya ru emwi na hẹ? De ẹtin ne uwa mwẹ? de eni ọmwa ne uwa ya ruẹe?”

⁸ Pita keghi vuọn ne Orhiọn Ne Ọ Huanrẹn, ọ wanniẹn iran ẹmwẹ wẹẹ, “Wa ne olotu emwa kevbe uwa ne ediọn.

⁹ Deghẹ ẹmwẹ iwinna esi ne a winnaẹn vbe egbe uke ni, kevbe vbene a ya sinmwi ẹn hẹ, ọre uwa nọ ima ẹre na,

¹⁰ I ho ne uwa rẹn nian, ke uwa kevbe ivbi Izrẹl hia wẹẹ, ẹtin eni Jesu ne ovbi Nazarẹt ọre ọ ya mudia vbe odaro uwa banbanna, vbe egbe ne ọ rran rẹn giẹnrẹn. Jesu ne uwa kan mu ugbugbe, ne Osanobua huẹn kpaegbe vbe idin.

¹¹ Jesu na ọre ebe ta ẹmwẹ ọnrẹn wẹẹ, “ ‘Okuta ne uwa ni bọ owa wẹ, ẹ i maa do khian okuta a ma miẹn a i ru.’

¹² Obọ ẹre ọkpa ọre a la miẹn imiẹnfan rhunmwuda eni ọvbehe i rrọọ, vbe agbọn na, ne Osanobua rhie ne emwa wẹ a gha lae miẹn imiẹnfan.”

¹³ Unu keghi mobọ yan emwa ni rre Iko nii vbe iran miẹn vbene Pita kevbe Jọn din hẹ, sẹe hia vbe iran ghi vbe do rẹn wẹ emwa kẹkan ni ma ruẹ ebe ọre iran khin. Ẹkpo nii ọre iran na do yerre wẹ Jesu ọre iran ka gha lele khian.

¹⁴ Iran ma miẹn ẹmwẹ ọkpa ta, rhunmwuda ọmwa ne a mu ẹre egbe rran nii, mudia ke Pita kevbe Jọn vbe evba.

¹⁵ Rhunmwuda ọnii, iran na wẹ ne iran ladian vbe owa ne a na bu ohiẹn. Iran keghi suẹn gha gu egbe iran zẹ iro.

¹⁶ Iran nọ egbe iran wẹẹ, “Vbe a ra ru emwi na hẹ yi? Emwa ni rre Jerusalẹm hia rẹnrẹn ighẹ iran ọre ọ winna iwinna ọyunnuan na, ẹ i gia muan hiehie.

¹⁷ Sokpan ne a miẹn ehe na gbe ukhu ẹre ua, ne ọ ghẹ hin obarowa vbe uwu ẹbu emwa na, wa gie a yan ma iran ne iran ghẹ ghi ya eni Jesu gu ọmwa rhọkpa guan.”

¹⁸ Rhunmwuda ọnii, iran keghi tie iran la owa, iran yan ma iran wẹ ne iran ghẹ gie a họn ẹn wẹ iran ye ya eni Jesu gu ọmwaikọmwa guan, a ghẹ i ghi ya ẹe ma emwa emwi.

¹⁹ Sokpan Pita kevbe Jọn zẹ wanniẹn iran wẹ, “Wa tobọ uwa ta ne ọ maa sẹ vbọ vbe odaro Osanobua, ne a ru ne uwa khare ra ne a ru ne Osanobua khare?

²⁰ Rhunmwuda, ẹ i gie ima ru wẹ emwi ne aro ima sẹe nẹ, ehọ mwa vbe họn ẹn nẹ, ne a ghẹ ghi ta ẹe ladian.”

²¹ Iko ni keghi dọlegbe tua unu muẹn ma iran, iran keghi fannọ iran kua. Iran ma miẹn emwi de obọ mu ya rri iran oya rhunmwuda, emwa hia keghi wa gha rho Osanobua ye emwi ne ọ sunu.

²² Ọmwa ne iran winna ọyunnuan ya mu ẹre egbe rran na sẹ ọmọ ukpo iyeva.

Emwa Niyayi Na Erhunmwu Udinmwẹ

²³ Iran ghi fannọ iran kua nẹ, Pita kevbe Jọn keghi bu ihua iran, iran keghi na iyẹn ma iran vbene avbe igie ohẹn kevba avbe ediọn kha hẹ.

²⁴ Iran ghi họn ẹmwẹ na, iran keghi ku urhu gbe ya na erhunmwu ghe Osanobua wẹẹ, “Ayi ne Ọ yi, nọ yan ẹrinmwi kevbe agbọn, okun kevbe emwi hia ni re uwu iran.

²⁵ Vbekpa Orhiọn Ne Ọ Huanrẹn, wẹ la unu erha mwa odede ighẹ Devid ne ọguọmwadia ruẹ ta ẹe wẹẹ, “ ‘Vbe ọ si okuosu ye avbe Ni ma yayi egbe yi? Vbe ọ ye avbe emwa gha si uma ne ẹ i gba yi?

²⁶ Iran ne avbe ọba agbọn gha mu egbe, iran ni khaemwisẹ gha si uma ẹkhokho, ne iran mu aro da Nọyaẹnmwa kevbe Mẹzaia ẹre.’

²⁷ Vbe ẹmwata, Hẹrọd kevbe Pọntiọs Pailet deba iran Ni ma yayi kevbe emwa Izrẹl, ore ẹvbo na iran na ko iko Jesu ne Ọguọmwadia ruẹ Ne ọ huanrẹn ne uwẹ ya ru Mẹzaia.

²⁸ Iran si egbe koko, ne iran ru avbe emwi ni ne uwẹ ya ẹtin ruẹn kevbe iho ọwuẹ ta ye otọ nẹ wẹẹ, ọ gha sunu.

²⁹ Wanwan na nian Nọyaẹnmwa, ghe vbene iran yan hẹẹ, rhie ẹtin ne ima ne eguọmwadia ruẹ, ne ima sẹtin gha kpe orhu ẹmwẹ ruẹn vbe ne a i na fian afianma.

³⁰ Nien obọ ruẹ ladian ne u ya ẹe mu emwa egbe rran, vbe rhie ne ima ne a gha ye eni Jesu, Ọguọmwadia ruẹ ne ọ huanrẹn winna iwinna ama kevbe ọyunnuan.”

³¹ Ugbẹn vbe iran ghi na erhunmwu nẹ, otọe keghi mu rueghe vbe ehe ne iran ye, iran hia keghi vuọn ne Orhiọn Ne Ọ Huanrẹn, iran keghi ya gha kpe orhu ẹmwẹ Osanobua vbe ne a i na fian afianma.

Okulugbe Emwi Hia

³² Otu iran ni yayi keghi gha rrọọ vbe ekhọe ọkpa kevbe orhiọn ọkpa. Arhiọnkpa ne ọ vbe tie emwi ne ọ mwẹ ọghe obọ ẹre, ẹ i rrọọ. Iran hia ghi gha gba ghae emwi ne iran mwẹ, ọ gba obọ.

³³ Avbe ukọ keghi gha ya ẹtin nọkhua sẹ osẹe arhiọkpaegbe ọghe Nọyaẹnmwa Jesu. Osanobua keghi wa vbe gha tue afiangbe yan iran hia.

³⁴ A ma vbe miẹn arhiọnkpa ne ọ rre ivbabọ vbe uwu iran. Iran ni mwẹ owa kevbe ni mwẹ ugbo keghi ya gha viọ khiẹn.

³⁵ Iran na gha viọ igho ne iran miẹn vbọ gie avbe ukọ, iran ghi vbe gha igho ni gba emwa hia obọ, vbe ne ọ gha sẹ iran lo.

³⁶ Ẹghẹ ni ọre Josẹf, e Livai ọkpa ne a biẹe vbe Saiprọs, ne avbe ukọ he ẹre Banabas (emwi ne a ye ọnii kha ọre ọmwa ne ọ ye udu hu ọmwa,)

³⁷ na ya khiẹn otọ ẹre, ọ Keghi viọ igho ne ọ miẹn vbọ gha dee, ọ keghi viọ ehia ne avbe ukọ.