Iwinna 26 - Edo Bible (E Baibol Ẹdo) Version 1996

E Pọl Zẹ Ne Unu Ẹnrẹn Ma Ọba Agripa

¹ Agripa keghi tama e Pọl wẹ, “A rhie ẹghẹ nuẹn nian ne u ya zẹ ne unu uẹn.” Pọl keghi nien obọ ladian ọ na suẹn gha zẹ ene unu ẹnrẹn, wẹẹ:

² “Agripa ne Ọba, Uhunmwu ne ọ maa ọre I tie egbe mwẹ re ẹrẹna vbe a miẹn wẹ te imẹ ra zẹ ne unu mwẹ ma ruẹn vbekpa ẹzọ hia ne avbe Ju gun mwẹ gui.

³ Emwi ne ọ mobọ ye ọna gha re ẹmwata ọrọre wẹ, wẹ rẹn vbekpa uyinmwẹ kevbe ilele avbe Ju ẹsẹse. Rhunmwuda ọnii, I mobọ rinmwian ne u gbe ẹkun sẹ otọ danmwehọ mwẹ.

⁴ “Avbe Ju hia rẹn vbene I ru emwi hẹ ke ẹghẹ ọvbokhan mwẹ gha dee. Iran rẹnrẹn, wẹ ke omuhẹn gha dee, ẹvbo mwẹ kevbe Jerusalẹm ọre I ye.

⁵ Iran wa rẹn, deghẹ iran ho ne iran sẹ osẹe, wẹ ke omuhẹn gha dee otu ne ọ mu ẹmwẹ ugamwẹ mwa yan uhunmwu sẹ, ne a tie ẹre Farisi, ọre I ye.

⁶ Wanwanna nian, emwi ne a ba mwẹ ifi ẹzọ ba ọrọre wẹ rhunmwuda mẹ rhie ekhọe ye emwi ne Osanobua ve avbe erha mwa odede re.

⁷ Nene emwi ne a ve ne ẹwae iweva ọghe emwa ima rhie aro yi ighẹ ogha sẹ iran obọ vbe uwu ne iran na ga Osanobua asọn kevbe avan. Emwi ne a rhie aro ye odẹ gha khẹ na, Umogun, ọre avbe Ju gun mwẹ gui baa.

⁸ Vbe ọ zẹ yi ne uwa ne Ju ma na sẹtin yayi ighẹ Osanobua huẹn avbe orinmwi kpaegbe?

⁹ “Mẹ tobọ mwẹ kegha ro wẹ, ọ kere ne I ru emwi hia ne ẹtin mwẹ gha sẹ ya gu Jesu ne ovbi Nazarẹt gha khọn.

¹⁰ Emwi ne I ru vbe Jerusalẹm ọre ọnii khin. I keghi rhie ebe asẹ vbe obọ avbe igie ohẹn, I na munọ ni bun vbe uwu emwa Osanobua ku ẹwẹdọ, a ghẹ ghi vbe bu ohiẹn uwu gbe iran, mẹ ghi nien obọ ighẹ I mwẹ obọ vbọ.

¹¹ Ẹghẹ ni bun ọre I ya gha rri iran oya vbe uwu Ọgua ediọn, I na gha hia ne I ruẹ e ne iran siẹn iyayi iran, ohu iran mu mwẹ sẹrriọ wẹ, I na gha mu va ye isi ya gha lọghọ iran vbe odọ.

E Pọl Kpa Itan Afiwerriẹ Ọre

¹² “Ọna ọre I rhunmwuda ẹre gha rrie Damaskọs vbe I ghi miẹn avbe igie ohẹn ebe asẹ nẹ.

¹³ Ọ ghi rre ẹghẹ ogiavan vbe ehe ne I na khian vbe odẹ nii Umogun, I keghi bẹghe uwanmwẹ ọkpa ne awanwan rẹn wegbe sẹ ọghe owẹn, ọ keghi ke odukhunmwu lẹga mwẹ kevbe iran ne ima gba khian.

¹⁴ Ma hia keghi dele gbe otọ, I keghi họn urhu ọkpa vbe ọ zẹ ẹvbo avbe Hibru gun mwẹ guan wẹẹ, ‘Sọl, Sọl vbe ọ zẹ ne u na zẹ mwẹ owẹ, Iwinna ne ọ gha hie ruẹ aro nọ ighẹ ogigban ne u so ẹre igiawẹ na.’

¹⁵ Mẹ keghi nọ rẹn wẹẹ, ‘Gha nọ yi Nọyaẹnmwa?’ Nọyaẹnmwa keghi wanniẹn tama mwẹ wẹẹ, ‘Mẹ ne Jesu ne u zẹ ọre owẹ nọ.

¹⁶ Sokpan kpaegbe ne u ya owẹ ruẹ mudia. Te I rhie egbe ma ruẹn ne I miẹn ehe na rhie ruẹ ya ru ọguọmwadia mwẹ. U ghi ya gha tama emwa ọvbehe emwi ne aro ruẹ sẹe vbe egbe mwẹ ẹrẹna, kevbe avbe ọvbehe ni bun ne I gha he viọ ma ruẹn.

¹⁷ I gha miẹn ruẹn fan vbe obọ iran ne ivbi izrẹl kevbe iran ne ẹ i re Ju ne I khian giọ bu.

¹⁸ U ghi rhan iran aro ne u gban iran uhunmwu hin ebiebi rre la uwu uwanmwẹ, kevbe hin ẹtin Setan rre ghe Osanobua. Vbene a gha na miẹn wẹ vbekpa ne iran na mu ẹtin yan mwẹ, a ghi ye orukhọ iran bọ iran, iran ghi rhie ihe iran vbe uwu ẹbu emwa ne Osanobua hannọ zẹ.’

E Pọl Guan Vbekpa Iwinna Irẹn

¹⁹ “Erriọ nọ o, Ọba Agripa, I ma fieghe uhunmwu ye ẹmwẹ umian ne ọ ke ẹrinmwi rre ne I miẹn na.

²⁰ I keghi suẹn gha kpe orhu, okaro vbe Damaskọs, vbe iyeke ọnii vbe Jerusalẹm kevbe la otọ Judia hia kevbe ma iran ne ẹ i re Ju wẹ ne iran fi uyinmwẹ werriẹ vbe ọghe orukhọ ne iran ru, ne iran bu Osanobua gha dee ne iran vbe gha ru emwi ne ọ gha rhie ma ighẹ iran gele fiwerriẹ.

²¹ Ọna ọ siẹe ne avbe Ju na de obọ mu mwẹ vbe uwu Ọgua Osa, iran te ra gbe mwẹ uan.

²² Sokpan Osanobua ọre ọ mudia mẹ do sẹ ẹdẹnẹrẹ na, ne I na ye zẹ ene unu mwẹ ma emwa hia, ọkpọlọ kevbe ọkanmwa. Emwi ne I tae ọrọre emwi ne avbe akhasẹ kevbe Mosis tae ighẹ ọ gha sunu.

²³ Wẹ rẹ e Mẹzaia gha rri oya, ọ ghi vbe do gha re ọmwa ne okaro ne a gha huẹn kpaegbe vbe idin, ne ọ do ta ẹmwẹ uwanmwẹ imiẹnfan ma avbe Ju kevbe iran ne ẹ i re Ju.”

²⁴ Ugbẹn vbe Pọl ghi zẹ ene unu ẹnrẹn vbe nian, Fẹstọs keghi wa van okan mu ẹn wẹ, “Te u mwẹmwẹ Pọl, Ebe ne u ruẹ gbe ọre ọ ra si emwẹmwẹ ye uẹ egbe na.”

²⁵ E Pọl keghi wanniẹn wẹ, “I i zẹdẹ mwẹmwẹ Evbavba, ẹmwata ne uhunmwu ẹmwẹ ọre I ta.

²⁶ Agripa ne ọba, emwi ne ọ ya mwẹ gu uẹ guan saisai na ọrọre rhunmwuda ighẹ u rẹn otọ emwa na hia, mẹ yayi ighẹ aro ruẹ da emwi na hia ọkpọkpa rhunmwuda ọkpa ne a do ru ẹ i rre avbe emwi na hia.

²⁷ Agripa ne Ọba, deghẹ wẹ ya ẹmwẹ ne avbe akhasẹ tae yi, I rẹnrẹn ighẹ u yaeyi!”

²⁸ Agripa keghi tama Pọl wẹ, “Vbe ovbi ẹghẹ kherhe na, wẹ yayi ighẹ u gha sẹtin ya mwẹ do ya Kristi yi ra?”

²⁹ E Pọl keghi wanniẹn wẹ, “Ọre vbe ovbi ẹghẹ kherhe nọ ra ẹghẹ ne ọ taẹn nọ, erhunmwu ne I na ghe Osanobua ọrọre wẹ ne uwẹ kevbe emwa hia ni danmwehọ mwẹ ẹrẹna dọ khian vbene I mẹ yi, sokpan ẹ i re ọghe ọgiọrọ na I kha vbọ!”

³⁰ Ẹghẹ nii ọre ọba kevbe Bẹnis ne Ne ọ khaemwisẹ kevbe avbe emwa nekpa hia ghi na kpaegbe.

³¹ Iran ghi khian nẹ, iran kegha tae wẹ, “Okpia na ma ru emwi rhọkpa ne a gha gbe ẹe rua ra ne a muẹn ye eghan baa.”

³² Agripa keghi tama Fẹstọs wẹẹ, “A gha te fan oko na fua akpawẹ ọ ma tọn ẹzọ ẹre mu gha rrie ọghe Nọgbaisi.”