Iwinna 25 - Edo Bible (E Baibol Ẹdo) Version 1996

Pọl Tọn Ẹzọ Mu Gha Rrie Ọghe Nọgbaisi

¹ Ọ ghi rre ikpẹdẹ eha ne Fẹstọs sẹ otọe nii, ọ keghi ke Sisaria gha rrie Jerusalẹm.

² Evba nii ọre avbe igie ohẹn kevbe avbe olotu e Ju na vbe gui ẹzọ Pọl ma rẹn.

³ Iran rinmwian Fẹstọs ne ọ mu ọghọ ye iran egbe ne ọ rhie Pọl gha die Jerusalẹm, rhunmwuda iran khuan khẹ ọre nẹ ne iran gbe ẹe rua vbe odẹ.

⁴ Fẹstọs wanniẹn wẹẹ, “A mu e Pọl khui zẹ vbe oleghan vbe Sisaria, mẹ tobọ mwẹ gha vbe yo evba ban.

⁵ Wa gie avbe ọkaolotu uwa lele mwẹ gha rrie Sisaria ne iran ya gu ẹe gui, a deghẹ ọ mwẹ emwi dan ne ọ ru.”

⁶ E Fẹstọs keghi gbe omwa ikpẹdẹ erẹnrẹn ra igbe vbe ehe ne iran ye, ọ na werriegbe gha rrie Sisaria. Vbe ikpedẹ ne ọ lele ẹe, ọ keghi tota vbe iko ne ọ na bu ohiẹn, ọ na wẹ ne iran rhie Pọl la owa.

⁷ Ugbẹn vbe Pọl ghi rre, avbe Ju ni ke Jerusalẹm rre keghi lẹga ẹre, iran na gha gu ẹe gui okpẹzọ ni bun, sokpan, iran ma sẹtin zẹ erhọkpa ugbaro a.

⁸ Sokpan, Pọl keghi vbe ze ne unu ẹnrẹn wẹ, “I ma fidọn vbe emwi rhọkpa, ọ re Uhi avbe Ju nọ ra Ọgua Osa ra e Nọgbaisi e Rom.”

⁹ Fẹstọs keghi ho ne avbe Ju gha ghe irẹn ẹse, ọ na rhunmwuda ọnii nọ e Pọl wẹ, “U ghi khianmwu vbe Jerusalẹm khekherriọ ne a ya danmwehọ ẹzọ ne iran gu ẹe gui na vbe odọ.”

¹⁰ E Pọl keghi kha wẹẹ, “Odaro iko ne a na bu ohiẹn ọghe Nọgbaisi tobọ ẹre ọre I mudia yi na, ehe ne ọ kere ne a na gui ẹzọ mwẹ. I ma mwẹ emwi ne I ru avbe Ju re, zẹ vbe ne uwẹ tobọ ruẹ rẹnrẹn ẹsẹse.

¹¹ Adeghẹ I de iyi, ighẹ I ru emwikemwi ne ọ kere ne a gbe mwẹ uan baa, I ma wẹ ne a fan mwẹ fua. Sokpan a deghẹ ẹmwata i rre ẹzọ ne iran gun mwẹ gui, ọmwa rhọkpa i sẹtin gba mwẹ rhie fi iran obọ, I tọn ẹzọ mwẹ mu gha rrie ọghe Nọgbaisi.”

¹² Ugbẹn vbe Fẹstọs ghi gu iran ni gu ẹe zẹ iro tae nẹ, ọ wanniẹn wẹẹ, “U tọn ẹzọ ruẹ mu gha rrie ọghe Nọgbaisi nẹ, u ghi do bu e Nọgbaisi o.”

Pọl Vbe Odaro Agripa Kevbe Bẹnis

¹³ Ọ ghi kpẹe fua kherhe, Agripa ne ọba ke ẹe kevbe Bẹnis kegha die Sisaria ne iran do mu otuẹ ọbokhian gie Fẹstọs.

¹⁴ Iran ghi gbe omwa ikpẹdẹ eso nẹ vbe evba, Fẹstọs keghi mu ẹmwẹ Pọl ma ọba wẹẹ, “Okpia ọkpa rre emwa na ne Fẹlis sẹ rae ye eghan vbe ọ kpao.

¹⁵ Mẹ ghi yo e Jerusalẹm, avbe igie ohẹn avbe Ju keghi gui ẹzọ ẹre ma mwẹ, iran wẹ ne I bu ohiẹn uwu gbe ẹe.

¹⁶ Sokpan mẹ keghi tama irẹn wẹ a i ruẹe vbe Rom wẹ ne a bu ohiẹn gbe ọmwa ne a gu gui ẹzọ ba emwi dan ne ọ ru, vbe ẹ i re te irẹn kevbe iran ni gu ẹe gui gba sa ye egbe unu nẹ, kevbe ne a vbe rhie otọ nẹẹn ne ọ ya ta ene unu ẹnrẹn vbe ifi ẹzọ ne a ba ẹre re.

¹⁷ Iran tobọ iran hia ghi rre, I ma vbe ya ẹe rhẹghẹrẹ, sokpan vbe ikpẹdẹ ne ọ lele ẹe, I keghi tota ye iko ne a na bu ohiẹn, I na wẹ ne a rhie ọmwa nii la uwu owa.

¹⁸ Iran ni gu ẹe gui ghi kpaegbe, iran ma gu ẹe gui ẹzọ a i ghẹ ru ne I mẹ te rhie aro yi ighẹ iran gha gu ẹe gui.

¹⁹ Emwi ne iran miẹn ta, ma gberra ẹmwẹ ne iran gba muan vbe ekpa emwi ne iran gho kevbe vbekpa okpia ọkpa ne iran tie eni ẹnrẹn Jesu ne ọ wu nẹ, ne Pọl khare ighẹ ọ rre agbọn.

²⁰ I ma rẹn vbe ne I gha ya gualọ otọ ẹmwẹ vbe nian hẹ rhunmwuda ọnii, I keghi nọ e Pọl deghẹ ọ gha ho ne a gha rrie Jerusalẹm ne a ya danmwehọ ẹzọ ne iran guee gui vbe odọ.

²¹ Sokpan Pọl keghi tọn ẹzọ mu, ọ wẹ ne a mu irẹn ye owa ọkhẹ ne Nọgbaisi do bu ohiẹn irẹn. Ọ re I na rhunmwuda ọnii wẹ ne iran muẹn ye owa ọkhẹ I to do sẹtin rhie ẹre bu Nọgbaisi.”

²² Agripa keghi tama Fẹstọs, “Mẹ ho ne imẹ họn ẹmwẹ ene unu ọmwa na.” Fẹstọs wanniẹn wẹ, “U gha họn ene unu ẹnrẹn akhuẹ.”

²³ Ẹdẹ ghi gbe Agripa kevbe Bẹnis keghi ye oyọnyọn kevbe otiti nana rre. Iran keghi la owa ke iran kevbe ivbiyokuo ni gba khia kevbe emwa ni hin usi ni re ẹvbo nii. Fẹstọs na wẹ ne a rhie Pọl rre, iran keghi rhie ẹre la uwu owa.

²⁴ Fẹstọs keghi kha wẹẹ, “Agripa ne ọba, kevbe uwa hia ni gu ima rre emwa na, wa ghe okpia na, rẹn ọre avbe Ju hia ni rre edinran kevbe ni rre Jerusalẹm do gui ẹzọ ẹre ma mwẹ. Iran gha go wẹ ne a ghẹ gi ẹe di agbọn na ya.

²⁵ Sokpan mẹ ma miẹn wẹ ọ ru emwi dan ọkpa ne a gha rhunmwuda ẹre bu ohiẹn uwu gbe eẹ. Ugbẹn vbe irẹn ghi tobọ ẹre tọn ẹzọ ẹre mu gha rrie ọghe Nọgbaisi, I na wẹ I gha rhie ẹre gha khian.

²⁶ Sokpan I i mwẹ emwi kpataki ne I gha gbẹn gie Nọgbaisi vbe ekpa ẹre, Rhunmwuda ọnii ọre I na do rhie ẹre mudia ye odaro uwa na, kpataki, odaro uwẹ ne ọba Agripa, wẹ wa ghẹ ghi gualọ otọ ẹmwẹ na nẹ, ne i miẹn ehe na miẹn emwi gbẹn.

²⁷ Rhunmwuda, ọ ye vbe emwi ne ọ ma luro vbe aro mwẹ ne a mu oleghan gha khian vbe ne a ma na gbẹnnẹ ọẹn ladian ẹsẹse ighẹ emwi ne a gu ẹe gui ẹzọ ẹre.”