Iwinna 24 - Edo Bible (E Baibol Ẹdo) Version 1996

Avbe Ju Gu E Pọl Gui

¹ Ọ ghi rre usẹn, Ananias ne Ogie Ohẹn keghi viọ ediọn eso kevbe ulaya ọkpa ne a tie eni ẹnrẹn Tetulus ba egbe gha rrie Sisaria. Iran keghi mudia vbe odaro Fẹlis, iran na ba e Pọl ifi ẹzọ.

² Iran keghi tie Tetulus ladian, ọ na suẹn gha gui rhu e Pọl, ọ wẹẹ: “Dọmọ o, Evbavba! Te egbe ghi rọkhọ ima hia nian rhunmwuda ogie ẹwaẹn ne u ya gbe aro ghe ima, ye vbe sẹ ọnii, afiwerriẹ ni bun kevbe ne ọ kere hia ọre u he ru ya gha dọlọ ẹvbo ima yi.

³ Ẹko ọna wa vuọn ima vbe ehe hia kevbe ẹghẹ hia, ma keghi vbe kakabọ kpọnmwẹ uẹn.

⁴ I ma ho ne I da a yi kpẹe gbe, vbene ọ rhirhi a gha ye hẹ, I rinmwian an ne u tohan ima danmwehọ e ne unu mwa.

⁵ Ma miẹn okpia na wẹ, uhunmwu isusu dan nọ. Ọ fian otighi fi avbe Ju egbe la uhunmwu otọ agbọn hia. Ọ keghi vbe re ọkaolotu otu ọkpa ne iran tie eni ẹnrẹn e nazarin.

⁶ Ọ ghi vbe ra mu awua la Ọgua Osa, ọre ima ghi na mu ẹn. [Te ima te ra bu ohiẹn ọnrẹn vbene Uhi ima khare,

⁷ sokpan Lisias ne ọkaokuo keghi rre, ọ na khiẹn ima obọ miẹn ima ẹre.

⁸ Lisias keghi vbe kha wẹ ne emwa ni ra gu ẹe gui bu ruẹ gha dee.] U gha nọ ẹre ọta, wẹ tobọ ruẹ gha la ẹmwẹ ne unu ẹnrẹn rẹn emwi ne ima gu ẹe gui ẹzọ ẹre.”

⁹ Avbe Ju hia keghi ye egbe ba ẹzọ na wẹ ẹmwata nọ.

Pọl zẹ Enẹ Unu Ẹnrẹn Ma Fẹlis

¹⁰ Ne ọ khaemwisẹ keghi ya obọ gu e Pọl guan wẹ ne ọ guan. Pọl keghi kha wẹẹ: “Ẹko hia sẹ mwẹ ọyẹnmwẹ uan vbe I ra zẹ ne unu mwẹ ma ruẹn, rhunmwuda, I rẹnrẹn ighẹ ọ kpẹre ne u kegha re ne ọbuohiẹn vbe uhunmwu otọ na.

¹¹ Zẹ vbene uwẹ gha sẹtin tobọ gualọ otọ ẹre miẹn, ọ ma he gberra ikpẹdẹ iweva ne I kpao gha rrie Jerusalẹm ne I ya ru ugamwẹ.

¹² Avbe Ju ma miẹn vbe I gu ọmwaikọmwa muan ẹmwẹ vbe uwu Ọgua Osa ra ni vbe ruẹn ẹmwẹ ye ọmwarhọkpa ẹko vbe Ọgua ediọn ra eheikehe vbe ẹvbo ni.

¹³ Vberriọ iran i sẹtin zẹ ọre ugbaro a ma ruẹn ighẹ ifi ẹzọ ne iran ba mwẹ re na.

¹⁴ Emwi ne ọ miẹn khama ruẹn ọna khin wẹẹ: Odẹ ne iran khare ighẹ ohoghe nọ ọre I la ga Osanobua avbe erha mwa odede. Sokpan I vbe ya emwi hia ne a gbẹnnẹ ye Uhi e Mosis kevbe ebe avbe akhasẹ yi.

¹⁵ Idaehọ ne iran mwẹ vbe ehe ne Osanobua ye ọre imẹ vbe mwẹ wẹ emwa hia, ọ re ọmwa esi nọ ra ọmwa dan, a gha huẹn iran kpaegbe vbe orinmwi.

¹⁶ Rhunmwuda ọnii ọre I na lo ẹtin mwẹ hia wẹ ne orhiọn mwẹ ghẹ sẹ osẹe gbe mwẹ vbe odaro Osanobua kevbe emwa ne agbọn.

¹⁷ “Ọ ghi rre omwa ukpo eso ne I ghi kpa vbe Jerusalẹm rre, I keghi vbe dọlegbe gha khian ne I rhie igho eso gie emwa mwẹ, kevbe ne I vbe ya zọ ese.

¹⁸ Ẹghẹ ne I na gha ru emwi na ọre iran na miẹn mwẹ vbe uwu Ọgua Osa vbe I yo ulamwẹ akpehuan fo nẹ. Emwa ma gbe ẹbu ye he ne I ye, olighi rhọkpa i vbe rrọọ.

¹⁹ Sokpan avbe Ju eso ni ke ikinkin Esia rre keghi rre evba, iran ni ọre ọ te kee ne iran do tobọ iran gun mwẹ gui ma ruẹn deghẹ iran mwẹ ẹzọ ne iran gha gun mwẹ gui.

²⁰ Ra khekherriọ wẹ ne iran na tama ruẹn ohiẹn ne iran miẹn bu gbe mwẹ ẹghẹ ne I na mudia vbe Iko.

²¹ Sokpan ama wẹ emwi ọkpa ne I ya gha go vbe I mudia ye odaro iran wẹẹ, ‘Emwi ni uwa gun mwẹ gui ba ẹre na ọrọre rhunmwuda ne I na yayi ighẹ emwa ni wulo hia, a gha dọlegbe huẹn iran kpaegbe.’ ”

²² Ẹghẹ nii ọre Fẹlis ne ọ mobọ rẹn emwi vbe ekpa odẹ nii na dobọ ẹzọ ni yi. Ọ tama iran wẹ, “Lisias ne ọkaokuo gha ghi rre, ọre i ghi na bu ohiẹn uwa.”

²³ Ọ na tama ọmwa ne ọ rre asẹ ne a rhie Pọl nẹ dayi wẹ, ne iran ye gha rhie aro lele ẹe, sokpan ne avbe gi ẹe gha fanmwegbua ugbẹnso, kevbe ne a giẹ avbe esiọre gha viọ emwi ne ọ ho giẹe.

Pọl Vbe Odaro Fẹlis Kevbe Drusila

²⁴ Ikpẹdẹ eso ghi gberra nẹ, Fẹlis kevbe Drusila ne amwẹ ọnrẹn keghi gba rre, ọ keghi gie ne a tie Pọl, ọ kegha danmwehọ ẹre vbe ọ ta ẹmwẹ iyayi Jesu Kristi.

²⁵ Sokpan Pọl ghi suẹn gha ta ẹmwẹ uyinmwẹ esi, a mu egbe ye ọghọ kevbe Ẹdẹ Ibuohiẹn, ohan kegha mu e Fẹlis, ọ na kha wẹẹ, “U sẹtin gha khian nẹ, I gha dọlegbe tie ruẹ vbe i a miẹn obọ.”

²⁶ Vbe uwu ẹre nii, rẹn keghi te vbe gha ro ighẹ Pọl gha rhie igho ne irẹn, rhunmwuda ọnii, ọ na gha tiẹre gu guan kugba kẹghẹrẹ.

²⁷ Ukpo eva ghi gberra nẹ Pọsiọs ne ovbi e Fẹstọs keghi rhie ihe Fẹlis vbe ukpo e Ne ọ khaemwisẹ. Fẹlis keghi ho ne avbe Ju gha ta ẹmwẹ ọnrẹn ẹse, ọ na rhunmwuda ọnii sẹ Pọl rae ye ẹwẹdọ.