Iwinna 21 - Edo Bible (E Baibol Ẹdo) Version 1996

Pọl Ke Gha Rrie Jerusalẹm

¹ Ma keghi gbe ọkhian ẹdẹ hia ne iran, ma na si okhian. Ma ghi gua okọ fian ẹzẹ rra nẹ, ma keghi do sẹ Kọs, vbe ikpẹdẹ ne ọ lele ẹe, ma keghi sẹ Rods, ma na ghi ke evba kpao gha rrie Patara.

² Evba ọre ima na miẹn okọ ne ọ rrrie Fonisia, rhunmwuda ọnii, ma keghi la okọ, a na gua ẹe kpao.

³ Ma keghi do sẹ ehe ne ima ke gha bẹghe Saiprọs, ma keghi gua okọ ghe efẹn ne ogienẹ vbọ ghe Siria. Ma keghi tuorre vbe Taia, ehe ne okọ na gha fannọ ihẹ ye otọ.

⁴ Ma keghi miẹn ivbi iyayi eso vbe evba, ma na gu iran gbe uzọla ọkpa. Iran keghi le ekpa ẹtin Orhiọn tama Pọl ne ọ ghẹ ye Jerusalẹm.

⁵ Sokpan ẹghẹ ne ima gu iran gbe ghi gba nẹ, ma keghi kpao, a na la odẹ. Iran hia, emọ kevbe amwẹ keghi su ima ya sẹ ehe ne ẹvbo ni sẹe. Ma hia keghi diguẹ vbe ọkpẹn ẹzẹ, ma na na erhunmwu.

⁶ Ma ghi gbe ọkhian ẹdẹ hia ne egbe nẹ, ma keghi la okọ, iran na werriegbe gha rrie owa.

⁷ Ma keghi deyan okhian ma na gua ke Taia gha rrie Pitolemais ehe ne ima na ya van tuẹ avbe etẹn, a keghi vbe gu iran gbe ikpẹdẹ ọkpa.

⁸ Vbe ikpẹdẹ ne ọ lele ẹe ma keghi kpao, a na do sẹ Sisaria. Ma kegha rrie owa Filip ne ọ kpe orhu iyẹn ne ọ maa, ma na di owa ẹre ya. Rẹn keghi re ọkpa vbe uwu iran ihinrọn ne a zẹe vbe Jerusalẹm.

⁹ Rẹn keghi mwẹ ivbi ẹre ne uvbi enẹ ni kpe orhu ẹmwẹ Osanobua.

¹⁰ Ọ ghi rre omwa ẹdẹ eso ne ima sẹ evba, akhasẹ ọkpa ne a tie eni ẹnrẹn Agabus keghi ke Judia rre.

¹¹ Ọ keghi bu ima gha dee, ọ keghi rhie ugbẹkun e Pọl, ọ keghi yae gba egbe ẹre obọ vbe owẹ, ọ wẹẹ, “Orhiọn Ne Ọ Huanrẹn wẹ, ‘Vbe nian ọre avbe Ju khian mu ọmwa ne ọ yan ugbẹkun na gba vbe Jerusalẹm, iran ghi mu ẹn gie avbe emwa ne ẹ i re Ju.’ ”

¹² Ma ghi họn ẹmwẹ na, ima kevbe emwa ni rre evba keghi rinmwian Pọl wẹ ne ọ ghẹ ye Jerusalẹm.

¹³ Sokpan rẹn keghi wanniẹn wẹẹ, “Vbe uwa ru na yi, ne uwa na viẹ ya mu mwẹ orhiọn rueghe? Mẹ mu egbe nẹ, ẹ i re ọghe ne a mu mwẹ gba ọkpa, sokpan ne i wu vbe Jerusalẹm ye ẹmwẹ Nọyaẹnmwa Jesu.”

¹⁴ Ma ma sẹtin fi ẹre ekhọe werriẹ, ọre ima na ghi kẹtin rre, ma na ghi kha wẹ, “E nọ yẹ Osanobua ọre a gha ru.”

¹⁵ Ma ghi kpẹe vbe evba kherhe, ma keghi kun emwi ima, ma na kpao gha rrie Jerusalẹm.

¹⁶ Eso vbe uwu avbe erhuanegbe ni rre Sisaria keghi vbe lele ima iran na rhie ima gha rrie ọghe okpia ne a tie eni ẹnrẹn Minasin, ọmwa ne ima ra di owa ẹre ya. Ovbi e Saiprọs nọ, rẹn keghi re usun asa nikaro vbe iran ni yayi ke omuhẹn gha dee.

Pọl Ya Tue Jems

¹⁷ Ma ghi sẹ Jerusalẹm, avbe etẹn keghi wa ghọghọ mu ima.

¹⁸ Ẹdẹ ghi gbe, Pọl keghi viọ ima ba egbe ya tue Jems, avbe ediọn esọsi hia kevbe gha rre evba.

¹⁹ Pọl ghi tue iran nẹ, ọ keghi na iyẹn emwi hia ne Osanobua la obọ iwinna irẹn ru vbe uwu iran ne ẹ i re Ju ma iran.

²⁰ Iran ghi danmwehọ ẹre nẹ, iran keghi rho Osanobua vbe uyi. Iyeke ọnii, iran keghi tama Pọl wẹẹ, “Ọtẹn mwa, wẹ tobọ miẹn vbene emwi hia ye hẹ. Arriaisẹn arriaisẹn ọre emwa e Ju ni he yayi wa khin, deba ẹre, te iran wa he gba Uhi mu obọ gbangbaangban.

²¹ Iran họẹn wẹ te uwẹ ya gha tama avbe Ju ni rre ẹvbo iran ni i re Ju wẹ ne iran mu Uhi e Mosis fua, wẹ ne iran ghẹ ghi rhuẹ ivbi iran ra ne iran gha lele ilele avbe Ju.

²² Ẹ i mwẹ iran ma họn ighẹ u rre, vbe a gha ruẹe hẹ khekherriọ?

²³ Emwi ne ima ra tama ruẹn u ghi ruẹe o, Ikpia enẹ rre emwa na ni ye egbe ye ulamwẹ.

²⁴ Lele iran gha khian, ne u ya deba iran yo ulamwẹ akpehuan, ne u ha osa emwi ne iran lo ro, ẹghẹ nii, iran gha sẹtin gbẹn eto mu otọ. A gha ruẹe vberriọ, emwa hia ghi do rẹn wẹ ẹmwata i zẹdẹ rre ẹmwẹ ne iran họẹn vbe ekpa ruẹ, sokpan wẹ te uwẹ tobọ ruẹ wa ye ẹmwẹ Uhi Mosis ru emwi.

²⁵ Sokpan zẹ vbe ọghe iran ne ẹ i re Ju ni do yayi, ma gbẹn ebe gie iran nẹ ya kha ma iran wẹ ne iran ghẹ rri emwi ne a ya ru ẹbọ, ra esagiẹn ke sagiẹn, kevbe aranmwẹ ne a kuẹn gbua a, kevbe ne iran gha biegbe ne ẹmwẹ oghẹ.”

²⁶ Ẹdẹ ghi gbe, Pọl keghi viọ emwa ni, ọ keghi de ba iran yo ulamwẹ akpehuan. Iyeke ọnii, ọ kegha rrrie uwu Ọgua Osa, ọ na ya tama iran inu ikpedẹ ne ọ khian gha khin ne ẹghẹ akpehuan gha ya gba, ne ọkpọkpa vbe uwu iran miẹn ehe na do zọ ese.

Iran Mu E Pọl Vbe Uwu Ọgua Osa

²⁷ Ọ ghi bu ẹghẹ ne ikpẹdẹ ihinrọn ni gha ya gba, avbe Ju eso ni ke otọe Esia rre keghi miẹn e Pọl vbe uwu Ọgua Osa, iran na kpe emwa nii ekpe ye ọre egbe, iran na mu e Pọl.

²⁸ Iran kegha go kha wẹ, “Ivbi Izrẹl, wa bu rre, wa ghe okpia ne ọ lele ehe hia khian ya gha tama emwa hia wẹ ne iran ghẹ zẹ ye ẹmwẹ ivbi Izrẹl ra Uhi e Mosis kevbe Ọgua Osa. Ghe vbe ọ vbe hẹ emwa ne ẹ i re Ju la uwu Ọgua Osa ne ọ do ya mu awua la ehe ne ọ huanrẹn na!”

²⁹ (Emwi ne ọ ya iran kha vberriọ ọrọre wẹ iran ka miẹn Pọl ke ẹe kevbe Trofimọs ne ovbi e Ẹfisọs vbe ore usin, iran keghi te gha ro ighẹ Pọl rhie ẹre la Ọgua Osa.)

³⁰ Adesẹ ore ẹvbo hia keghi wa tighi ua, iran hia keghi wa mu vẹ, iran gua Pọl rhie, iran na hiọrọ ẹe hin uwu Ọgua Osa rre. Vbe ọwarọkpa nii, iran na khui urho Ọgua Osa.

³¹ Te emwa nii ghi te ra gbe Pọl rua ọre iran na gie uhunmwu na tama ọkaokuo ivbiyokuo e Rom wẹ otutu tu vbe Jerusalẹm.

³² Vbe ọwarọkpa nii, ọkaokuo ni keghi viọ emwa ni rre asẹ kevbe ivbiyokuo eso ba egbe, ọ na gbe egbe la uwu ẹbu nii. Ugbẹn vbe emwa nii, ghi bẹghe ẹre ke ẹe kevbe ivbiyokuo, iran keghi da obọ ugbemwẹ ne iran te gbe Pọl yi.

³³ Ọkaokuo keghi bu e Pọl gha khian, ọ mu ẹn, ọ na wẹ ne a guọ eghan eva ye ọre obọ. Ọ keghi nọ iran wẹ, “Vbe okpia na ke rre yi? Vbe ọ ru?”

³⁴ Emwa eso vbe uwu ẹbu kegha talọ ẹmwẹ na, eso talọ ọvbehe. Ehia keghi lighi sẹrriọ wẹ ọkaokuo nii ma miẹn uhunmwu emwi ne ọ sunu kpataki. Ọ na rhunmwuda ọnii wẹ ne emwa rẹn mu e Pọl gha rrie owa ne gbain.

³⁵ Iran ghi rhie ẹre sẹ ikpawẹ, avbe ivbiyokuo keghi kpa ẹre igede rhunmwuda aro emwa ni hia keghi wa hin ukhunmwu.

³⁶ Iran keghi gha wa gha vẹ lele ẹe dee, iran na gha go tie, “Gbe ẹe rua.”

Pọl Zẹ Ne Unu Ẹnrẹn

³⁷ Ugbẹn vbe iran ghi te ra mu e Pọl la owa ne gbain nii, ọ keghi tama ọkaokuo ni wẹ, “Lahọ ni guẹ guan?” Ọkaokuo keghi nọ rẹn wẹ, “Wẹ họn e Grik ra?

³⁸ Ọnii nọ wẹ, wẹ i re ovbi Igipt nii ne ọ si otighi ye ẹvbo nẹdẹ eso, ọ na viọ emwa ni sọtẹ arriaisẹn enẹ ba egbe la otọ ẹgbo?”

³⁹ E Pọl keghi wanniẹn wẹẹ, “E Ju ọre I khin, Tasọs ne ọ rre Sisilia, ọre a na biẹ mwẹ, ovbi ẹvbo ne ẹ i re akhua ọre I khin. Lahọ gun mwẹ gu emwa na guan.”

⁴⁰ Ọkaokuo nii keghi rhie otọe nẹẹn, rhunmwuda ọnii, Pọl keghi mudia yan ikpawẹ, ọ na ya obọ gbe emwa ni ekhakha. Ugbẹn vbe iran ghi gbẹdọ nẹ, Pọl kegha zẹ Hibru ya gu iran guan, ọ wẹẹ: