Iwinna 20 - Edo Bible (E Baibol Ẹdo) Version 1996

Ọ Khian Gha rrie Masidonia Kevbe Gris

¹ Ugbẹn vbe owogho ghi dọyọ nẹ, Pọl keghi tie ivbi iyayi, ọ keghi ya ẹmwẹ igiẹdu gbe ọkhian ẹdẹ hia ne iran. Rẹn keghi kpao, ọ na gha rrie Masidonia.

² Ọ keghi lele isoko ni hia gaa, ọ kegha ye ẹmwẹ ni bun rhie igiẹdu ne iran. Ọ keghi ke evba kpao gha die Gris, ehe ne ọ na do gbe uki eha.

³ Rẹn ghi te mu egbe ne ọ gha rrie Siria, ọ keghi vẹ nẹ rẹn ighẹ avbe Ju gha si uma ne iran gbe irẹn ruan, ọ na ghi wẹ ne iran ya la Masidonia dọlegbe gha rrie.

⁴ Sopata, ovbi e Pirọs ne okpia ne ovbi ẹvbo ne a tie ẹre Beria, keghi lele ẹe kpa, deba Aristakọs kevbe Sekundus ne ivbi ẹvbo ne a tie ẹre Tẹsalonaika kevbe Trofimọs ni ke otọe ẹvbo Esia rre.

⁵ I ran keghi karo, iran na ya diakhẹ ima vbe Troas.

⁶ Ma keghi gua okọ kpao vbe Filipai vbe iyeke Emwiukpo Ebrẹd Ne ọ ma hue. Ọ ghi rre ikpẹdẹ isẹn, ma keghi ya vbe iran vbe Troas, ma na gbe uzọla ọkpa vbe evba.

Okhian Okiekie Ne Pọl Khian Ye Troas

⁷ Vbe Ẹdẹ uzọla, ma keghi si egbe koko ne a rri evbare ivbiotu. Pọl kegha gu avbe emwa ni guan, ọ keghi guan rhinrin ya sẹ ogiasọn rhunmwuda rẹn gha kpao vbe ẹdẹ a gbe.

⁸ Ukpa keghi wa bun vbe egedege nii vbe ehe ne ima gha ye.

⁹ Ọmọ okpia ọkpa keghi tota ye ewindo, a tie eni ẹnrẹn Utikọs. Ugbẹn vbe Pọl ghi ye si ẹmwẹ ne ọ guan tan, ovbe keghi kakabọ gha gbe Utikọs vbe okiekie, ọ keghi wa vbiua, ọ na ke omuyan ne ogie eha ọghe egedege nii ne fi otọ. Iran ghi muẹn kpaegbe, ọ wu nẹ.

¹⁰ Sokpan Pọl keghi tuorre, ọ lovbiẹ yan rẹn, ọ keghi si ẹe kuẹn, ọ keghi tama iran wẹ, “Wa ghẹ fian afianma, ọ ma wu.”

¹¹ Rẹn keghi dọlegbe hin egedege, ọ keghi gia ebrẹd, iran na re. Ọ keghi ye gha gu iran guan ya sẹ ẹghẹ ne ovẹn ya yan rre, ọ keghi kpao.

¹² Iran keghi rhie igbama ni la owa, ọ ma wu, ekhọe iran keghi sẹ otọ.

Ke Troas Kpao Gha rrie Mailitọs

¹³ Ma keghi ya la okọ, a na gua gha rrie Asọs, eke ne ima ra na ya mu e Pọl. Otọ ọre iran la gha rrie evba, ọre ọ na wẹ ne ima do mu irẹn vba.

¹⁴ Rẹn ghi do vba ima vbe Asọs, ma keghi muẹn la okọ ma na gha rrie Mitileni.

¹⁵ Evba ma ke gua okọ kpao ma keghi do sẹ Kios vbe ikpẹdẹ ne ogieva. Ikpẹdẹ ne ọ lele ẹe ma keghi sẹ Samọs. Ikpẹdẹ ne ọ lele ẹe ama ke do sẹ Mailitọs.

¹⁶ Pọl keghi te wẹ ne iran gua okọ la odẹ Ẹfisọs ne a ghẹ vbe mu ẹghẹ rhia vbe ikinkin Esia. Rẹn keghi wa tua okhian ne ọ miẹn ehe na rherhe sẹ Jerusalẹm, a deghẹ ọ gia ru vbe ẹdẹ Pẹntikọst zẹẹ.

Pọl Gbe Ọ Khian Ẹdẹ Hia Ne Ediọn Ni Rre Ẹfisọs

¹⁷ Pọl keghi gie uhunmwu ke Mailitọs gha rrie Ẹfisọs, ọ na wẹ ne avbe ediọn esọsi do miẹn irẹn vbe evba.

¹⁸ Ugbẹn vbe iran ghi rre, ọ tama iran wẹẹ, “Wa rẹn vbene I gha ru hẹ vbe ẹghẹ ne I gbe vbe ehe ne uwa ye ke ẹdẹ ne I fi owẹ la otọe Esia gha dee.

¹⁹ Ke ameve kevbe imuegberriotọ ọre I ya winna iwinna mwẹ zẹ vbe ọguọmwadia e Nọyaẹnmwa vbe uwu ọlọghọmwa ne I miẹn vbe ne avbe Ju na gha khuan khẹ mwẹ.

²⁰ Wa rẹnrẹn wẹ vbe uwu emwi hia ne ọ gha ma uwa egbe, ọkpa ne I ke ya ẹ i rrọọ vbe ne I na gha kpe orhu, I keghi vbe gha ma emwa emwi vbe adesẹ ore kevbe dọmwadẹ owa uwa.

²¹ Iran ne Ju kevbe iran ne ẹ i re Ju, te I si agbada vbe unu ya tama emwa hia wẹẹ ne iran zobọ vbe orukhọ, ne iran bu Osanobua gha dee kevbe ne iran ya Nọyaẹnmwa Jesu yi.

²² Wanwanna nian, I rrie Jerusalẹm vbene Orhiọn Ne Ọ Huanrẹn gie mwẹ, vbene I ma na rẹn emwi ne ọ gha ruan mwẹ vbe odọ.

²³ Emwi ọkpa I rẹnrẹn wẹ ẹvbo ne I rhirhi a sẹ ọre Orhiọn Ne Ọ Huanrẹn na tama mwẹ wẹ eghian kevbe ukpokpo dia khẹ mwẹ.

²⁴ Sokpan mẹ wa ka uhunmwu mwẹ ye ne ẹ i mwẹ esa, ne I miẹn ehe na khain okhian ne ọ wa mẹ sẹ otọ, ne I vbe winnaẹn fo ighẹ iwinna ne Nọyaẹnmwa Jesu wa mẹ ne I ru, ọnii nọ wẹ ne I ya wewe Iyẹn Ne ọ maa ọghe Ẹsọhẹ Osanobua.

²⁵ “I khian la ehe hia vbe uwu uwa vbe ne I na kpe orhu Arriọba Osanobua. Banbanna nian, mẹ rẹnrẹn ighẹ ne ọ gha ye dọlegbe miẹn mwẹ i ghi rre uwa na.

²⁶ Rhunmwuda ọnii ọre I na si agbada vbe unu tae ma uwa ẹrẹna: a i ghẹ miẹn ighẹ a ye miẹn ne ọfuan vbe uwu uwa ẹ i ghi rre urhu mwẹ.

²⁷ Rhunmwuda, emwamwa Osanobua hia, ọkpa ne I ke ya ne I ma tama uwa ẹ i rrọọ.

²⁸ Wa gha gbe aro ghe egbe uwa kevbe ohuan hia ne Orhiọn Ne Ọ Huanrẹn viọ ne uwa gha su, wa gha re ọsuohuan esọsi Osanobua ne ọ ya uwu Ovbi ẹre ya khian oghẹ ẹe.

²⁹ Rhunmwuda mẹ rẹn ighẹ I gha ghi kpao nẹ nian, avbe oduma ne isamwisan gha la uwu uwa, iran i ra fi yi vbe avbe ohuan.

³⁰ Ẹghẹ dee ne emwa eso vbe uwu uwa gha na ta ohoghe ne iran ya bibi emwa ni yayi eso odẹ hẹ ba egbe.

³¹ Rhunmwuda ọnii, wa khẹ ye egbe, wa ghi yerre wẹ ukpo eha gbalaka ọre I ya gha ma edọmwadẹ ọghọe vbe uwu uwa emwi vbe asọn kevbe avan ke imẹ ke ameve.

³² “Wanwanna, I viọ uwa ne Osanobua gha su deba ẹmwẹ ẹsọhẹ ọghọe. Rẹn gha sẹtin ye uwa digiẹ, ọ ghi vbe rhie afiangbe ne ọ viọ khẹ emwa rẹn hia ne uwa.

³³ I ma ye aro ye ẹrọnmwọ, oze ra ukpọn ọmwaikọmwa.

³⁴ Wa tobọ uwa rẹnrẹn wẹ obọ mwẹ na ọre I ya khuan gha koko egbe mwẹ koko emwa ne I hẹ khian.

³⁵ Vbe uwu emwi hia, I rhie ma uwa wẹ vbe nian ọre ọ kere ne I ma kakabọ gha winna ne a miẹn ehe na ye iran ni ma wo vbe egbe obọ. Wa ye ẹmwẹ ne Nọyaẹnmwa Jesu tobọ ẹre ta ẹe rre wẹẹ, ‘Ne a gha rhie ne emwa ọvbehe ọre ọghọ ye sẹ ne a gha ghe emwa ọvbehe obọ.’ ”

³⁶ Pọl ghi guan fo nẹ, ọ keghi deba iran diguẹ, ọ na na erhunmwu.

³⁷ Ehia keghi wa gbe akhe eve ua, iran keghi gbae ginna egbe iran kegha mu ẹre unu hiẹnhiẹn ya gbe ọkhian ẹdẹ hia nẹẹn.

³⁸ Ẹmwẹ ne ọ mobọ da iran sẹ vbọ ọrọre ne ọ na kha wẹẹ iran i ra dọlegbe miẹn irẹn aro ọvbehe. Iyeke ọnii, iran keghi ya suẹe sẹ okọ.