Iwinna 2 - Edo Bible (E Baibol Ẹdo) Version 1996

Urremwẹ Orhiọn Ne Ọ Huanrẹn

¹ Ugbẹn vbe ọ ghi sẹ ẹdẹ Pẹntikọst, iran ni yayi hia keghi si egbe koko ye ihe ọkpa.

² Vbe udomwurri, iran keghi họn ogbigbi ke odukhunmwu gha dee, ọ yevbe ọghe okpẹhoho ne ọ hoho, ọ keghi wa vuọn owa nii ne iran tota yi.

³ Iran keghi bẹghe emwi eso ni ye vbe aranmwẹ erhẹn, ọ kegha miẹn otọ khian, aranmwẹ nii keghi dekan emwa hia ni rre evba.

⁴ Iran hia keghi wa vuọn ne Orhiọn Ne Ọ Huanrẹn, iran kegha zẹlẹ ẹvbo ọvbehe, zẹ vbene Orhiọn rhie ẹtin ne iran.

⁵ Avbe Ju keghi rre Jerusalẹm, emwa ni ke dọmwadẹ ẹvbo vbe otọ agbọn gha dee do ru ugamwẹ.

⁶ Ugbẹn vbe iran ghi họn ogbigbi na, ehia keghi do gbe ẹbu ye evba, ọ keghi yan iran hia unu uan, rhunmwuda dọmwadẹ ọghọe keghi họn vbe iran ni yayi zẹ ẹvbo irẹn guan.

⁷ Vbe uwu ne ọna yan iran unu uan yan iran aro ua nii, iran wẹẹ, “Ivbi e Galili iran ni guan na hia khin.

⁸ Vbe a ghi na miẹn hẹ yi wẹ, ma hia wa họn vbe iran zẹlẹ ẹvbo ima ya guan?

⁹ Ma ni ke Patia rre kevbe Midia, Ẹlam, Mẹsopotamia, Judia, Kapadosia, Pọntus, Esia,

¹⁰ Ke Frigia Pamfilia, kevbe Igipt kevbe iwewe Libya, ọkpẹn Sairin kevbe Rom rre.

¹¹ Kevbe avbe Ju, kevbe emwa ne ẹ i re Ju ni ghi ye egbe khian Ju, eso ni ke Kret kevbe Arebia rre. Ma. hia wa họn vbe iran ye ẹvbo ima ta ẹmwẹ iwinna nọkhua ne Osanobua winnaẹn.”

¹² Vbene ọ yan iran unu uan, ọ na vbe sunsun ye iran aro nii, iran kegha nọ egbe wẹẹ, “Vbe a ya ena kha?”

¹³ Sokpan, eso vbe uwu iran kegha ye ivbi iyayi na gbe ogie iran wẹẹ, “Ayọn ọre ọ gbe iran na!”

Ikporhu Pita

¹⁴ Ẹghẹ ni ọre Pita ghi na guakpao, ke irẹn kevbe avbe Ukọ ne owọrọ nekpa, ọ keghi tọn urhu mu ya gu iran guan: “Wa ne Ju ne ihomwa, kevbe uwa hia ni rre Jerusalẹm, wa danmwehọ, ne I tama uwa emwi ne a ya avbe emwi na kha.

¹⁵ Ẹ i re ayọn ọre ọ gbe iran na, zẹ vbene uwa te ro, ẹgogo ihinrin vbe owiẹ ọre a ye na.

¹⁶ Emwi ne akhasẹ Joẹl ta ye otọ ọre ọna khin wẹẹ,

¹⁷ “ ‘Ọ gha sẹ ẹdẹ okiekie, erriọ Osanobua khare: I gha hihiẹ Orhiọn mwẹ yan emwa hia. Ivbi uwa ne ikpia kevbe ne ikhuo gha guan ẹmwẹ akhasẹ avbe igbama ghi gha miẹn umian, avbe ọmaẹn ghi gha mian imina.

¹⁸ Kevbe avbe eviẹn mwẹ, ne ikpia kevbe ne ikhuo, I gha hihiẹ Orhiọn mwẹ yan iran ẹdẹ nẹdẹrriọ iran ghi gha guan ẹmwẹ akhasẹ.

¹⁹ I gha rhie ọyunnuan ma vbe aro iso, kevbe iwinna ọyanaroua vbe agbọn vbe ototọ. Esagiẹn kevbe erhẹn kevbe ighogho nọ mwẹ imi.

²⁰ Owẹn gha so ebiebi, uki ghi gha baa vbe esagiẹn, vbe Ẹdẹ uyi nọkhua ọghe Nọyaẹnmwa te do rre.

²¹ Ọmwa ne ọ rhirhi da tie eni Nọyaẹnmwa, a gha miẹn rẹn fan.’

²² “Wa danmwehọ ẹmwẹ na, wa ne ivbi Izrẹl. Jesu ne ovbi Nazarẹt keghi re ọmwa ne Osanobua gie ẹre uhunmwu kpataki, ne ọ miẹn ehe na gie uwa rẹn ighe ẹmwata nọ, Osanobua keghi la ekpa ẹre winna iwinna ọyunnuan, iwinna ọ yan aro ua kevbe ama, wa tobọ uwa vbe rẹn vberriọ, rhunmwuda, sirra uwa hia ọre a na ru emwi na.

²³ Osanobua tae nẹ, ọ kevbe tobọ ẹre mwamwaẹn zẹ vbe iho ọghọe, ne a rhie Jesu yan uwa obọ. Wa keghi gbe ẹe rua, wa keghi gie iran ne emwa orukhọ kan rẹn mu ugbugbe.

²⁴ Osanobua keghi huẹn ọnrẹn kpaegbe vbe idin, ọ keghi faẹn ye otọ Vbe obọ uwu obalọ, rhunmwuda ọ ma gia ru wẹ ne uwu wu muẹn ye eghan ẹdẹdẹmwẹdẹ.

²⁵ Rhunmwuda, ẹmwẹ ne Devid tae vbe ekpa ẹre ọre ọna khin: “ ‘Ẹghẹ hia ọre I ya bẹghe Nọyaẹnmwa vbe odaro mwẹ, rhunmwuda, ọ rre obọ erha ọmwa mwẹ, ne ohan ghẹ miẹn ehe na mu mwẹ.

²⁶ Rhunmwuda ọnii, orhiọn mwẹ ghọghọe, ẹmwẹ ne unu mwẹ vbe vuọn ne oghọghọ, kevbe imẹ, I rhe re ọmwa kẹkan, I gha gbe ẹkun sẹ otọ vbe idaehọ.

²⁷ Rhunmwuda, wẹ i ra sẹ orhiọn mwẹ rae, ye agbọn iran ni wulo nẹ. Wẹ i ra gie ọguọmwadia ne ọ ho ẹmwẹ ruẹn, ye egbe miẹn ọ kẹkẹe.

²⁸ Wẹ ma mwẹ odẹ ne ọ rrie odẹ ẹfe nẹ, u gha mudia ke mwẹ, ne u rhie oghọghọ mẹ.’

²⁹ “Wanwanna etẹn mwẹ, I gha rhan otọ ẹmwẹ Devid ne erhamwa odede ma uwa. Ọ wu, a keghi re ẹre. Idin ẹnrẹn ye gu ima rre emwa do sẹ ẹdẹ ne ẹre na.

³⁰ Akhasẹ rẹn khin, ọ rẹn emwi ne Osanobua ve irẹn re. Osanobua tama rẹn wẹ, rẹn gha ya ọkpa vbe uwu avbe uniẹn ọnrẹn ma ọba, zẹ vbene irẹn vbe ye.

³¹ Devid rẹn emwi ne Osanobua khian ru, ọ keghi guan kan ẹmwẹ arhiọkpaegbe ọghe Mẹzaia wẹẹ: “ ‘A ma sẹ ọe rae ye otọe iran ni wulo nẹ, ikinnegbe ẹre ma kẹkẹ.’

³² “Jesu ne a kha na, Osanobua huẹn ọnrẹn kpao vbe idin, ma na hia ọre osẹe ne aro ẹre sẹ ọe.

³³ A tọẹn mu gha rrie obọ erha ọmwa Osanobua, ne ọ ya miẹn ẹre Orhiọn Ne Ọ Huanrẹn ne Erha ẹe ve ẹre. Emwi ne uwa ghi bẹghe na nian, kevbe ne uwa vbe họn, emwi ne ọ ya ru ima ẹse nọ, ọ keghi hihiẹe yan ima.

³⁴ Rhunmwuda, Devid tobọ ẹre ma hin odukhunmwu gha rrie ẹrinmwi, sokpan rẹn khare wẹẹ, “ ‘Nọyaẹnmwa tama Nọyaẹnmwẹ wẹẹ, Tota ye obọ erha ọmwa mwẹ vbe emwa na,

³⁵ rhinrin mẹ te do ye avbe eghian ruẹn khian emwi ne a viọ owẹ yan vbe ototọ owẹ ruẹ.’

³⁶ “Rhunmwuda ọnii, wa ne ivbi Izrẹl, wa hia rẹn nian wẹẹ, Jesu nii ne uwa kan mu ugbugbe, Osanobua ya ẹe khian Nọyaẹnmwa kevbe Mẹzaia nẹ.”

³⁷ Ugbẹn vbe iran họn ẹmwẹ na, orhiọn iran ma ghi sẹ otọ, iran keghi nọ Pita kevbe avbe ukọ nekpa wẹẹ, “Etẹn de emwi ne ima ghẹ ghi ru nian?”

³⁸ Pita tama iran wẹẹ, “Dọmwadẹ ọghọe vbe uwu uwa zẹ obọ vbe orukhọ ne a ru ne a do sa amẹ ne uwa, vbe eni Jesu Kristi, ne a miẹn ehe na ya orukhọ uwa bọ uwa, wa gha vbe mwẹ Orhiọn Ne Ọ Huanrẹn ne Osanobua gha ya ru uwa ẹse.

³⁹ Rhunmwuda, wa kevbe avbe ivbi uwa ọre Osanobua ve ẹre emwi na kevbe iran ni rre urria, kevbe avbe emwa hia fẹẹrẹ ne Osanobua gha tie rrie egbe.”

⁴⁰ Pita keghi kakabọ gu iran guan, ọ keghi ya ẹmwẹ ni bun bu iran ude wẹẹ, ne iran rhie uhunmwu iran lẹre hin ikhi ne a ra do rria emwa dan na re.

⁴¹ Ni bun vbe uwu iran keghi ya ẹmwẹ ọnrẹn yi, a keghi sa amẹ ne iran, emwa ni do ya egbe ba iran vbe ẹdẹrriọ kegha re omwa arriaisẹn eha.

⁴² Iran keghi wa ya ẹghẹ iran hia gha ruẹ emwi vbe obọ avbe ukọ, iran keghi rhie egbe ba iran. Iran kevbe gha re vbe evbare ne iran hia gha re, iran kevbe gha deba iran na erhunmwu.

Uyinmwẹ Iran Ni Yayi

⁴³ Avbe ukọ kegha ru emwi ọyunnuan ni bun, ọna kegha ya ohan gha mu emwa hia.

⁴⁴ Iran ni yayi hia keghi wa gba gha ru emwi hia kugbe, iran keghi ghae ne egbe vbe emwi ne iran mwẹ.

⁴⁵ Iran ghẹ ghi khiẹn emwi ewe iran, kevbe emwi ne iran mwẹ, iran hia ghi gba gha igho ẹre zẹ vbene edọmwadẹ ọghọe i te ya mwẹ.

⁴⁶ Ẹdẹgbegbe, iran keghi ya gha mi egbe vbe uwu Ọgua Osa zẹ vbe otu ọkpa. Iran keghi gba gha rri evbare iran kugbe vbe owa, vbe ọyẹnmwẹ kevbe amu egbe rriotọ.

⁴⁷ Iran kegha rho Osanobua vbe uyi, agbọn hia keghi wa gha ta ẹmwẹ iran ne ọ maa. Nọyaẹnmwa kegha viọ avbe emwa ne a ra miẹn fan ba otu iran ẹdẹgbegbe.