Iwinna 19 - Edo Bible (E Baibol Ẹdo) Version 1996

Pọl Vbe Ẹfisọs

¹ Ẹghẹ ne Apọlọs na gha rre Kọrinti, e Pọl keghi khian la uwu otọ ẹvbo nii, ọ keghi lae do sẹ Ẹfisọs. Rẹn keghi vbe miẹn erhuanegbe eso vbe evba.

² Ọ keghi nọ iran wẹ, “Wa miẹn Orhiọn Ne Ọ Huanrẹn vbe ẹghẹ ne uwa na yayi ra?” Iran keghi wanniẹn, “Ma ma kue rẹn deghẹ emwi ne a tie ẹre Orhiọn Ne Ọ Huanrẹn vbe rrọọ.”

³ Rẹn keghi nọ iran wẹ, “Vbe a ya sa amẹ ne uwa hẹ yi khekherriọ?” Iran wanniẹn wẹ, “Isamẹ ọghe Jọn nọ.”

⁴ Pọl keghi wanniẹn wẹ, “Isamẹ ọghe Jọn, ọ ghe iran ni ro iro fi uyinmwẹ werriẹ nọ, rẹn keghi vbe kha ma emwa Izrẹl wẹ ne iran ya ọmwa ne ọ ra rre lele irẹn yi, ọnii ọrọre Jesu.”

⁵ Iran ghi họn ọnọna, a keghi ya eni Nọyaẹnmwa Jesu sa amẹ ne iran.

⁶ Pọl keghi viọ obọ ẹre yan iran, Orhiọn Ne Ọ Huanrẹn keghi tuorre yan iran, iran keghi zẹ ẹvbo ne ama i rẹn guan, iran keghi vbe gha ta ẹmwẹ Osanobua.

⁷ Iran keghi re ikpia iweva.

⁸ Pọl keghi la Ọgua ediọn, ọ keghi ya uki eha mobọ gu avbe emwa ni guan, ọ keghi gu iran gha muan ẹmwẹ, ọ kegha ho ne ọ fi iran ekhọe werriẹ ghe ẹmwẹ Arriọba Osanobua.

⁹ Sokpan eso vbe uwu iran keghi ze utun vbe ehọ, iran ma yayi, iran kegha filo unu gie Odẹ ọghe Nọyaẹnmwa sirra emwa nii hia. Pọl keghi rhunmwuda ọnii sẹ iran rae, ọna viọ avbe erhuanegbe nii, ọ kegha ma emwa emwi ẹdẹgbegbe vbe owa iruẹmwi ọghe Tiranọs.

¹⁰ Ukpo eva ọre a ya gha ru ọna sẹrriọ wẹ emwa hia ni rre ikinkin Esia, kevbe avbe Ju kevbe ni i re Ju keghi họn ẹmwẹ Nọyaẹnmwa.

Ivbi E Skẹva Ne Ikpia

¹¹ Osanobua kegha la obọ Pọl winna iwinna ọyunnuan ne ama he miẹn egbe ọre ẹdẹ.

¹² Uhin ighẹ te a gha viọ ukpọn ne a ya khian ọfọ kevbe ukpọn ne a rhie yan egbe ne ọ lo nẹ gie avbe ọkhọnmwọ, a ghi ho emianmwẹ iran bẹkun, orhiọn dan ghi la hin uwu iran rre.

¹³ Avbe Ju eso ni gha lele ehe hia khian, iran na vbe gha khulo orhiọn dan ladian keghi vbe te gha ho ne iran gha so eni Jesu ya ru emwi na. Iran ghi khama avbe orhiọn dan ni wẹẹ, “I ya eni Jesu ne Pọl kpe orhu ẹre khian yi iyi nuẹn.”

¹⁴ Iran ni ru emwi na kegha re emọ ikpia ihinrọn, ivbi e ogie ohẹn avbe Ju ọkpa ne a tie eni ẹnrẹn Skẹva.

¹⁵ Sokpan orhiọn dan nii tama iran wẹẹ, “I rẹn Jesu, I vbe rẹn vbekpa Pọl, sokpan wa na, vbe uwa ke rre?”

¹⁶ Ọmwa ne ọ mwẹ orhiọn dan ni keghi dekun iran, ọ na gbele iran, iran keghi ye ugbugbe ladian vbe owa ẹre vbene ọ na ya iran ama, yanghan ukpọn ye iran ẹkun.

¹⁷ Ugbẹn vbe avbe Ju kevbe iran ne ẹ i re Ju ni rre Ẹfisọs họn ẹmwẹ na, ohan keghi mu iran ẹsẹse. Eni Nọyaẹnmwa Jesu keghi khian ne a ye ọghẹ na ẹsẹse sẹ ayọ.

¹⁸ Ni bun vbe uwu emwa ni yayi keghi ladian azagba, iran kegha miẹn emwi ne iran te ru kue, iran keghi vbe gha ta oro ẹre ma emwa.

¹⁹ Ni bun vbe iran ni te ka zẹ ọbo edunna yi, keghi viọ ebe iran ladian, iran keghi sirra emwa hia giẹn ehia. Iran ghi tie igho ye avbe ebe nii, ehia keghi gha re enaira arriaisẹn igbe.

²⁰ Vbe nian ọre ẹmwẹ Nọyaẹnmwa na gha mu otọ yọ vbe odẹ ne ọ wo vbe egbe, ọ na vbe gha gba otọ khian.

Otutu Ne Ọ Tu Vbe Ẹfisọs

²¹ Emwi na ghi sunu nẹ, Pọl na wẹ rẹn ra khian lele Masidonia kevbe Gris ne ọ vbe la odọ gha rrie Jerusalẹm. Ọ keghi kha wẹ, “I gha sẹ evba nẹ, I gha vbe sẹ e Rom.”

²² Rhunmwuda ọnii, ọ keghi gie Timoti kevbe Ẹrastọs, eva vbe uwu iran ni ru iyobọ nẹẹn, gha rrie Masidonia, rẹn na wẹ rẹn ra ye rhie ẹghẹ kherhe vbe otọ Esia.

²³ Ẹghẹ na zẹẹ, ẹmwẹ nọkhua na sa vbe Ẹfisọs rhunmwuda odẹ Nọyaẹnmwa.

²⁴ Okpia ne ogun ẹrọnmwọ, ne a tie eni ẹnrẹn Demetriọs, kegha ya ẹrọnmwọ dunmwu ivbi owa ne a ya ta owa ne iran bọ ne ẹbọ ne okhuo ọkpa ne a tie eni ẹnrẹn Atemis, iwnna rẹn na keghi gha ya igho la iran ni winnaẹn obọ.

²⁵ Rẹn keghi rhunmwuda ọnii tie iran vbe iko deba emwa ọvbehe ne iwinna rẹn vbe yevbe ọghe iran, ọ tama iran wẹẹ, “Iho mwa, wa hia rẹnrẹn ighẹ iwinna na ọre ima ya miẹn igho.

²⁶ Wa họẹn, aro uwa tobọ uwa vbe sẹ emwi ne oko na ne iran tie ẹre Pọl ru. Ọ wẹ ẹbọ ne a ya obọ ma i re ẹbọ hiehiere, obọ ẹre da otọ ne ọ ya fi emwa ekhọe werriẹ vbe Ẹfisọs mwa na, kevbe na wa kha wẹ la otọe Esia hia.

²⁷ Ehe ne ọna zẹ ẹbe nian ọrọre wẹ a ra do ya iwinna ima na khian ne a gbe ikhaẹn yi, ehe ọvbehe ne ọ na vbe zẹ ẹbe ọrọre wẹ aro ẹbọ Atemis ne ẹbọ ne okpokhuo, ra do khian nẹ i ghi mwẹ esa ne ọ ye, uyi ẹre ghi do fafaa ighẹ ẹbọ ne okhuo ne emwa hia ni rre Esia kevbe otọ agbọn hia ya uhunmwu rhanmwẹ otọ na!”

²⁸ Emwa ni gbe ẹbu ye evba ghi wa họn ẹmwẹ na, okuosu keghi rri iran, iran na suẹn gha go wẹẹ, “Ogiete ẹre nọ ighẹ Atemis ne Ẹfisọs.”

²⁹ Utumwẹ na keghi wa la ẹvbo khinkhian. Iran ni si ọbọbọ e rhia rua ni, keghi mu Gaiọs kevbe Aristakọs ne ivbi e Masidonia eva ni lele Pọl khian, iran na silo iran gha rrie adesẹ ughe.

³⁰ Pọl keghi te ho ne irẹn tobọ ẹre la uwu ẹbu nii, sokpan ivbi yayi ma gi ẹe yo.

³¹ Eso ni re esiọre vbe uwu emwa na mu agbọn ẹvbo nẹ gha su, keghi vbe gie uhunmwu gi ẹe wẹ ne ọ lahọ ne oghẹ rhie aro ne a miẹn vbe ughe hiehiere.

³² Vbe ẹghẹ ne a kha na, iko ne iran do keghi tughua. Emwa eso kegha ya ọna go khian, eso na gha ya ọnii go khian, rhunmwuda ni bun vbe uwu iran ma kue rẹn emwi ne iran si egbe koko ba.

³³ Eso vbe uwu avbe emwa nii keghi wa kun ẹmwẹ ni yan Alẹkzanda rhunmwuda ighẹ avbe Ju rhie ẹre ladian nii ọ mudia ye odaro, Alẹkzanda keghi ya obọ gbe iran ekhakha, ọ keghi te ho ne ọ ze ne unu irẹn ma emwa nii.

³⁴ Sokpan iran ghi miẹn wẹ ovbi e Ju nọ, iran hia keghi wa ya omwa ẹgogo eva gha go kha wẹ, “Ogiete ẹre nọ o ighẹ Atemis ne Ẹfisọs.”

³⁵ Vbe okiekie, Ọgbẹn ebe ẹvbo nii keghi sẹtin dọ iran yọ, ọ tama iran wẹẹ, “Ivbi Ẹfisọs, agbọn hia rẹnrẹn ighẹ Ẹfisọs ne okpẹvbo ọre ọ gbe aro ghe aro ẹbọ Atemis kevbe okuta eghẹnghẹn ne ọ ke ẹrinmwi de fi otọ.

³⁶ Ọmwa ne ọ gha sẹtin muan emwi na ẹ i rrọọ, rhunmwuda ọnii nian, wa fu ekhọe rre ne uwa ghẹ ya ibalegbe ru emwikemwi.

³⁷ Wa viọ emwa na gha de nian, ẹ i re wẹ te iran do emwi viọ vbe aro ẹbọ ra ne iran ya unu sakan ẹbọ ne okhuo ne ọghe ima na.

³⁸ Deghẹ Demetriọs kevbe emwa ne ọ ya winna mwẹ ẹzọ ne iran gha gu emwa eso gui, ẹdẹ ne a bu iko yi rrọọ, iran ni yan asẹ vbe rre evba, iran sẹtin ya gu egbe gui vbe odọ.

³⁹ Sokpan deghẹ emwi ne ọ sẹ ọna ye rrọọ ne uwa ho, iko ẹvbo ne a ye uhi mu gbọọ, ọre uwa gha na ta ẹe.

⁴⁰ Rhunmwuda a sẹtin gu ima gui wẹ ma gbe olighi ye ẹvbo rhunmwuda emwi ne ọ sunu ẹrẹna. Emwi ne a gha miẹn ta ighẹ ọre ọ si otighi na, ẹ i rrọọ, ma i miẹn ẹmwẹ agbọn ta ya rhan otọ ẹre.”

⁴¹ Ọ ghi ta ẹmwẹ na nẹ, ọ na duẹ iko nii uan.