Iwinna 18 - Edo Bible (E Baibol Ẹdo) Version 1996

Vbe Kọrinti

¹ Vbe iyeke emwi na na, Pọl keghi kpao vbe Atẹns rre, ọ na gha rrie Kọrinti.

² Ọ keghi do vba e Ju ọkpa vbe evba, a keghi tie eni ẹnrẹn Akuila, Pọntus ọre a na biẹ ọe, ọ ma he kpẹe ne irẹn vbe Priskila ne amwẹ ọnrẹn gba ke Itali gha dee, rhunmwuda ighẹ Klọdiọs ne Ọgbaisi wẹ ne ivbi e Ju hia kpao vbe Rom rre. Pọl keghi ya tuẹ iran.

³ Ọ keghi di owa iran ya, ọ na deba iran gha winna, rhunmwuda owa ukpọn ne a bọ ọre irẹn ya rri evbare zẹ vbe ne iran na vbe ye.

⁴ Ọ kegha guan vbe Ọgua ediọn vbe Ẹdẹ Ikẹtin hia vbe ne ọ na ho nọ fi avbe Ju kevbe Grik ekhọe werriẹ.

⁵ Ugbẹn vbe Sailas kevbe Timoti ghi ke Masidonia rre, Pọl keghi wa ya ẹghẹ ọre hia gha kpe orhu iyẹn ne ọ maa, ọ na gha tama avbe Ju wẹ Jesu ọrọre Mẹzaia.

⁶ Ugbẹn vbe iran ghi suẹn gha gbe odan ye ọre owẹ, ne iran na vbe gha ya ukpẹ sakan ẹn, ọ keghi bọnmwẹ ukpọn rẹn ku iran ọ wẹẹ, “A deghẹ wa ghi fuan, uhunmwu uwa ọre uwa gha ya muẹn, I ma rẹn ọkpa I ma rẹn eva vbọ. Ke ẹghẹ na gha rae, I ra bu iran ne ẹ i re Ju.”

⁷ Ọ keghi rhunmwuda ọnii kpao sẹ iran rae, ọ na ya di owa ọmwa ọkpa ne ẹ i re Ju ne a tie eni ẹnrẹn Titiọs Jọstọs ya. Owa ẹre ọre ọ diake Ọgua ediọn.

⁸ Krispọs ne ọre ọka Ọgua ediọn keghi ya Nọyaẹnmwa yi, ke irẹn kevbe ẹgbẹe ọre hia. Emwa ni bun ọvbehe keghi vbe họn iyẹn ne ọ maa ni vbe Kọrinti, iran yayi, a keghi sa amẹ ne iran.

⁹ Vbe asọn ọkpa, Pọl keghi miẹn umian, Nọyaẹnmwa tama rẹn vbe umian ni wẹẹ, “Ghẹ gie ohan muẹn, gha kpe orhu khian, ghẹ da obọ yi.

¹⁰ rhunmwuda, I rrọọ yaba ruẹ. Ọmwa ne ọ gha sẹtin ruẹ emwi rhọkpa ẹ i rrọọ, rhunmwuda emwa ni re ọghomwẹ bun vbe ẹvbo na.”

¹¹ Rhunmwuda ọnii, Pọl keghi gbe ukpo ọkpa vbe ukhiọnmwẹ vbe evba, ọ kegha ma emwa ẹmwẹ Osanobua.

¹² A ghi ma Galio ne ọ khaemwisẹ ne ovbi e Rom yan Gris nẹ, avbe Ju keghi si uma, iran keghi mu Pọl, iran na si ẹe gha rrie iko.

¹³ Iran keghi kha wẹ, “Okpia na ma emwa ẹre wẹ ne iran gha ga Osanobua vbe odẹ ne ọ lihan ne uhi.”

¹⁴ Pọl ghi te ra guan, Galio keghi tama avbe Ju wẹẹ, “Akpawẹ ẹmwẹ emwi ne a bakuru, ra emwi dan ne a ru nọ, emwi ne ọgbae ghẹ gha nọ ne I danmwehọ uwa, wa ne Ju.

¹⁵ Sokpan vbe ne a na miẹn nian wẹ ẹmwẹ ne a muan vbe ekpa eni eso ra ẹmwẹ eso kevbe uhi uwa ọre nọ, wa ya tobọ uwa bu ẹre, ẹ i re imẹ ọre ọ gha bu ohiẹn emwi vberriọ.”

¹⁶ Ọ keghi khulo iran hin uwu iko rre.

¹⁷ Iran keghi de obọ mu Sọstenes ne ọka Ọgua ediọn iran keghi gbe ẹe vbe odaro iko. Sokpan Galio ma zẹdẹ zẹ yọ.

A Dọlegbe Gha die Antiọk

¹⁸ Pọl keghi gu avbe etẹn tota vbe ikpẹdẹ ni bun, ọ keghi kpao vbe ehe ne iran ye, ọ keghi viọ Priskila kevbe Akuila ba egbe, iran keghi la okọ gha die Siria. Vbe iran te la okọ kpao vbe Sinkra, ọ keghi ye egbe ye ulamwẹ, ọ na khiokhio eto mu otọ.

¹⁹ Iran ghi sẹ Ẹfisọs, Pọl keghi sẹ Priskila kevbe Akuila rae vbe evba, ọ kegha rrie Ọgua ediọn, ọ keghi ya gha gu avbe Ju guan.

²⁰ Iran keghi wẹ ne ọ gbe ẹghẹ ne ọ taẹn vbe ehe ne iran ye, sokpan rẹn ma kue.

²¹ Sokpan, ọ ghi ra kpao ọ tama iran wẹ, “A deghẹ Osanobua ho ro, I gha dọlegbe bu uwa rre,” ọ na la okọ kpao vbe Ẹfisọs.

²² Ọ ghi sẹ Sisaria, ọ na gha rrie Jerusalẹm, ọ na ya datuẹ esọsi, ọ na vbe dọlegbe gha die Antiọk,

²³ Ọ ghi kpẹe vbe evba kherhe, ọ keghi vbe kpao, ọ na khian lele iwewe Galatia kevbe Frigia hia, ọ na gha rhie igiẹdu ne emwa iyayi hia.

Apọlọs Vbe Ẹfisọs Kevbe Kọrinti

²⁴ E Ju ọkpa ne a tie eni ẹnrẹn Apọlọs, ne a biẹe vbe Alẹkzandria kegha die Ẹfisọs. Ọmwa ne ẹmwẹ ma ẹre unu nọ, ọ keghi vbe rẹn Ebe ni ẹsẹse.

²⁵ Avbe ma ẹre emwi vbe ekpa Nọyaẹnmwa, ọ keghi wa gha ya egbesasamwẹ kpe orhu, ọ na vbe gha ma emwa emwi ne ọ gbae vbekpa ẹmwata ne ọ rre ẹmwẹ Jesu. Sokpan isamẹ ọghe Jọn ọkpa ọre ọ rẹnrẹn.

²⁶ Ọ keghi wa gha ya udinmwẹ guan vbe Ọgua ediọn. Ugbẹn vbe Priskila kevbe Akuila họn ẹmwẹ ọnrẹn, iran keghi rhie ẹre gha rrie owa iran, iran keghi ya dọlegbe rhan otọ ẹmwẹ odẹ Osanobua ma rẹn ẹse.

²⁷ Apọlọs keghi wẹ rẹn rrie Gris, rhunmwuda ọnii, emwa niyayi ni rre Ẹfisọs keghi ye ọre obọ vbekpa ne iran na gbẹn ebe gie etẹn iran ni rre Gris wẹ ne iran miẹn rẹn yi vbe odọ ni. Ugbẹn vbe irẹn ghi rre, ọ kegha re emwi iyobọ nọkhua ne iran hia ni la ekpa ẹsọhẹ Osanobua khian eniyayi.

²⁸ Rhunmwuda, ọ keghi ya imuan ẹmwẹ ọnrẹn ne ọ wo vbe egbe ya avbe Ju rhie obọ gue unu iran, vbe iran a vba egbe vbe ẹbu emwa, ọ keghi ya ẹmwẹ Ebe ni rhie ma wẹ, Jesu ọrọre nene Mẹzaia.