Iwinna 16 - Edo Bible (E Baibol Ẹdo) Version 1996

Timoti Lele Pọl Kevbe Sailas Gha Khian

¹ Pọl kegha rrie Dẹbi kevbe Listra. Ovbi iyayi ọkpa ne a tie ẹre Timoti keghi rre evba, iye ẹe ne ọ vbe re ovbi iyayi keghi re Ju sokpan erha ẹe kegha re Grik.

² Etẹn hia ni rre Listra kevbe Aikọniọm keghi wa gha so eni Timoti ne ọ maa.

³ Pọl keghi ho ne ọ rhie Timoti ba egbe gha khian, rhunmwuda ọnii, ọ keghi rhuẹ ọre. Emwi ne ọ ya ẹe ru emwi na ọrọre wẹ emwa hia ni rre ẹvbo ni rẹnrẹn wẹ Grik ọre erha Timoti khin.

⁴ Vbene iran wa lele ẹvbo hia khian nii, iran kegha rhie ilele ne avbe ukọ kevbe ediọn ni rre Jerusalẹm rhie obọ yi ne avbe ivbi iyayi, iran na wẹ ne iran gha yae ru emwi.

⁵ Avbe esọsi keghi gha ye ọna wegbe sẹ ayọ vbe iyayi, iran na gha muan yọ ẹdẹgbegbe.

Umian Ne Pọl Miẹn Vbe Troas

⁶ Iran keghi khian la iwewe Frigia kevbe Galatia. Orhiọn Ne Ọ Huanrẹn ma kue ne iran kpe orhu vbe otọ Esia.

⁷ Ugbẹn vbe iran ghi sẹ ehe ne otọ Misia lae, iran keghi te ho ne iran la otọ Bitinia sokpan Orhiọn Jesu ma kue ye iran re.

⁸ Iran keghi rhunmwuda ọnii la ọwarọkpa fian Misia rra, iran na gha rrie Troas.

⁹ Asọn ii, Pọl keghi miẹn umian vbe uwu ne ọ na miẹn ovbi Masidonia ọkpa ne ọ mudia gha rinmwiaẹn wẹẹ, “Gha die Masidonia ne u do yi ma obọ!”

¹⁰ Vbe ọwarọkpa vbe Pọl ghi miẹn umian na nẹ, ma keghi mu egbe ne a gha rrie Masidonia, rhunmwuda ma khare wẹ te Osanobua tie ima ne a ya kpe orhu Iyẹn Ne ọ maa ma emwa ni rre evba.

Vbe Filipai, Lidia Do Yayi

¹¹ Ma keghi la okọ, a keghi ke Troas fiaẹn rra gha rrie Samotras, ẹdẹ ne ọ lele ẹe, a kegha rrie Naipolis.

¹² Ma keghi vbe ke evba la uwu ẹre gha rrie Filipai, ẹvbo ne ọ rre ototọ Rom. Ma gbe sẹ omwa ikpẹdẹ eso vbe ẹvbo nii.

¹³ Ọ ghi sẹ Ẹdẹ Ikẹtin, ma keghi ladian ore ẹvbo nii gha rrie ọkpẹn ẹzẹ ehe ne ima te ro ighẹ ehe ne avbe Ju na na erhunmwu gha ye. Ma keghi tota, ma na gha gu avbe Ju ikhuo ni si egbe koko ye evba guan.

¹⁴ Ọkpa vbe uwu iran ni họn ẹmwẹ ima keghi re Lidia ne ovbi Tiatira, ukpọn ododo ọre ọ khiẹn. Rẹn keghi re okhuo ne ọ ga Osanobua, Nọyaẹnmwa keghi rhie ẹre ekhọe yọ ne ọ danmwehọ ẹmwẹ ne Pọl ta.

¹⁵ A keghi sa amẹ ne ẹn ke ẹe kevbe owa ẹre. Rẹn keghi tama ima wẹẹ, “Deghẹ wa gele ka mwẹ ye ọmwa ne ọ ya Nọyaẹnmwa yi vbe ẹmwata, wa do di owa mwẹ ya.” Rẹn keghi rherhe ima viọ gha khian.

Vbe Uwu Ẹwẹdọ Vbe Filipai

¹⁶ Ẹdẹ ọkpa, ma ghi rrie ehe ne a na na erhunmwu, ọvbokhan okhuo ọkpa, ne ọre ọviẹn, ne ọ vbe mwẹ orhiọn dan nọ yae miẹn aro, keghi khian vbe ima. Igho ọrhẹnrhẹn ọre ọ ye aro me ọ miẹn nii khuan ne enarẹn.

¹⁷ Ọ keghi wa lele Pọl kevbe ima, ọ na gha go wẹẹ, “Iran na, eguọmwadia Osanobua ne ọ yo sẹ iran khin, te iran tama uwa vbene uwa gha ya miẹn imiẹnfan hẹẹ!”

¹⁸ Ikpẹdẹ ni bun ọre ọ ru emwi na la, egbe ẹre ghi wọ Pọl sẹrriọ wẹẹ ọ keghi fi egbe werriẹ, ọ tama orhiọn nii wẹẹ, “Vbe eni Jeru Kristi, I tama ruẹn ne u ladian vbe uwu ẹre rre.” Vbe ọwarọkpa nii, orhiọn nii keghi la hin uwu ẹre rre.

¹⁹ Ugbẹn vbe iran ni yan rẹn ghi miẹn wẹ, emwi ne iran te ya miẹn igho rrie, iran keghi de obọ mu Pọl kevbe Sailas, iran na silo iran bu avbe eghaẹvbo vbe ihueada ẹvbo hoho.

²⁰ Iran keghi viọ iran bu avbe eghaẹvbo emwa Rom wẹ, “Ivbi e Ju iran na khin, iran do gha lighi ima ẹvbo.

²¹ Iran do gha ma emwa uyinmwẹ ne ọ ma gua uhi ima ro, ivbi Rom ma khin, ma i sẹtin lele uyinmwẹ na.”

²² Emwa ni gbe ẹbu ye evba keghi vbe deba iran gha gu Pọl kevbe Sailas khọn. Avbe eghaẹvbo nii keghi bannọ Pọl kevbe Sailas ẹwu, iran na wẹ ne a gbele iran asan.

²³ Ugbẹn vbe iran ghi gbele iran ne obọ da nẹ, iran kegi filo iran ku uwu ẹwẹdọ, iran keghi khama eseghan ne ọ khui iran ye evba gbain.

²⁴ Ugbẹn vbe avbe eseghan ghi họn iyi na nẹ, iran keghi viọ iran ye uwu ugha ne ọ dinmwi sẹ vbe uwu ẹwẹdọ, ọ na ye eghan ro iran owẹ mu avbe ike erhan nekhua.

²⁵ Ọ ghi sẹ ogiasọn, Pọl kevbe Sailas kegha so ihuan, iran na gha na erhunmwu ghe Osanobua, avbe oleghan nekpa kegha danmwehọ iran.

²⁶ Vbe udomwurri, igbohiotọ nọkhua keghi sunu, ọ keghi mu ẹwẹdọ ni rueghe ya sẹ ẹyotọ. Ọwarọkpa nii, urho hia keghi kie ye otọ, eghan keghi kharha kua hin egbe avbe oleghan rre.

²⁷ Eseghan keghi rhiọrre, ugbẹn vbe ọ ghi miẹn wẹ urho ẹwẹdọ hia kie ye otọ, ọ keghi te gha ro ighẹ avbe oleghan hia lẹ kua nẹ, ọ keghi yuo agbada, ọ na wẹ rẹn ra gbe egbe ua.

²⁸ sokpan Pọl keghi wa kakabọ davan, “Ghẹ kuan egbe ruẹ, ma hia rre emwa!”

²⁹ Eseghan ni keghi wẹ ne iran mu ukpa rre, ọ keghi gbe egbe la owa, ọ keghi de fi akharha Pọl kevbe Sailas, ọ na gha guọ zẹzẹzẹ.

³⁰ Ọ keghi viọ iran ladian, ọ nọ iran wẹẹ, “Eniwanrẹn, de emwi ne I gha ru ne I miẹn ehe na miẹn imiẹnfan?”

³¹ Iran tama rẹn wẹ, “Ya Nọyaẹnmwa Jesu Kristi yi, u gha fe, wẹ kevbe ẹgbẹe ruẹ.”

³² Iran keghi kpe orhu ẹmwẹ Nọyaẹnmwa ma rẹn kevbe emwa ni rre owa ẹre hia.

³³ Vbe asọn ni, eseghan nii keghi viọ iran, ọ na kpe iran ẹwẹn, a keghi vbe sa amẹ ne ẹn, ke ẹe kevbe ẹgbẹe ọre hia vbe ọwarọkpa nii.

³⁴ Rẹn keghi viọ Pọl kevbe Sailas la owa ẹre, ọ na ya rhie evbare ne iran re. Rẹn kevbe ẹgbẹe ọre keghi ghọghọ ẹsẹse rhunmwuda ne iran na do ya Osanobua yi.

³⁵ Ẹdẹ ghi gbe, avbe ivbi e Rom ni rre asẹ keghi gie ne a khama avbe ọgbalegbe wẹẹ, “Gie avbe ikpia nii gha rrie.”

³⁶ Eseghan ni keghi do khama Pọl wẹẹ, “Iran ni khaemwisẹ gie rre wẹ ne a fannọ uwẹ kevbe Sailas kua. Rhunmwuda ọnii, wa sẹtin kpao ne uwa fẹko gha rrie.”

³⁷ Sokpan Pọl tama avbe ọgbalegbe wẹẹ, “Ama miẹn emwi ne a lẹ ginna ima obọ wẹ ma ru, Sẹ evba iran keghi sirra emwa hia gbe ima asan, ma ne ivbi e Rom, iyeke ọnii, iran keghi hẹ ima ku ẹwẹdọ. Eban nian iran ho ne iran fannọ ima kua vbe ẹkhokho. A i danmwẹ ọẹn. Nene ivbi e Rom ni rre asẹ ọre ogha do tobọ iran viọ ima ladian.”

³⁸ Avbe ọgbalegbe keghi ya na iyẹn ma ivbi e Rom ni rre asẹ nii. Ugbẹn vbe iran ghi họn ighẹ ivbi e Rom ọre Pọl kevbe Sailas khin, ohan kegha mu iran.

³⁹ Iran keghi bu iran gha khian, iran na ya gbe I ma rẹn ma iran, iran keghi su iran ke uwu ẹwẹdọ ladian, iran na wẹ ne iran ke ẹvbo nii ladian.

⁴⁰ Pọl kevbe Sailas, keghi ke uwu ẹwẹdọ ladian, iran na gha rrie owa Lidia. Iran keghi do vba avbe etẹn vbe evba, iran ghi rhie igiẹdu ne iran ne iran nẹ, iran na kpao.