Iwinna 14 - Edo Bible (E Baibol Ẹdo) Version 1996

Vbe Aikọniọm

¹ Erriọ ọre ọ vbe gha ye vbe Aikọniọm, Pọl kevbe Banabas kegha rrie Ọgua ediọn avbe Ju, iran keghi guan ẹsẹse, sẹrriọ ne avbe Ju ni bun kevbe iran ne ẹ i re Ju na wa yayi.

² Sokpan avbe Ju ni ma yayi keghi bọ iran ne ẹ i re Ju yọ, iran keghi fi iran ekhọe werriẹ mu aro da iran ne etẹn.

³ Avbe ukọ kpẹre ẹsẹse vbe evba, iran kegha ta ẹmwẹ Nọyaẹnmwa vbe ne a na fian afianma, Nọyaẹnmwa keghi vbe rhie maa wẹ ẹmwata ọre orhu ẹsọhẹ ọghe ẹe ne iran kpe khin vbe ekpa ne ọ na rhie ẹtin ne iran ya gha winna iwinna ama kevbe ọyunnuan.

⁴ Emwa ẹvbo ni keghi wannọ egbe ye ihe eva, eso kegha rre obọ ọghe avbe Ju, eso vbọ, obọ ọghe avbe ukọ.

⁵ Ẹghẹ nii ọre iran ne Ju kevbe iran ne ẹ i re Ju, deba avbe olotu iran, na wẹ ne iran rri avbe ukọ oya ne iran vbe filo okuta gbele iran uan.

⁶ Emwi na ghi vẹ ne avbe ukọ rẹn, iran keghi lẹ gha rrie Listra kevbe Dẹbi, ẹvbo ni rre otọ Likaonia, kevbe ẹvbo ni lẹga ẹre hia.

⁷ Iran keghi vbe kpe orhu Iyẹn Ne ọ maa vbe odọ nii.

Vbe Listra Kevbe Dẹbi

⁸ Okpia ọkpa ne owẹ ọre sikuẹn keghi rre Listra, uke wa nọ ke ẹghẹ ne a ya biẹ ọe gha dee, ọ ma he khian ẹdẹ.

⁹ Ọ kegha danmwehọ e Pọl vbe ọ guan. Pọl keghi miẹn wẹ ọ mwẹ iyayi, ọ gha gie a mu ẹre egbe rran, rhunmwuda ọnii, ọ keghi ghe ẹre sun uun.

¹⁰ Ọ davan wẹẹ, “Kpaegbe ye owẹ ruẹ mudia!” Okpia ni keghi san kpaegbe, ọ na gha khian yo khian re.

¹¹ Emwa ni gbe ẹbu ye evba ghi miẹn emwi ne Pọl ru, iran kegha ye ẹvbo iran ne Likaonia go wẹẹ, “Avbe ẹrinmwi mu akpa emwa ne agbọn yọ tuorre bu ima gha dee!”

¹² Iran kegha tie Banabas Ziọs, iran na vbe gha tie Pọl Hẹmẹs rhunmwuda ighẹ rẹn ọre ọ mobọ guan vbọ.

¹³ Ohẹn ẹbọ ọghe Ziọs, ne aro ẹbọ ẹre rre vbe a gha wa da ladian ore ẹvbo, keghi viọ ẹmila kevbe obobo gha die onurho. Rẹn kevbe emwa ni gbe ẹbu ye evba te ra do ru avbe ukọ.

¹⁴ Ugbẹn vbe Banabas kevbe Pọl ghi họn emwi ne iran ra do ru, iran keghi yanghan ukpọn iran an, iran keghi rhulẹ la uwu ẹbu nii, iran kegha goo wẹẹ,

¹⁵ “Iho mwa, vbọzẹ ne uwa na ru emwi na yi? Emwa kẹkan vbe ne uwa ye ọre ima vbe khin. Iyẹn Ne ọ maa ọre ima rre do kpe orhu ẹre vbe edinran, ne a miẹn ehe na fi uwa ekhọe werriẹ hin emwi akuọkan na rre ghe Osanobua ne ọ rrọọ, ọmwa ne ọ yi ẹrinmwi kevbe agbọn kevbe okun kevbe emwi hia ni rre uwu iran.

¹⁶ Vbe ẹghẹ ne ọ gberra, ọ gie emwa hia gha ru vbene ọ khọn iran.

¹⁷ Sokpan ẹghẹ hia ọre ọ ya gha rhie maa egbe ọmwa ne irẹn khin vbekpa emwi esi ne ọ ru. Ọ rhọ amẹ ke odukhunmwu ye otọ ne uwa, deba emwiokọ vbe ẹghẹ ne ọ ke yi, ọ rhie evbare ne uwa ne ọ gha ye ẹko sẹ uwa ọyẹnmwẹ.”

¹⁸ Egbe i re egbe ne avbe ukọ ya sẹtin ye avbe ẹmwẹ na da emwa nii obọ yi ne iran ghẹ do ru iran.

¹⁹ Avbe Ju eso keghi ke Antiọk ne ọ rre otọ Pisidia kevbe Aikọniọm gha dee, iran ruẹn ẹmwẹ ye emwa nii ẹko ya viọ iran ba egbe, iran keghi filo okuta gbe Pọl, iran na hiọrọ ẹe fua hin adesẹ ore ẹvbo rre, iran te ro ighẹ ọ wu nẹ.

²⁰ Sokpan ivbi iyayi ghi do lẹga ẹre, ọ keghi guakpao, ọ na werriegbe gha rrie ore ẹvbo. Ikpẹdẹ ne ọ lele ẹe, rẹn vbe Banabas keghi gba gha rrie Dẹbi.

Iran Dọlegbe Gha die Antiọk Vbe Siria

²¹ Pọl kevbe Banabas keghi kpe orhu Iyẹn Ne ọ maa vbe Dẹbi, iran keghi miẹn emwa ni bun viọ ba egbe vbe evba. Iran keghi werriegbe gha rrie Listra kevbe Aikọniọm kevbe Antiọk ne ọ rre Pisidia.

²² Iran kegha rhie igiẹdu ne emwa ni yayi, iran keghi rhie ude iwegbe ne iran wẹ ne iran mu uhunmwu kọ ẹmwẹ nene iyayi wẹ, “Ẹ i mwẹ ma ma ye egbe miẹn ukpokpo ni bun a te do la Arriọba Osanobua!”

²³ Iran keghi mannọ ọdiọn lele dọmwadẹ esọsi ne iran. Iran keghi ye aguẹ kevbe erhunmwu rhie iran yan Nọyaẹnmwa ne iran mu ẹtin yan obọ.

²⁴ Iran fian otọe ẹvbo Paisidia rra gha die Pamfilia.

²⁵ Iran keghi kpe orhu ẹmwẹ ni vbe Pẹga, iran na gha rrie Atalia.

²⁶ Evba nii i ọre iran ghi ke gua okọ gha die Antiọk, ehe ne a na ka rhie iran ne ẹsọhẹ Osanobua gha gbe aro ghe vbe uwu iwinna ne iran ghi do winna fo na.

²⁷ Iran ghi sẹ Antiọk, iran si emwa esọsi koko, iran keghi na iyẹn emwi ne Osanobua viọ iran ya winna ma iran kevbe vbene ọ vbe kie ne iran ne ẹ i re Ju hẹ ne iran do yayi.

²⁸ Iran keghi gu ivbi iyayi tota kpẹe vbe evba ẹsẹse.