Iwinna 11 - Edo Bible (E Baibol Ẹdo) Version 1996

Iyẹn Ne Pita Na Ma Esọsi Ne Ọ Rre Jerusalẹm

¹ Avbe Apọsol kevbe etẹn ni rre otọ Judia hia keghi họn ighẹ avbe iran ne ẹ i re Ju vbe rhan obọ miẹn ẹmwẹ Osanobua.

² Ugbẹn vbe Pita ghi sẹ Jerusalẹm, ivbi iyayi ni re Ju keghi gha gu ẹe gui, iran wẹẹ,

³ “Owa emwa ne ẹ i re Ju, ni ma rhuẹ ọre u gha rrie, u keghi vbe gu iran gha rri evbare.”

⁴ Pita keghi rhunmwuda ọnii na iyẹn emwi ne ọ sunu ma iran, ọ keghi wa ke omuhẹn suẹn ọnrẹn:

⁵ “Jopa ọre I gha ye, ugbẹn vbe I ghi na erhunmwu, I keghi miẹn umian. I keghi miẹn emwi ọkpa ne ọ ye vbe ukpọn ne a taẹn, ne a de ẹre abọ enenẹ, a keghi mu ẹn tuorre ke odukhunmwu dee, ọ keghi mudia vbe odaro mwẹ.

⁶ I ghi ziẹn aro ye uwu ẹre I keghi miẹn aranmwẹ ni mwẹ owẹ enẹ, ba aranmwẹ oha kevbe aranmwẹ ni họ ekẹn kevbe ahianmwẹ ni rre oha.

⁷ I keghi họn vbe urhu ọkpa tama mwẹ wẹ, ‘kpaegbe, gbe ne u gha re.’

⁸ Sokpan mẹ keghi kha wẹẹ, ‘Hiehiere, Nọyaẹnmwa emwi awua kevbe ne ọ ma huan ma he la mwẹ unu ẹdẹ.’

⁹ Urhu nii keghi dọlegbe guan ke ẹrinmwi rre wẹẹ, ‘Emwi ne Osanobua tie ẹre ne ọ huanrẹn nẹ, ghẹ ghi kae ye ne ọ ma huan.’

¹⁰ Emwi na keghi sunu igba ehe, vbe okiekie, a keghi silo ehia la odukhunmwu.

¹¹ Ẹghẹ nii zẹẹ arhin eha ne a gie ke Sisaria bu mwẹ gha dee keghi sẹ owa ne I dia a.

¹² Orhiọn keghi tama mwẹ wẹ ne I lele iran vbe ne a i na gbe ọkhọn mwẹ ẹ i khọn mwẹ. Avbe etẹn ima ne ehan na vbe lele mwẹ gha rrie Sisaria, ma hia keghi la owa Kọniliọs.

¹³ Ọ keghi tama ima vbene irẹn miẹn odibosa hẹ, vbene ọ mudia ye uwu owa irẹn hẹ, ọ na tama irẹn wẹẹ, ‘Gie ọmwa gha rrie Jopa ne u ya tie ọmwa ọkpa ne a tie eni ẹnrẹn Saimọn Pita.

¹⁴ Ọ gha gu uẹ guan ẹmwẹ ne uwẹ vbe ẹgbẹe ruẹ gha la miẹn imiẹnfan.’

¹⁵ Ugbẹn vbe imẹ ghi wa suẹn gha guan, Orhiọn Ne Ọ Huanrẹn keghi tuorre yan iran zẹ vbene ọ tuorre yan ima vbe omuhẹn.

¹⁶ Mẹ keghi do ye ẹmwẹ ne Nọyaẹnmwa khare wẹ, ‘Amẹ ọre Jọn ya sa amẹ ne emwa sokpan ọ gha ye Orhiọn Ne Ọ Huanrẹn sa amẹ ne uwa’

¹⁷ Aro da ẹe wẹ te Osanobua vbe rhie ne iran ne ẹ i re Ju na, egbe ọhẹ ne ọ rhie ne ima vbe ẹghẹ ne ima na ya Nọyaẹnmwa Jesu Kristi yi, gha ọre imẹ khekherriọ ne I gha na da Osanobua obọ yi.”

¹⁸ Ugbẹn vbe iran ghi họn ẹmwẹ na, iran keghi dobọ ẹzọ na gui yi, iran keghi rho Osanobua vbe uyi wẹẹ, “Ọnii rhie maa ighẹ Osanobua vbe rhie otọ ne iran ne ẹ i re Ju ya fiwerriẹ ne iran ghẹ wulo.”

Esọsi Ne Ọ Rre Antiọk

¹⁹ Ukpokpo ne ọ suẹn rẹn vbe iran gbe Stivin nẹ, kegha zagha emwa ni hia kua. Eso vbe uwu iran keghi khian ya sẹ Fonisia, Saiprọs kevbe Antiọk, iran kegha kpe orhu ma avbe Ju ọkpa.

²⁰ Sokpan ivbi iyayi eso ni ke Saiprọs kevbe Sairin rre kegha rrie Antiọk, iran keghi vbe ya kpe orhu ma emwa eso ne ẹ i re Ju, iran kegha ta ẹmwẹ Iyẹn Ne ọ maa ọghe Nọyaẹnmwa Jesu ma iran.

²¹ Ẹtin Nọyaẹnmwa kegha gu iran rrọọ, emwa ni bun ẹsẹse keghi yayi, iran na fiwerriẹ bu Nọyaẹnmwa gha dee.

²² Ogbigbi ẹmwẹ na keghi ya gha vba esọsi ne ọ rre Jerusalẹm. Iran keghi rhunmwuda ọnii gie Banabas gha rrie Antiọk.

²³ U gbẹn vbe ọ ghi sẹ evba, ọ keghi miẹn vbene Nọyaẹnmwa fiangbe emwa nii hẹ, ẹko keghi rhiẹnrhiẹn ọẹn ẹsẹse, ọ keghi bu iran ude wẹ ne iran ya ekhọe iran hia mu ẹtin yan Nọyaẹnmwa ne iran vbe gha ga ẹe.

²⁴ Banabas keghi re ọmwa esi ne ọ vuọn ne Orhiọn Ne Ọ Huanrẹn kevbe iyayi. A keghi viọ emwa ni bun bu Nọyaẹnmwa gha dee.

²⁵ Ẹghẹ nii ọre Banabas na gha rrie Tasọs ya gualọ Sọl.

²⁶ Ugbẹn vbe ọ ghi miẹn ọẹn, ọ keghi rhie ẹre gha die Antiọk. Vbe ukpo hoho gbalaka, iran eva kegha gu emwa esọsi do iko, iran kegha ma otu ni bun emwi. Antiọk ọre a na ka gha tie avbe erhuanegbe ivbi Otu e Kristi.

²⁷ Ẹghẹ nii avbe akhasẹ eso keghi ke Jerusalẹm gha rrie Antiọk.

²⁸ Ọkpa vbe uwu iran, ne a tie eni ẹnrẹn Agabus keghi kpaegbe, ọ keghi ya ẹtin Orhiọn ta ẹe ye otọ ighẹ ukhunmwu nọkhua ra do fi la otọ agbọn hia. (Emwi na gele sunu vbe ẹghẹ ne Klọdiọs na gha re Nọgbaisi.)

²⁹ Avbe erhuanegbe keghi ta ẹe wẹ dọmwadẹ ọghọe vbe uwu iran gha rhie vbene obọ ẹre sẹe ya ru iyobọ gie etẹn iran ni rre Judia.

³⁰ Iran keghi gele ru vberriọ, iran keghi rhie igho na ne Banabas kevbe Sọl ne iran rhie gie avbe eniwanrẹn esọsi.