Iwinna 1 - Edo Bible (E Baibol Ẹdo) Version 1996

¹ Tiofilọs ne ọ ghan: Vbe ebe ne I ka gbẹn guẹ, I ya unu kan ẹmwẹ emwi ne Jesu gha ru kevbe ne ọ vbe gha ma emwa ẹre ke ẹdẹ ne ọ suẹn iwinna.

² Ya sẹ ẹdẹ ne a tọn ẹn mu gha rrie odukhunmwu, ọ keghi ya ẹtin Orhiọn Ne Ọ Huanrẹn yi iyi ne avbe emwa ne irẹn hannọ zẹ ya ru ukọ ẹre.

³ Vbe uwu ikpẹdẹ iyeva, iyeke vbe ọ wu nẹ, ọ keghi rhie egbe maa iran inugba ne ọ khin, ne ọ ya gie aro iran dae vbene a i ghi na bọ iro eva wẹẹ, rẹn rre agbọn. Iran miẹn ọẹn, rẹn keghi vbe gu iran guan ẹmwẹ Arriọba Osanobua.

⁴ Ugbẹn vbe iran ghi vbe si egbe koko, ọ tama iran wẹẹ, “Wa ghẹ kpa hin Jerusalẹm rre, sokpan, wa mudia khẹ ọhẹ ne erha mwẹ yan rẹn wẹ irẹn gha rhie rre, vbene I ka tama uwa.

⁵ Rhunmwuda, amẹ ọre Jọn ya sa amẹ ne emwa, sokpan vbe ọ ma he kpẹe wan, a gha ya Orhiọn Ne Ọ Huanrẹn sa amẹ ne uwa.”

A Tọn Jesu Mu Gha Rrie Ẹrinmwi

⁶ Ugbẹn vbe avbe erhuanegbe ghi koko egbe ya miẹn Jesu, iran nọ rẹn wẹẹ, “Nọyaẹnmwa, ẹ i re te u ra mu nene Arriọba werriegbe ne ivbi Izrẹl na?”

⁷ Jesu tama iran wẹẹ, “Ẹghẹ ne ọ khian gha khin, kevbe emwi ne ọ gha sunu, ẹtin Erha mwẹ mwamwa ẹn nẹ, ọ ma kan uwa hiehiere ne uwa rẹn ẹghẹ ne ọ khian gha khin.

⁸ Sokpan Orhiọn Ne Ọ Huanrẹn gha ghi hin yan uwa nẹ, ẹtin nọkhua ghi gha gue uwa, wa ghi ya sẹ osẹe mẹ vbe Jerusalẹm kevbe Judia hia, kevbe Sameria, kevbe rhinrin ya sẹ ehe ne agbọn sẹe.”

⁹ Ọ ghi guan ẹmwẹ na nẹ, a keghi tọn mu gha rrie ẹrinmwi vbe iran wa ghe ẹre. Okuku keghi degue ẹre vbe ne iran ma ghi na sẹtin dẹghe ẹre ọvbehe.

¹⁰ Iran keghi ye ziẹn aro ye iso vbe ọ khian, vbe udomwurri, ikpia eva ni yọ ogbọnmwọkpa keghi gu iran mudia.

¹¹ Iran wẹẹ, “Ivbi e Galili, vbe uwa na mudia ye evba tan aro ye iso hẹ yi? Jesu na ne a tọn mu hin ehe ne uwa ye rre gha rrie ẹrinmwi, gha vbe werriegbe rre zẹ vbene uwa miẹn ọẹn vbe ọ rrie ẹrinmwi na.”

Ọmwa Ne Ọ Rhie Ihe Judas

¹² Vbe iyeke ọnii, avbe ukọ keghi werriegbe ke uhunmwu oke Ọliv rre, ne ọ re omwa ukhiọnmwẹ ibiriki gha rrie Jerusalẹm.

¹³ Iran la Jerusalẹm, iran kegha rrie owa ne iran dia: Pita, Jọn, Jems, kevbe Andru, Filip kevbe Tọmọs kevbe Batolomiu kevbe Matiu, Jems ne ovbi Alfiọs, Saimọn, ne ọya a ya sinmwi ẹvbo ọmwa, kevbe Judas ne ovbi e Jems.

¹⁴ Iran keghi kugbe zẹẹ vbe otu ọkpa, ne iran gha na erhunmwu vbe ẹghẹ hia, deba okhuo nọkpa nii, kevbe Meri ne iye Jesu, kevbe etiọnrẹn ne ikpia.

¹⁵ Vbe iyeke ikpẹdẹ eso, iran ni yayi keghi si koko ye ehe ọkpa, ehia keghi gha re iyehan (120), Pita keghi kpaegbe, ọ na gha guan, ọ wẹẹ,

¹⁶ “Wa ne etẹn mwẹ: Ẹ i mwẹ ne ẹmwẹ ne ebe ta ẹe ghẹ sẹ zẹ vbene Orhiọn Ne Ọ Huanrẹn la unu Devid ta ẹe ye otọ ighe ẹmwẹ Judas ne ọ ma iran ni do mu Jesu odẹ.

¹⁷ Ọkpa vbe uwu ima ọre Judas te gha khin, rhunmwuda a te zẹ ọe ne ọ deba ima gha winna.”

¹⁸ (Judas keghi rhie igho ne ọ miẹn vbe ẹki dan ne ọ do, ọ keghi ya ẹe dẹ ako oha ọkpa, evba ọre ọ na ya de wu, ọ keghi vuaa, emwi ni rre uwu egbe ẹre hia keghi yalọ ku otọ.

¹⁹ Emwa ni rre Jerusalẹm hia họn ẹmwẹ na. Iran keghi ya ẹvbo ne iran zẹ he ako oha nii eni. Iran keghi ti ẹre Akẹldama, ọ ni nọ wẹ “Oha Esagiẹn.”)

²⁰ “Rhunmwuda a gbẹn ọẹn ye ebe Psalm, “ ‘Te owa ẹre gha dihoi rua, a i gha miẹn ọmwa ne ọ gha diẹe ya.’ A ye vbe gbẹn ọẹn ye ihe ọvbehe wẹẹ: ‘Te ọmwa ọvbehe gha rhie ihe ẹre vbe iwinna.’

^21-22 “Rhunmwuda ọnii, te ọ kere ne ọmwa ọvbehe do deba ima zẹ vbe ọmwa ne ọ gha sẹ osẹe arhiọkpaegbe Nọyaẹnmwa Jesu. Ọ kere ne ọ gha re ọkpa vbe uwu avbe emwa ne ima gba gha lele Jesu khian ke ẹghẹ ne Jọn na gha kpe orhu ẹmwẹ ne agbọn hia do sa amẹ kpao, ya sẹ ẹghẹ ne a na sirra ima tọn Jesu mu gha rrie odukhunmwu vbe ẹrinmwi.”

²³ Iran keghi rhunmwuda ọnii viọ arhin eva ladian: Josẹf ne a vbe tie ẹre Banabas (rẹn a yevbe tie ẹre Jọstọs) kevbe Mataias.

²⁴ Rhunmwuda ọnii iran keghi na erhunmwu wẹẹ, “Nọyaẹnmwa wẹ rẹn ekhọe emwa hia. Rhunmwuda ọnii Nọyaẹnmwa rhie ne u hannọ zẹ vbe uwu iran eva na ma ima.

²⁵ Ne ọ mudia vbe uwu iwinna ukọ na, ye ihe ne Judas sẹrae gha rrie ehe ne ọre ọghọe.”

²⁶ Vbe iyeke ọna, iran keghi yan uta ne iran zẹ ọkpa vbe uwu eni iran eva. Ọ keghi mu Mataias, a keghi kae ba avbe ukọ ne owọrọ.