Itan 8 - Edo Bible (E Baibol Ẹdo) Version 1996

Utianmwẹ Ẹwaẹn

¹ Wa dọre! Ẹwaẹn gha datie emwa. Irẹnmwi vbe tọn urhu mu ne a họn,

² vbe uhunmwu oke vbe ọkpẹn odẹ, Ọ keghi mudia vbe ihuada.

³ Vbe onurho ne a la la ore ẹvbo, vbe ọkpẹn ẹkhu ẹre, evba ọre ọ na tie wẹẹ:

⁴ “I rinmwian uwa, wa ne emwa nagbọn, I vbe datie emwa ni rre agbọn hia.

⁵ Wa ma he ye si uwan ra? Wa ruẹ ne uwa si uwan. Akpa wa khin ra. Wa ruẹ ne uwa gha wan.

⁶ Wa danmwehọ ẹmwẹ umamwẹ mwẹ, ẹmwẹ ne I ta ma uwa hia, te ọwa kei.

⁷ Emwata ọre I ta. Te ohoghe sọnnọ mwẹ.

⁸ Emwata ọre ẹmwẹ ne I tae hia khin, ẹmwẹ ohoghe ra ne ọ bibi ọmwa odẹ irrọọ.

⁹ Te ehia wa ye gboo vbe aro ọmwa, ne ọ sẹtin ghe umian emwi. Te ehia wa zẹ ugbaro ladian, vbe aro ọmwa ne ọ rẹn emwi.

¹⁰ Zẹ igiodẹ mwẹ ye ihe esiliva, zẹ irẹnmwi ye ihe igoru ne ọ maa sẹẹ.

¹¹ “Mẹ ọrọre ẹwaẹn. I maa sẹ avbe ikpẹrọnmwọ. Emwi okpa i rrọ ne ọ yẹ ruẹ ne u gha ya gie mwẹ.

¹² Mẹ ọrọre Ẹwaẹn, I vbe mwẹ umian emwi ne a rẹn. I mwẹ irẹnmwi kevbe a ta ẹmwẹ la uro.

¹³ Ne a gha ho ẹmwẹ e Nọyaẹnmwa, ọrọre ne a gha khuiwu emwi dan. I i ho ẹmwẹ itengbemu kevbe uhiomwẹ, odẹ dan kevbe ẹmwẹ ohoghe.

¹⁴ I gha zẹ iro emwi, I ghi vbe ru ẹe, I mwẹ irẹnmwi, I vbe wegbe.

¹⁵ I ru iyobọ ne avbe ọba ya khaemwisẹ, kevbe ne irriegie ya gha yi uhi esi.

¹⁶ Iyobọ mwẹ ọre irriegie ni rre agbọn na hia ya khaemwisẹ, ekhaẹmwẹ kevbe avbe eghaẹvbo ha ẹre.

¹⁷ I ho ẹmwẹ iran ni ho ẹmwẹ mwẹ, ọmwaikọmwa ne ọ gualọ mwẹ gha miẹn mwẹ.

¹⁸ I mwẹ uyi kevbe ẹfe ne I gha ya ru ẹse, agbọn nọ maa kevbe ọdunna ba ẹre.

¹⁹ Emwi ne u miẹn vbe obọ mwẹ maa sẹ igoru ne ọ ghi mose sẹẹ ehia, ọ maa sẹ esiliva ni huan sẹ ehia.

²⁰ Odẹ ẹmwata ọ re ime la khian, obẹlẹ uhunmwu ẹmwẹ ọ re I la,

²¹ I ghi gha zẹ ẹfe ku iran ni ho ẹmwẹ mwẹ, I ghi ya ọmaa nagbọn vuọn iran owa.

²² “Mẹ ọ re Nọyaẹnmwa yi karo emwi hia, iwinna obọ ẹre nokaro vbe ẹghẹ nii gban.

²³ Okaro ọ re e Nọyaẹnmwa na yi mwẹ, vbe ẹghẹ okaro, vbe agbọn te suẹn.

²⁴ Mẹ ọ re a ka biẹ khẹ avbe okun vbe avbe ẹzẹ ni lẹ i he rrọọ.

²⁵ Mẹ ọ re a ka biẹ khẹ avbe oke nekhua, a te viọ avbe oke negiẹrẹ ye ihe iran.

²⁶ Vbe Osa te yi otọe kevbe avbe oha ni rrọọ, a wẹẹ, kodaro ekẹn tuai.

²⁷ Mẹ rre evba vbe ọ mu iso ye ihe ẹre, vbe ọ niẹn odẹ ehe ne iso sẹe gberra okun,

²⁸ ẹghẹ ne ọ na viọ okuku amẹ ye iso, ẹghẹ ne ọ na kie uhunmwu amẹ okun,

²⁹ ọna tama amẹ okun, wẹ ne ọ ghẹ gberra ehe ne irẹn khare. I rre evba vbe ọ gbe ẹyotọ agbọn na.

³⁰ I keghi mudia ke ẹe zẹvbe owinna owa ne a bọ I kegha re ne ọ ye ọyẹnmwẹ sẹ ọe ẹdẹgbegbe, ẹko ghi gha rhiẹnrhiẹn vbe ehe ne ọ ye,

³¹ ẹko agbọn na rhiẹnrhiẹn ọẹn, ivbi emwa nagbọn kegha ye ọyẹnmwẹ sẹ ọe.

³² “Banbanna nian, wa danmwehọ mwẹ, wa ne igbama, wa gha ru vbene I khare, wa gha miẹn oghọghọ.

³³ Wa danmwehọ emwi ne a ma uwa ẹre. Wa gha wan, wa ghẹ fi iyeke gbe ẹe.

³⁴ Ọmwa ne ọ danmwehọ mwẹ gha miẹn oghọghọ. Ọmwa ne ọ mudia ye onurho mwẹ ẹdẹgbegbe ne ọ khẹ vbe ehe ne a la la owa mwẹ.

³⁵ Ọmwa ne ọ gualọ mwẹ miẹn, arrọọ ọ re ọ miẹn, ẹko ẹre gha vbe rhiẹnrhiẹn e Nọyaẹnmwa.

³⁶ Ọmwa ne ọ ma gualọ mwẹ miẹn te ọ kuan egbe ẹre ọmwa ne ẹmwẹ mwẹ sọnnọ, ẹmwẹ uwu ọ re ọ yẹ ọre.”