Itan 7 - Edo Bible (E Baibol Ẹdo) Version 1996

¹ Ovbi mwẹ, ye ẹmwẹ ne I tae rre, ghẹ vbe mianmian ẹmwẹ ne I tama ruẹn, wẹ ne u ru.

² Ru vbene I khare, u gha di agbọn ya. Rhiegba ye ẹmwẹ ne u gha ru vbene I ma ruẹn re, zẹ vbene u rhiegbe ye ẹmwẹ wẹ ne emwi i ghẹ degbe uẹ aro.

³ Rhie emwi ne I ma ruẹn re mwẹ vbe ẹghẹ hia, gbẹn ọẹn ye ekhọe ruẹ.

⁴ Gha ru ẹwaẹn zẹ vbe ovbiye uẹ kevbe a ghe u mian emwi, zẹ vbe ose ne ọ sikẹ ruẹ sẹẹ.

⁵ Iran gha mu ẹẹn hin ehe ne amwẹ ẹrrẹe ye rre, hin ehe ne avbe ikhuo ni rhẹrhẹ ọmwa la ẹmwẹ ye.

Okhuo Ne Ọ Ghẹẹ

⁶ Ẹghẹ ọkpa, i ke rhie aro la ewindo owa mwẹ ladian gha ghe ore.

⁷ I keghi bẹghe igbama ni ma he rẹn agbọn nibun, I keghi wa bẹghe ọzuọ okpa vbọ.

⁸ Ọ keghi gha lele ore khian, ọ keghi la ẹkhokho okpa ne okhuo okpa ye. Ọ keghi la ọkpẹn owa ẹre gberra

⁹ vbe ota, vbe ebi ro nẹ.

¹⁰ Ẹre okhuo na na do dekun ẹnrẹn, okhuo na keghi mu egbe vbe igberagia, ọ kegha kun emwi okhian yotọ.

¹¹ Okhuo na kegha re ọmwa ne ọ fa vbe aro kevbe ne ohan i mu, ne ọ wa va ore khian,

¹² ra ne ọ mudia ye ẹkhokho okpa vbe adesẹ ore, ra vbe ẹki.

¹³ Ọ ke viọ obọ kinnọ igbama na urhu, ọ ye unu soso ẹre unu, ọ rhie aro fi ẹre uwu aro, ọ ke tama rẹn wẹẹ,

¹⁴ “Ẹdẹnẹrẹ ọ re I yo imuohan, emiowo ne ọ sẹ mwẹ obọ vbe ne a ya zọ ese gue mwẹ.

¹⁵ Rhunmwuda ọnii, I keghi ladian ne I do gualọ ọ, I ke wa gha ho ne I miọn, u ghe vbe uwa rre nian.

¹⁶ Ukpọn eto ovbiohuẹ ne a ya ẹmu mu vbe Igipt ọ re I ya wa ukpo mwẹ.

¹⁷ I gbe ori ne ọ winhin khakhae, avbe oziya, alọe kevbe esinamọn.

¹⁸ Larre, gie ima gba ya rhiẹnrhiẹ ọẹn ne ẹdẹgbe. Agbọn gha rhiẹnrhiẹn ẹsẹse vbe imẹ vbe ruẹ a sikan mu egbe urhu.

¹⁹ Ọdafẹn mwẹ i rre owa, ọ rrie okhian urria.

²⁰ Ọ rhie igho ne ọ kpọlọ mwẹ obọ, ẹ i he dee ọ te ya sẹ uzọla eva.”

²¹ Erriọ ọ re ọ ye ose ẹre danmwẹ ọẹn ghe. Ọ na de yọ rhunmwuda ọ ta ne ọ rhiẹnrhiẹn.

²² Ọ keghi wa lelẹe kpao vbe ọwarọkpa nii, vbene ẹmila rrie ehe ne a na gbẹe, ra ẹrhuẹ ne ọ rhulẹ rrie ifi,

²³ ehe ne ifẹnmwẹ gha na ha ẹre ẹkoko udu gberra. Ọ keghi yevbe ahianmwẹ ne ọ ra tin la ifi, ọ ma rẹn wẹ te irẹn rhie uhunmwu mwẹ atataobọ.

²⁴ Rhunmwuda ọnii nian, ivbi mwẹ, wa danmwehọ mwẹ. Wa rhie ehọ ye ẹmwẹ ne I ta.

²⁵ Wa ghẹ gie ẹmwẹ okhuo vberriọ la uwa aro, wa ghẹ bibi lelẹe.

²⁶ Ikpia nibun ọ re ẹbe he la ekpa ẹre rruan, ikpia ni he ya uhunmwu khiọ ẹmwẹ ọnrẹn bun gbe.

²⁷ U gha yo owa ẹre, odẹ ẹrinmwi ọre u gbẹn. Odẹ ne a na fian uwu re.