Itan 6 - Edo Bible (E Baibol Ẹdo) Version 1996

Ibude Ye Nọ

¹ Ovbi mwẹ, u khare ighe u gha mu osa hae ne ọmwaikọmwa ra?

² Ẹmwẹ ne unu ruẹn ginna an ra, ra ne emwi ne u ve vbe degbuẹ?

³ A deghẹ erriọ nọ, ovbi mwẹ, u rre ọmwa ni obọ nẹ, sokpan, ghe vbene u gha ya do ẹe fe hẹ. Zẹgiẹgiẹ bu ẹre gha khin, rinmwian ẹẹn wẹ ne ọ zẹ uẹ vbe aban.

⁴ Ghẹ gie ovbe rhie ruẹ ra ne u dekọ wẹ u ra hẹwẹ.

⁵ Zẹ egbe vbe ifi nii zẹ vbene ahianmwẹ ra ẹrhuẹ lẹ fe ohuẹ.

⁶ Ọ kere ne avbe avbiẹrẹ gha miẹn avbe iranmwẹ wan vbene iran ru emwi hẹ,

⁷ iran i mwẹ ọkaolotu, ogie ra ne ọ khaemwisẹ yan iran.

⁸ Sokpan, iran ghi si evbare iran koko vbe ẹghẹ uyunmwu, ne iran ya mu egbe yotọ khẹ ẹghẹ orhọ.

⁹ Inu ẹghẹ ọ re avbiẹrẹ ra ya vbe ukpo? De ẹghẹ ne ọ ra ya kpaegbe?

¹⁰ Ọ khare wẹẹ, “I gha ya ovbe ba aro kherhe, I gha kie obọ rre ne I hẹwẹ kherhe.”

¹¹ Sokpan, ẹghẹ ne ọ ya vbiẹ nii, ogue dekun ẹnrẹn zẹ vbe ikpata.

¹² Avbe ẹwobi emwa ne emwa dan ghi gha ta ohoghe lele ehe hia khian.

¹³ Iran ghi gha bun aro, ọ ghi gha ru wẹnwẹnwẹn ne ọ ya mu ẹẹn rẹrẹ.

¹⁴ Iran ghi gha mwamwa emwi dan vbe ekhọe iran ne ọ mu rhu, iran ghi gbe ẹti lele ehe hia.

¹⁵ Rhunmwuda ọna, ẹbe gha rruan iran vbe udomwurri, a gha vbe fian iran ẹwẹn ne ọ da.

^16-19 Emwi ihinrọn ọre Nọyaẹnmwa i ho, ẹ i vbe rhie otọ ne iran hiehiere: Ekhọe itengbemu, aranmwẹ ne ọ ta ohoghe, obọ ne ọ gbe ọmwa ne ọ ma rukhọ, ekhọe ne ọ mwamwa emwi dan, owẹ ne ọ rhulẹ ye ọkhọ ne a ru, osẹe ne ọ wa ta ohoghe yan ohoghe, kevbe ọmwa ne ọ si ẹti fi ẹkpo avbe ẹse.

Ibude Ye Ẹmwẹ Oghẹ

²⁰ Ovbi mwẹ, gha ru vbene erha a tama an, ghẹ mianmian emwi ne iye uẹ ma ruẹn re.

²¹ Rhie ẹmwẹ iran mwẹ vbe ẹghẹ hia, kọ ẹe ye ekhọe ruẹ.

²² Emwi ne iran ma ruẹn re gha su uẹ vbe u a yo ehe, ọ gha degue ruẹ vbe asọn, ọ ghi vbe gha bu ruẹ ude vbe ẹghẹ avan.

²³ Ukpa ne ọ baa ọ re igiodẹ iran khin, vbene iran ya dia ruẹ ye odẹ, gha sẹtin ma ruẹn vbene u gha ya gha yin hẹ.

²⁴ Ọ gha sẹtin siọ hin ehe ne avbe ikhuo dan ye rre, kevbe hin ẹmwẹ erẹrẹ iba ọghe avbe amwẹ ẹrrẹe.

²⁵ Ghẹ gie ose iran viẹn ye uẹ aro, ghẹ gie aro iran ne wẹnwẹnwẹn khuẹn ifi mu ẹẹn.

²⁶ Ọmwa gha sẹtin ya igho ne a ya de ohoho ebrẹd okpa mu igberagia rrie owa, sokpan, ọ gha miẹn amwẹ ẹrrẹe, emwi ne ọ mwẹ hia ọ re ọ ra ya ha osa.

²⁷ U gha sẹtin mu erhẹn ba ẹwẹe vbe ne ukpọn ruẹn i ma giẹn ra?

²⁸ U gha sẹtin ya owẹ khian vbe erhẹn ẹyin vbene owẹ ruẹ i na giẹn ra?

²⁹ Erriọ ọ re ọ wa vbe rhia sẹ zẹẹ ne ọmwa rhikhan mu amwẹ ẹrrẹe. ọmwa ne ọ rhirhi danmwẹ ọẹn, ọ gha rrioya.

³⁰ A i wee oyi a deghẹ ohanmwẹ gbẹe, ọ na do evbare rhie.

³¹ Sokpan, a dẹghe a mu ẹẹn vbọ, ọ ghi ha osa ukhukhu ihinrọn yọ, ọ ghi zẹ emwi hia ne ọ mwẹ yọ.

³² Sokpan ọmwa ne ọ ru ọghe i zẹdẹ wan hiehiere. Te ọ wa gbe egbe ẹre khian nii.

³³ A gha fa ẹre ua, a ghi vbe gbe ẹe, a ghi rhie efaa ne amẹ otiẹn ne ẹẹn.

³⁴ Ẹghẹ ne ohu ne ọ mu ọdọ okhuo na mu ohan sẹẹ ọrọre vbe ọ gha khọn ekhae, ikhi ne ọ rria, ẹ i mwẹ erọkhọrọkhọ.

³⁵ Ẹ i kue ne a ha irẹn osa ya khiẹ ọre, ẹ i mwẹ emwi ne a gha rhie ne ẹẹn ne a gha ya fu ẹre aro rre.