Itan 5 - Edo Bible (E Baibol Ẹdo) Version 1996

Ibude Ye Ẹmwẹ Ọghe

¹ Ovbi mwẹ, danmwehọ, ne u vbe rhie ehọ yotọ ye ẹwaẹn mwẹ. Kevbe vbe ne I ya ghe u mian emwi.

² Ẹghẹ nii, u gha rẹn vbene a ya yin ẹse hẹ, ẹmwẹ ne u guan gha vbe rhie ma wẹ u mwẹ irẹnmwi.

³ Akhuarhamwunu amwẹ ẹrrẹe sẹtin gha miẹnmiẹn vbe owọn, isosonu ẹnrẹn sẹtin vbe ye rọkhọ vbe ofigbọn oliv,

⁴ sokpan, vbe okiekie ehia, emwi ne u ra miẹn vbọ ma gberra orriara kevbe obalọ.

⁵ Te ọ ra siọ la ẹvbo iran ni wulo nẹ, odẹ ne ọ la khian nii, ehe ne ọ rrie uwu ẹre nọ.

⁶ Ẹ i vbe mudia ye odẹ ne ọ rrie arrọọ, ọ ghi bibi odẹ, vbe ne ẹ i na vbe rẹn emwi ne ọ sunu.

⁷ Wa danmwehọ mwẹ nian, ivbi mwẹ, wa ghẹ vbe mianmian ẹmwẹ ne I ta.

⁸ Wa gha lẹ ne egbe okhuo vberriọ! Ghẹ vbe sikẹ onurho ẹre hiehiere!

⁹ U gha danmwẹ ọẹn, ọghọ ne ọ te ka rre uwẹ egbe gha gberra la obọ emwa ọvbehe, emwa ne ẹ i mwẹ itohan ọ re ọ ra vbe gbe ua ye isẹrre.

¹⁰ Vbe ne ẹmwata, ẹrrẹe ọ re ọ ra viọ emwi ruẹn, emwi ne u miẹn ẹsọn yi hia ghi laghe obọ ọmwa ọvbehe.

¹¹ U ghi lovbiẹ gha rriakọn vbe ukpo uwu, efun egbe kevbe inian ruẹn ghi gha ranran vbe odọ.

¹² Wẹ ghi do gha kha wẹẹ, “Vbe a na miẹn hẹ wẹ mẹ i zẹdẹ roiro? Vbọzẹ ne I i na gie ọmwaikọmwa dia mwẹ ye odẹ?

¹³ I i zẹdẹ danmwehọ avbe emamwaemwi mwẹ, I ma zẹ yẹ iran ẹre.

¹⁴ Vbe udomwurri nian, efa uwu ẹbu ọ re I ghi miẹn.”

¹⁵ Rhie egbe mu amwọn ọkpa, rẹn okpa ọ re ọ gha vbe re ne u ho ẹmwẹ ọnrẹn.

¹⁶ Emọ ne ikhuo ọvbehe biẹlẹ nuẹn i ra mwẹ esa ne iran ye nuẹn.

¹⁷ Ivbuẹ ọ re ọ kere ne ọ wan rre ne iran do gha ye uwẹ obọ ighe ẹ i re ẹrrẹe.

¹⁸ Rhunmwuda ọnii, gie ẹko okhuo ne u rhie ye owa gha sẹ uẹ ọyẹnmwẹ ne u vbe gie uvbi ne u rhie re, gha ya ekhọe ruẹ rhiẹnrhiẹn,

¹⁹ ne ọ mose kevbe ne lọgiọọ vbe ẹrhuẹ amwẹ. Gie ose ẹre gha ya ẹko rhiẹnrhiẹn uẹn gie irẹn vbe ya ahoẹmwọmwa ẹnrẹn hin uwẹ egbe.

²⁰ Ovbi mwẹ, vbọzẹ ne u gha na rhie ahoẹmwọmwa ruẹn ne okhuo ọvbehe yi? Vbọzẹ ne ose amwẹ ẹrrẹe gha na viẹn ye uwe aro sẹẹ?

²¹ E Nọyaẹnmwa bẹghe emwi ne u ru hia, ehe ne u a rhirhi la, ọ ghe ruẹ.

²² Orukhọ ne ọmwa dan ru ifi ọ re nọ. Ọgua ọghe orukhọ ẹre ghi vbe muẹn.

²³ Ọ wu, rhunmwuda, Ọ ma rẹn vbe ne a ziengbe emwi hẹ. Ukọnmwẹ ọnrẹn ne ọ wia ọ re ọ ra gie ẹre idin.