Itan 4 - Edo Bible (E Baibol Ẹdo) Version 1996

Ọmaa Ne Ọ Rre Ẹwaẹn

¹ Ivbi mwẹ, wa gha danmwehọ emwi ne erha uwa ma uwa ẹre. Gbe ehọ kotọ, u gha vbe gha mwẹ irẹnmwi.

² Emwi ne i ma uwa re wa maa, rhunmwuda ọnii, wa ghi ye iran hia rre.

³ Ẹghẹ ne I na gha rre ọvbokhan kherhe, I na gha re ọmọ okpia okpa kẹkan ne erha mwẹ kevbe iye mwẹ mwẹ,

⁴ erha mwẹ gha ma mwẹ emwi, ọ ghi kha wẹẹ, “Ye ẹmwẹ ne I tae rre ghẹ mianmian ẹẹn. Gha ru vbene I tama ruẹn, u gha diagbọnya.

⁵ Gha mwẹ ẹwaẹn kevbe a ghe umian emwi! Ghẹ mianmian, ra ne u fi iyeke gbe ẹmwẹ ne I tae.

⁶ Ghẹ he ẹwaẹn yotọ, ọ gha vbe degue ruẹ, gha họ ẹmwẹ ọnrẹn, ọ gha wan ebe yo nuẹn.

⁷ Ne a gha mwẹ ẹwaẹn ọrọre emwi kpataki ne ọ sẹre ne u gha ru, emwi ọvbehe hia ne ọ khọn ruẹn ne u gha mwẹ, vbe gha mwẹ a sẹtin ghe umian emwi ba ẹre.

⁸ Gha ho ẹmwẹ ẹwaẹn, ọ gha vbe ya uwẹ khian ọmwa ne ọ kpolo. Ye obọ gba ẹe ginna egbe, ọ gha vbe rhie uyi guẹ.

⁹ Rẹn gha vbe gha re ẹde uyi ruẹ.”

¹⁰ Danmwehọ mwẹ ovbi mwẹ. Ẹmwẹ ne I tama ruẹn, gha kae ye uhunmwu emwi kpataki, u gha vbe tọ ẹsẹse.

¹¹ I ma ruẹn ẹwaẹn nẹ, deba vbene ọ kere ne a gha yin hẹ.

¹² Idobo rhọkpa i ra vbe gha rre uwẹ odẹ, a dẹghe u ye ewaẹn khian, a deghẹ u vbe rhulẹ, u i ra rrua owẹ.

¹³ Gha ye emwi ne u ruẹ re hia rre. Emwi ne u ruẹ re ọrọre ẹdagbọn ruẹn — dae yi ẹse.

¹⁴ Ghẹ yo ehe ne avbe emwa dan yo. Ghẹ ya egbe ta emwa dan.

¹⁵ Ghẹ danmwẹ ọẹn. Lẹ ne emwi dan! Fieghe uhunmwu yọ ne u lele odẹ ruẹ gha khian.

¹⁶ Emwa dan i miẹn ovbe vbiẹ vbe ẹ i re te iran ru emwi eso ne ọ ma gba nẹ. Iran ghi rhan aro ua ye ukpo, sokpan te iran ghi kuan emwa eso nẹ.

¹⁷ Uyinmwẹ dan kevbe ọkhọ, te iran ye vbe evbare kevbe amẹ ne iran.

¹⁸ Odẹ ne ọmwa esi la khian, te ọ yevbe ovẹn nẹ o da yan rre, uwanmwẹ ọnrẹn ghi gha mu otọe yọ rhinrin ọ te do sẹ ẹghẹ ogiavan.

¹⁹ Sokpan, te odẹ ne ọmwa dan la khian yevbe asọn. Iran ghi dele sokpan iran i bẹghe emwi ne ọ rrua iran owẹ.

²⁰ Ovbi mwẹ, gha rhie ehọ ye ẹmwẹ ne I ta. Gha danmwehọ ẹmwẹ mwẹ.

²¹ Ghẹ gie iran fuẹ. Ye iran rre ne u vbe rhie iran mwẹ vbe ekhọe ruẹ.

²² Iran gha rhie arrọọ kevbe egberranmwẹ ne emwa ni rẹn otọ ẹre.

²³ Ye egbe vbekpa iro ne u zẹ, iro ne u zẹ ọ re ọ ta vbene ẹdẹ agbọn ruẹn ra gha ye hẹ.

²⁴ Ghẹ guan ẹmwẹ ne ẹ i re ẹmwata ẹdẹ, ghẹ mwẹ obọ vbe ohoghe kevbe avbe ẹmwẹ ne ọ ye ọmwa bibi odẹ.

²⁵ Ye ekhọe ne ẹ i mwẹ ero kevbe ne ọ sotọ gha ghe odaro, ghẹ ya ekhue gha khua uhunmwu.

²⁶ Kakahọ gha gbe ekhọe kotọ mwamwa emwi ne u khian ru, emwi ne u ru hia gha wa dunna.

²⁷ Gha lẹ ne emwi dan, ne u vbe gha la odẹ ọwara khian. Ghe zẹ ukpowẹ okpa hin urodẹ rre.