Itan 31 - Edo Bible (E Baibol Ẹdo) Version 1996

Ude Ne A Bu Ọba Re

¹ Ẹmwẹ ẹwaẹn ne iye Lemuẹl ne Ọ ba tama rẹn:

² “Ovbi mwẹ ne ọ ghan ọ re u khin, emwi ne a ya họn erhunmwu mwẹ. Demwi ne I gha tama ruẹn?

³ Ghẹ lo ẹtin ruẹn hia ye okhuo ne a tie ẹre ovbe ra ne u viọ igho ruẹ hia ne ikhuo, ọba nibun ọ re ọ he ya uhunmwu khiọ ẹmwẹ iran.

⁴ Danmwehọ, Lemuẹl ọ ma kei ne avbe ọba gha da ayọn ra ne ayọn ne ọ fian gha khọn iran.

⁵ Iran gha da ayọn, iran ghi mianmian uhi, iran i ghi vbe ye emwi ne ọ khẹke avbe ivbiogue rre.

⁶ Ayọn ne ọ fian, avbe emwa ni ra ghi wu ọ re ọ ke na, iran ni rre uwu agbọn ọrhiae.

⁷ Gie iran da ayọn ne iran ta mianmian ogue kevbe usẹ ne iran ye.

⁸ “Guan ne avbe emwa ni i sẹtin guan ne egbe iran. Khọn ekhae ne avbe emwa ni i sẹtin rria ikhi egbe iran.

⁹ Guan ne iran, ne u do gha re nọbuohiẹn ẹmwata. Mu ẹzọ avbe ivbiogue kevbe ni i mwẹ gui.”

¹⁰ Ọ wa lọghọ a te do miẹn amwẹ ne iye owa, ive ẹ re sẹ emwi itegbe ighobioye ni bun.

¹¹ Ọdọ ẹre mu ẹtin yan rẹn, ẹ i khin ovbiogue ẹdẹ.

¹² Vbe ẹghẹ hia ne iran gba ya rre agbọn, ọ maa ọ re ọ ho ye ọre egbe, ẹ i vbe ho emwi ikuanegbe ghe ẹre.

¹³ Ọ ghi gha ya obọ ẹre winna vbe ẹghẹ hia, ọ ghi gha do ukpọn eto ohuan kevbe ukpọn eto ovbiohuẹ.

¹⁴ Ọ ghi gha la erhan la irri ya gha rhọ evbare rre zẹ vbene okọ avbe iduẹki ru.

¹⁵ Ẹdẹ i he gbe vbe ọ kpaegbe ya gha le evbare ne emwa owa ẹre, kevbe ne ọ vbe tama avbe eguọmwadia ikhuo ni gue ẹe iwinna ne iran gha winna.

¹⁶ Ọ gha ghe otọe, ọ ghi dẹ ọe, ọ ghi ya igho ne ọ khuaẹn kọ emwiokọ yọ.

¹⁷ Ọmwa ne ọ mu aro ye iwinna nọ, ọ wegbe ọ vbe fu ẹro iwinna.

¹⁸ Ọ rẹn ive emwikemwi ne ọ ru, ọ ghi wa gha winna sẹ ogiasọn.

¹⁹ Rẹn ọ re ọ tobọ ọre sin oru ẹre, rẹn ọ vbe do ukpọn rẹn.

²⁰ Ọ zẹ emwi obọ ne avbe ivbiogue ke ni i mwẹ.

²¹ Esia ne ọ si oni gha dee, ẹ i vbe si osi rhunmwuda, emwa rẹn mwẹ ukpọn ni mwẹ imi ne iran ya hin egbe.

²² Ọ do ukpọn ne a ya wa ukpo, ukpọn ododo eto ovbiohuẹ ne a ma gua.

²³ Agbọn hia rẹn ọdọ ẹre ẹsẹse, usun emwa ni dekpe vbe ore ẹvbo nii ọre nọ.

²⁴ Ọ gha do avbe ukpọn kevbe ọza, ọ ghi khiẹnnẹ ọẹn ne avbe ekpatẹ.

²⁵ Ọmwa ne ọ wegbe ne a ya ọghọ na nọ, ẹ i vbe si osi ye ẹdẹ nakhuẹ.

²⁶ Ẹwaẹn ọmẹhẹ ọre ọ ya guan.

²⁷ Te ọ wa winna vbe ẹghẹ hia, ọ ghi vbe gha koko emwa rẹn.

²⁸ Avbe emwa rẹn vbe kpọnmwẹ ọ re ẹse, ọdọ ẹre ghi vbe gha tian rẹn.

²⁹ Wẹẹ, “Ikhuo nibun ọ re ọ wa re ikhuo esi sokpan, wẹ ọ re ọ maa sẹẹ ehia.”

³⁰ Te ose rẹrẹ ọmwa, te ukhuegbe vbe khian ne a ho bẹkun, sokpan okhuo ne ọ ya ọghọ ne Nọyaẹnmwa, te ọ kere ne a tian rẹn.

³¹ Tian rẹn ye emwi ne ọ ru hia. Ọmwa ne ọ kere ne emwa hia gha ya ọghọ na ọre nọ.