Itan 30 - Edo Bible (E Baibol Ẹdo) Version 1996

Ẹmwẹ Agọr

¹ Ẹmwẹ Agọr ne ovbi Jakẹ ọre e na khin: “Osanobua ma yaba mwẹ, Osanobua ma yaba mwẹ, egbe wa fo mwẹ nẹ.

² Aranmwẹ oha ọ re I ghi khọ sẹẹ ọmwa nagbọn. Ẹwaẹn ne ọ kere ne ọ gha gu emwa nagbọn i ghi gue mwẹ.

³ I ma he ruẹ emwi ẹwaẹn ẹdẹ, I ma vbe rẹn emwirhọkpa hiehie vbekpa Osanobua.

⁴ De ọmwa ne ọ he ruẹ irẹnmwi ẹrinmwi guẹ? De ọmwa ne ọ he gue ẹhoho ye obọ ẹre ẹdẹ? Ra ne ọ ya ukpọn gbalọ amẹ? Ra ne ọ vin uwu ye ehe ne agbọn sẹe? Gha nọ adeghẹ wẹ rẹn ọnrẹn, gha ọ re ovbi ẹre?

⁵ “Te Osanobua mu ẹmwẹ ne ọ khare sẹ. Te ọ yevbe asa ne emwa hia ni lẹ gbinna ẹn.

⁶ U gha ya kha wẹ ọ ta ẹmwẹ ne ọ ma zẹdẹ ta, te Osanobua gu uẹ gui, ọ ghi rhie ma wẹ ọhọn ohoghe ọ re u khin.”

Itan Nibun Ọvbehe

⁷ Osanobua, emwi eva ọ re I wẹ ne u gunmwẹ gha mwẹ I te wu.

⁸ Ghẹ gun mwẹ gha ta ohoghe, ghẹ gun mwẹ gha mwẹ ẹfe, ghẹ gunmwẹ khian ovbiogue. Rhunmwuda ọnii, ye evbare ne ọ gha vuọn mwẹ ẹko, koko mwẹ.

⁹ I gha do gha mwẹ gberra vberriọ, ne I ghẹ do ya gha kha wẹ u i mwẹ emwi ne u ye mẹ. Sokpan, I gha re ovbiogue, ne a ghẹ miẹn wẹ te I ghi ya rha, I na fa Osanobua mwẹ uan.

¹⁰ Ghẹ gha zan ọguọmwadia ma arowa ẹre. Ọ gha tie ihẹn nuẹn, te ọ wa sẹ uẹ egbe.

¹¹ Emwa eso rrọ ni tie ẹbọ ne erha iran, iran i vbe rẹn ẹse ne iye ru ne iran.

¹² Emwa eso rrọ ni ro wẹ te iran wa huan, vberriọ te iran wa gbe iruẹn sẹlẹkẹ.

¹³ Emwa eso rrọ ni ro wẹ iran maa gbe a i miẹn ọmwa vbe ne iran ye hiehiere.

¹⁴ Emwa eso rrọ ne obọ ẹre wa rhanmwẹ ivbogue kevbe ne ẹ i mwẹ, ọnii ọ re iran wa ya re.

¹⁵ Alualua mwẹ emọ ikhuo eva “Rhie mẹ!” ọ re a tie iran eveva:

¹⁶ Emwi ẹnẹ ne ẹko i vuọn ọ re ọ rrọ, ẹvbo avbe orinmwi, okhuo ne ẹ i mwẹ emọ, otọe ne ọ kae ne amẹ ma he rhọ yi, kevbe erhẹn ne obọ ma ghi gba ya dọyọ.

¹⁷ Ọmwaikọmwa ne ọ ya erha ẹe gbogiẹ ra ne ọ zan iye ẹe vbe ọ ghi khian ọmaẹn nẹ, ugu ọ re ọ kere ne ọ rri ọe, ra ne ahianmwẹ oha wọlọ ẹre aro kua.

¹⁸ Emwi enẹ ọ re ọ rrọ ne ọ kpan mwẹ odin, ne ẹ i gunmwẹ rẹn otọ ẹre:

¹⁹ Oghohọn ne ọ tin vbe iso, ẹyẹn ne ọ khian vbe uhunmwu okuta, okọ ne ọ gua la okun khian, deba okpia kevbe okhuo ni ho ẹmwẹ egbe.

²⁰ Emwi ne okhuo ne ọ ma gua obọ ọdọ ru ọ re ọna khin: ọ ghi ya ghẹ, iyeke ọnii, ọ ghi ya khuẹ, ọ ghi kha wẹẹ, “I ma ru a i ghẹ ru!”

²¹ Emwi enẹ ọre ọ rrọ ne otọe tobọ ẹre i sẹtin ya egbe miẹn:

²² Ọviẹn ne ọ rri ọba, ọzuọ ne ọ miẹn emwi ne ọ khọnrẹn hia gha re,

²³ okhuo dan ne ọ miẹn ọdọ rọnmwẹ, deba ọguọmwadia okhuo ne ọ gbe arowa ẹre nokhuo miẹn ẹre ọdọ.

²⁴ Aranmwẹ enẹ ọ re ọ rrọ ne ọ wa giẹghẹ sokpan te ẹwaẹn gba ne iran:

²⁵ Avbe iranmwẹ: iran ma wegbe sokpan iran si evbare iran koko hin rre vbe uyunmwu.

²⁶ Avbe ofẹn okuta: iran ma wegbe sokpan, uwu okuta ọre iran bọlọ owa yi.

²⁷ Irhiso: Iran i mwẹ ọba, sokpan, te iran mwa otu ya khin.

²⁸ Osikpalọ: u gha sẹtin ya obọ rhie ọkpa, sokpan te u gha miẹn iran vbe ẹguae avbe ọba.

²⁹ Emwi enẹ ọ re ọ rrọ ne ọ sẹ ọmwa ughe vbe iran a gha khian.

³⁰ Oduma ne ọ wegbe sẹẹ vbe uwu aranmwẹ oha hia, emwi okpa ne ọ khue ẹre udu i vbe rrọ.

³¹ Avbe ẹwe, ọkporhu ne ọ zẹ okpowẹ kevbe avbe ọba vbe odaro emwa iran.

³² Adeghẹ u te wa kọn sẹrriọ wẹ te u ya itengbemu ziro ọkhọ, dobọyi ne u roro ẹe!

³³ U gha kpogho ewẹn ẹmila, u ghi do gha mwẹ ewẹn ẹmila ne ọ kiri. U gha fi ọmwa emwi vbe ihue, ọ ghi gha tue. U gha ya ohu mu emwa, u gha la ẹmwẹ.