Itan 3 - Edo Bible (E Baibol Ẹdo) Version 1996

Ude Ne Avbe Igbama

¹ Ovbi mwẹ, ghẹ mianmian emwi ne I ma ruẹn re. Gha ye emwi ne I tama ruẹn ne u gha ru rre vbe ẹghẹ hia.

² Emwi ne I ma ruẹn re gha rhie utọmwẹ nuẹn, ọ ghi vbe ye agbọn ma ruẹn.

³ Ghẹ rhie obọ hin agba ẹko ọmwa kevbe ekhọe esi rre, viọ iran kinnọ urhu, gbẹnnẹ iran ye ekhọe ruẹ.

⁴ U gha ru vbenian, u gha miẹn aro ne ọ maa vbe obọ Osanobua kevbe emwa nagbọn.

⁵ Ya ẹtin ruẹn hia mu ẹtin yan e Nọyaẹnmwa. Ghẹ mu ẹtin yan emwi ne uwẹ ro ighe uwẹ rẹnrẹn.

⁶ Gha ye Nọyaẹnmwa rre vbe emwi ne u ru hia, ọ gha vbe gha ma ruẹn odẹ ne ọ kere.

⁷ Ghẹ gie ekhọe ruẹ gha guẹ zẹ iro wẹ u wan sẹẹ vbe ne u ye; emwi ọkpa wa nọ wẹ ne u gha họn ẹmwẹ ne Nọyaẹnmwa, ne u vbe gha biegbe hin abakuru rre.

⁸ U gha ru vberriọ, te ọ ra gha ye vbe ukhunmwu esiesi, ọ gha kpe ẹwẹn ruẹn rrie, ọ ghi vbe rhie ọrọkhọrhọ ye obalọ ruẹ.

⁹ Ya ọghọ ne Nọyaẹnmwa vbekpa ne u gha na ya avbe emwi ne ọ maa sẹ vbe ugbo ruẹ zẹ ọhẹ gie ẹe.

¹⁰ U gha ru ẹe vberriọ, avbe erru ruẹ gha vuọn ne emwiokọ, ayọn gha vbe bun sẹrriọ wẹ, u i sẹtin ruẹn ọnrẹn ye emwi fo.

¹¹ Ovbi mwẹ, e Nọyaẹnmwa gha dia ruẹ, kakabọ danmwehọ, u ghi vbe rhie ẹre zẹ vbe ẹmwẹ ne a tama ọmwa yotọ.

¹² Emwa ne Nọyaẹnmwa ho ẹmwẹ ọnrẹn ọ re ọ dia ye odẹ, zẹ vbene erha dia ọmọ ne ọ ya hio ye odẹ.

¹³ Afiangbe nọ ne ọmwa ne ọ ghi do khian ne ọ wan, ne ọ ghi do gha mwẹ irẹnmwi.

¹⁴ Ere ne ọ rrọ sẹ ọghe esiliva, ive ne ọ rrọ sẹ ọghe igoru ne uwẹ.

¹⁵ Ẹwaẹn ghan sẹẹ avbe ikpẹrọnmwọ, a i miẹn emwi ne a ya gie ẹre vbe uwu emwi ne ọmwa ho hia.

¹⁶ Ẹwaẹn ọ re ọ rhie utọmwẹ ne ọmwa, kevbe ẹfe, kevbe ọghọ.

¹⁷ Ẹwaẹn gha sẹtin ye ẹdagbọn ruẹn khian ne ọ rhiẹnrhiẹn, ọ ghi vbe su ẹ la ẹe fo.

¹⁸ Ọ yẹnmwẹ sẹ iran ni khian emwa ni wan, ẹwaẹn gha rhie arrọọ ne iran.

¹⁹ Ẹwaẹn obọ ẹre, ọ re Nọyaẹnmwa ya yi agbọn, irẹnmwi obọ ẹre ọ re ọ ya rhie iso ye ihe ẹre.

²⁰ Ẹwaẹn rẹn ọ re ọ ru ẹe ne avbe ẹzẹ gha lẹ, kevbe ne okuku vbe rhọ amẹ ye otọe.

²¹ Ovbi mwẹ, da ẹwaẹn ruẹn yi, deba a ghe umian emwi. Ghẹ gie iran wi ruẹ.

²² Iran gha rhie arrọọ nuẹn, arrọọ ne ọ vuọn ne oghọghọ kevbe ọyẹnmwẹ.

²³ U gha sẹtin lele odẹ ruẹ gha khian, vbene u i na vbe rrua owẹ.

²⁴ U i ra gha fian afianma vbe u a ra ya lovbiẹ, u ghi wa vbe vbiẹ khuẹrhẹ vbe asọn.

²⁵ U i ra vbe hawa ye ẹmwẹ ọkhọ udomwurri, egbe ne ọ hẹ rhu emwa dan zẹ vbe okpẹhoho.

²⁶ E Nọyaẹnmwa gha rhie ruẹ lẹre. Ẹ i vbe guẹ de ye ifi.

²⁷ Ẹghẹ ne u a rhirhi ya sẹtin hia, gha ru emwi esi ne ọmwa ne ọ khẹke.

²⁸ Adeghẹ u gha sẹtin ru iyobọ ne ogieva ruẹ wanwanna, ghẹ tama rẹn wẹ ne ọ ziengbe khẹ akhuẹ.

²⁹ Ghẹ zẹ iro emwi ne ọ gha ru ikuanegbe ne ogieva ruẹ, ọmwa ne ọ yin kuẹ nọ, ọ vbe mu ẹtin yan ruẹn.

³⁰ Ghẹ gu ọmwa ne ọ ma ru uwẹ emwi rhọkpa gha muan obobo ẹmwẹ.

³¹ Ghẹ ya aro yi emwi ọmwọkhọ, ra ne u wẹ ne u gha ye egbe ta iran,

³² rhunmwuda, e Nọyaẹnmwa khuiwu iran ni ru emwi dan, sokpan, ọ mu iro ma emwa ẹmwata.

³³ Te Nọyaẹnmwa fi owa emwa dan unu, sokpan, ọ keghi fiangbe owa emwa esi.

³⁴ Ẹ i mwẹ emwi ne ọ ya iran ni ya obọ rra ẹwẹe iran ru, sokpan, ọ wa ru iran ni mu egbe rriotọ ẹse.

³⁵ Emwa ni wan gha titi vbe ọghọ sokpan, te akpa ra gha dọlegbe ya obọ silo efaa rri egbe.