Itan 29 - Edo Bible (E Baibol Ẹdo) Version 1996

¹ Adeghẹ te u wa dọlegbe zevbudu yọ ẹghẹikẹghẹ ne a ya guẹ gui ne a dia ruẹ ye odẹ, ẹdẹ ọkpa, emwi gha degbe uẹ, u i ra vbe miẹn uhunmwu vbọ.

² Ma mwẹ ọmwa ẹmwata ne ọ rre asẹ, I gha vbe ma ruẹn emwa ne ẹko sẹ ọ re ọyẹnmwẹ. Ma mwẹ ọmwa dan ne ọ rre asẹ, I gha vbe ma ruẹn emwa ne agbọn khan rẹn.

³ Adeghẹ ẹwaẹn yẹ ruẹ, ẹko ghi gha sẹ erha a ọyẹnmwẹ ghe ruẹ. Ẹki omurhia nọ ne a gha lo igho ne avbe igberagia.

⁴ Ekhọe ọba gha rre ẹmwẹ ohiẹn ẹmwata, ẹvbo ghi wegbe, sokpan, adeghẹ ẹmwẹ igho okpa ọ re ọ rẹnrẹn, te ọ ra gbe ẹvbo ẹre sotọ.

⁵ Adeghẹ u kpe ọsiọ ye ewọwọ, te u rhuẹ ifi ne egbe uẹ.

⁶ Orukhọ emwa dan ọrọre ifi ne ọ mu iran, vbe ne emwa esi na rre uwu ọyẹnmwẹ kevbe a i mwẹ ẹbe.

⁷ Ọmwa esi rẹn emwi ne ọ sẹ avbe ivbiogue egbe, sokpan, emwa dan i sẹtin rẹn otọ egbe emwi vberriọ.

⁸ Emwa ne ẹ i da ne emwa ọvbehe sẹtin wa fian otighi fi ẹvbo. Emwa ni wan, te iran ye ehe hia furre.

⁹ Ọmwa ne ọ wan gha tie ọzuọ ẹzọ, ogie okpa ọ re ọzuọ nii wa giẹ, ọ ghi gha vannọ ọkan, ọ ghi gha tie ẹbọ.

¹⁰ Emwa ne okuo ọpia yẹ, te iran ra khuiwu ọmwa ne ọ ta ẹmwata, sokpan, emwa ẹmwata ghi hẹko tan obọ ga ọmwa vberriọ.

¹¹ Te avbe akpa wa rhie ohu iran ma ne agbọn hia miẹn, sokpan avbe umẹwaẹn ghi hẹko zin egbe, iran ghi gbe ibiẹ rrie.

¹² Ọmwa ne ọ khaemwisẹ gha danmwehọ ẹmwẹ ohoghe ne a ta ma rẹn, ewọe ẹre hia ghi do khian ọhọn ohoghe.

¹³ Ehe ne ovbiogue kevbe ọmwa ne ọ zẹ ọe kpokpo na re okpa ọrọre wẹ Osanobua ọ re ọ viọ aro ne iran eveva.

¹⁴ Adeghẹ ọba mu ẹzọ ovbiogue gui, ọ gha wa tọ vbe egie.

¹⁵ A gu ọmwa gui kevbe a gbe ọmwa hin ọkhọ rre, wa maa ne ibiẹka. Adeghẹ a gie ọmọ wa gha ru emwi ne ọ rhirhi khọn rẹn, te ọ ra gie ekhue ẹre gha mu iye ẹe.

¹⁶ Emwa dan gha rre asẹ, a rra uhi ghi gha biẹ yọ. Sokpan, ọmwata gha tọ miẹn iyeke emwa vberriọ.

¹⁷ Ma ovbuẹ emwi, te u ra ya ẹe gha hio. Ẹ i vbe mwẹ ẹghẹ okpa ne ọ gha ya ye ekhue mu ẹẹn.

¹⁸ Ẹvbo ne Osanobua i gie odẹ ma, ẹvbo ne ọ ma dehẹnhẹn nọ. Afiangbe ọrọre ọghe ọmwa ne ọ rhie uhi Osanobua lẹre.

¹⁹ U i sẹtin ye aguọmwaguan okpa dia ọguọmwadia ye odẹ. Ọ sẹtin rẹn emwi ne u ta vbe ne ẹ i na zẹ ye uẹ ẹre.

²⁰ Ọzuọ ne ọzuọ ọ re idaehọ rrọ na sẹ ọmwa ne ẹ i roro ẹmwẹ ọ ke ta ẹe.

²¹ Adeghẹ u wa viọ emwi ne ọguọmwadia a rhirhi nọ ne ẹn ke ẹghẹ ọvbokhan kpao, ẹdẹ ọkpa, ọ gha miẹn ruẹn emwi ruẹn hia.

²² Emwa ne egbe balọ, te iran wa si ẹzọ kevbe otighi rre ẹghẹ hia.

²³ Te itengbemu mu ọmwa gbe otọ, sokpan, u gha re ọmwa ne ọ mu egbe rriotọ, a ghi gha yọghọ nuẹn.

²⁴ Ogieva oyi ọrọre eghian rẹn ne ọ khọ sẹẹ ehia, ọ gha ta ẹmwata vbe iko, a gha rri ọre oya, adeghẹ ọ ma ta ẹmwata, Osanobua gha fi ẹre unu.

²⁵ Emwi dan wa nọ ne a gha mu ẹmwẹ emwi ne ọmwa ọvbehe ro vbekpa ọmwa ro, sokpan, u gha mu ẹtin yan e Nọyaẹnmwa, ẹbe fo.

²⁶ Agbọn hia ọ re ọ ho ne ọmwa ne ọ rre asẹ gha ho ẹmwẹ ọnrẹn, sokpan obọ e Nọyaẹnmwa okpa ọ re a na mian ẹmwata.

²⁷ Ọmwata i ho ẹmwẹ ọmwa dan, ọmwa dan i vbe ho ẹmwẹ ọmwata.