Itan 27 - Edo Bible (E Baibol Ẹdo) Version 1996

¹ Ghẹ rhuọ khẹ ẹdẹ nakhuẹ; wẹ ma rẹn emwi ne ọ gha sunu ke ẹghẹ na kpao ya sẹ ẹghẹ nii.

² Gie emwa ọvbehe tian ruẹn, ne a wa kha wẹ avbe orhunmwuyẹn, ghẹ tobọ ruẹ tian egbe ruẹ ẹdẹ.

³ Okuta khua, ekhae vbe khua sokpan a i ye ukhuamwẹ iran gie ẹti ne ukọnmwẹ sẹtin si rre.

⁴ Emwi dan ne ọ rhia emwi ọ re ohu khin, sokpan a i zẹdẹ yae gie igbọvo hiehiere.

⁵ A gu ọmwa gui vbe azagba ọ re ọ maa sẹ ne a kọe ye ẹre ekhọe wẹ ẹ i re igbinna ọghe irẹn ọ re ọmwa ni ye hiehiere.

⁶ Ọse gha kue dobọ fi ọmwa emwi ne ọ da ọmwa, iku ọyẹnmwẹ nọ. Sokpan, eghian ọmwa gha ye obọ kin ọmwa urhu; te a khẹ ye egbe.

⁷ Ẹko gha vuọn ọmwa nẹ, te ọ he owọn vbe a gha rhie ne ẹẹn, sokpan ohanmwẹ gha gbe ọmwa, uhin ighe te avbe evbare ni rriara hia ghi rhiẹnrhiẹn.

⁸ Ọmwa ne ọ kpao vbe owa rre, te ọ yevbe ahianmwẹ ne ọ kpa hin oko rre.

⁹ Ori ke emwi ne a sa ye egbe ne ọ winhin, te ọ ye ẹko rhiẹnrhiẹn sokpan, orueghe, te ọ mu ọmwa orhiọn rueghe.

¹⁰ Ghẹ mianmian avbe ọse ruẹ ra avbe ọse erha a, u gha mwẹ ọlọghọmwa, ghẹ nọ ọtuẹn iyobọ. Ọmwa ẹdogbo ne ọ sikẹ ọmwa gha sẹtin ru iyobọ nuẹn sẹ ọtẹn ne ọ rre urria.

¹¹ Gha wan ovbi mwẹ, ne u gie ẹko gha rhiẹnrhiẹn mwẹ, I gha sẹtin gha zẹ ẹmwẹ wanniẹn ọmwa ne ọ rhirhi a gbodan ghe mwẹ.

¹² Avbe umẹwaẹn sẹtin rẹn vbe orueghe a gha dee, iran ghi gban egbe ne ẹẹn; sokpan, ọmwa ne ẹ i ro iro ghi wa ye owẹ eveva khian la rọ, ọ ghi ya gha ghe I ma rẹn vbe okiekie.

¹³ Ọmwa ne ọ kọn sẹrriọ ne ọ na kha ighe rẹn gha mu osa orhunmwuyẹn hae, te ọ kere ne a viọ ẹre emwi hin rre ne aro ya da ẹe wẹ ọ gha gele hae.

¹⁴ U wa tie ẹbọ ne ọsiọ, ọ re ọ maa sẹ ne u vannọ okan ya huẹn ọnrẹn vbe ovbe rhunmwuda ighe te u tuẹ ọe.

¹⁵ Okhuo ne ọ vian, te ọ ye vbe amẹ ni wẹwẹ ne ọ miẹn ẹdẹ.

¹⁶ Vbe u a ra ya ru ẹe hẹ ne ọ hunwan? Wẹ he hia ne u gbe ẹhoho odẹ ẹdẹ ra, ra ne u gue ofigbọn ye obọ.

¹⁷ Te a ruẹ ẹwaẹn vbe obọ egbe, zẹ vbe ne ematọn lọ ematọn ne ọ gha mu.

¹⁸ Gbe aro ghe erhan ohọ, u gha miẹn ọmọ rẹn kọlọ re. Ọguọmwadia ne ọ ga arowa ẹre, te a gha rhie uyi ye ọ re egbe.

¹⁹ Aro ruẹ ọ re u bẹghe aghọnghọn rẹn vbe uwu amẹ, wẹ tobọ ruẹ ọ re u bẹghe vbe uwu ekhọe ruẹ.

²⁰ Emwi ne ekhọe ọmwa ne agbọn ho, te ọ yevbe ehe ne avbe orinmwi dia, a i miẹn ẹghẹ ne a ya kha ighe otọe i ghi gua.

²¹ Erhẹn ọ re ọ danmwẹ igoru kevbe esiliva ghe, uyinmwẹ ọmwa nagbọn vbe gie a danmwẹ ghe.

²² Ọ gha khọn ruẹn, gbe ọzuọ ne ọ kẹ ekherhe ne ọ wu, u i sẹtin gbe ukọnmwẹ ọnrẹn hin ẹre ẹko rre.

²³ Kakabọ gbe aro kotọ gha koko avbe ohuan kevbe ẹmila ruẹ.

²⁴ Rhunmwuda ẹfe i re emwi etẹbitẹ. Uhunmwu ẹvbo tobọ ọre, ne ọ re etẹbitẹ i rrọ.

²⁵ U ghẹghi gia irunmwu ẹsin nẹ, u ghi gbẹn irunmwu ni rre ọkpẹn oke vbene avbe irunmwu ẹsin ni wa vbe ya wan dee.

²⁶ U sẹtin ye eto ohuan ruẹn do ukpọn, u ghi vbe ya igho ne u miẹn vbe ẹwe ruẹ ne u khiẹn dẹ otọ.

²⁷ Ni ghi dekẹe vbe ẹwe nii, u gha sẹtin miẹn ewẹn ọnrẹn ne ọ gha sẹ uẹ ya koko egbuẹ kevbe ẹgbẹe ruẹ, deba avbe eguọmwadia emọ ikhuo ni guẹ vbọ.