Itan 26 - Edo Bible (E Baibol Ẹdo) Version 1996

¹ Urhomwẹ ne a rho akpa, te a mu ẹẹn rhia zẹ vbe esia vbe ẹghẹ uyunmwu ra amẹ ne ọ rhọ vbe ẹghẹ emwiorhọ.

² Ẹbọ ne a tie ne ọmwa i miẹn emwi ru uwẹ re sokpan a ma wẹ te u gele fidọn. Te iran yevbe ahianmwẹ ni tin gberra vbe ne iran i na vbe tin kan otọe.

³ Te a ye asan gbe ẹsin, te a rrọ ekagha ye ekẹtẹkẹtẹ unu, ugbemwẹ ọre a gbe ọzuọ.

⁴ U gha rhie ewanniẹn ye inọta oya, ọmwa oya ọ re uwẹ vbe khin zẹ vbe ọmwa ne ọ nọ nene ọta.

⁵ Rhie ewanniẹn oya ye inọta oya, ẹghẹ nii, ọmwa ne ọ nọ ọta nii, gha do rẹn wẹ rẹn i re ekpakpasusu ne ọ ke egbe ẹre yi.

⁶ U gha gie ọzuọ uhunmwu, u sẹtin wa vbe giagia owẹ ruẹ kua rhunmwuda, orueghe ọ re u gualọ.

⁷ Ọzuọ gha sẹtin lo itan ne a kpa zẹ vbene uke gha sẹtin vbe ye owẹ ọre khian.

⁸ A gha rho ọmwa ne ọ re ọzuọ, te ọ yevbe ne a mu okuta gba ye umọvọn.

⁹ Ọzuọ gha kpa itan ne umẹwaẹn kpae, te ọ ye ọmwa rre vbene ọ ye hẹ vbe ọmwa ne ayọn gbe a gha zẹ igban hin obọ rre.

¹⁰ Ọmwa ne ọ viọ emwa la iwinna, ne ọ wa rhie ọzuọ ne ọ rhirhi a rre, te ọ ye egbe wọ emwa hia ne ọ mwẹ obọ vbe iwinna nii.

¹¹ Ọzuọ ne ọ yin uyinmwẹ okpa yan egbe ukpogieva, te ọ yevbe ekita ne ọ vbe rri ekpa ne ọ kpae.

¹² Ọzuọ ne ọ ghi wa kọn sẹ vbe ehia, ọ maa sẹ ọmwa ne ọ ro wẹ rẹn wan vbe ne ẹ i na wan hiehiere.

¹³ Demwi ne ọ ye avbiẹrẹ khui egbe ye owa yi? Demwi ne ohan rẹn muẹn yi? Avbe oduma nọ ra?

¹⁴ Ọmwa oroho gha werriẹ yo wẹrriẹ rre vbe ukpo ẹre zẹ vbene ẹkhu de yo de rre vbe olode ne a gbae ginna.

¹⁵ Emwa eso mitan sẹrriọ wẹ ẹ i sẹtin ye obọ fian evbare rhie ye unu.

¹⁶ Ọmwa oroho ghi gha roro egbe ẹre ye wẹ rẹn ru okpia sẹẹ arhin ihinrọn nọ gha wa sẹtin rhan otọ ẹre, ne ọ wẹ aro ua, emwi ne ọ siẹe ne iran na roro ẹmwẹ okpa lele vbene iran roro ẹe la.

¹⁷ Ne ọmwa ya gha fi ukpe ye ẹmwẹ ne ọ ma kan rẹn, te ọ ye vbe ne ọmwa wa la ore, ọ na viọ ekita ehọ ya siẹe kpa hin otọe rre.

^18-19 Ọmwa ne ọ mu ogieva ẹre ru, ọ na wẹ ọdẹn rẹn gbe, te ọ yevbe ọmwẹmwẹ ne ọ ye emwi ne ọ sẹtin kuan ọmwa ku.

²⁰ Erhan gha fo vbe erhẹn, erhẹn ghi dọyọ, ewẹwẹwẹ gha fo vbe ẹzọ, ẹzọ ghi fo.

²¹ Ogiọnmwẹ erhẹn ọ re ọ ye erhẹn viẹn kpoo, erhan ọ re ọ ye erhẹn gha ba gidigidi, avbe ọgbẹti ọ re ẹ i gie imuamwẹ fo vbotọ.

²² Ewẹwẹwẹ rhiẹnrhiẹn gbe! U miẹn vbene ọ yẹ ima ne a minọ re hẹ!

²³ Ẹmwẹ ọrhiẹnrhiẹn vbukpẹ ne ọ ma gia rẹn emwi ne ọ rre ọmwa ẹko, te ọ yevbe ose ne ọ rre egbe uwawa obuẹ ọpuẹkẹ.

²⁴ Ọmwẹkẹ ghi rhie ẹkokhọmwẹ ọnrẹn lẹre ye iyeke aranmwẹ ne ọ ya lalọ ọmwa egbe.

²⁵ Ẹmwẹ ni sẹtin gha rhiẹnrhiẹn, sokpan, ghẹ ya ẹe yi rhunmwuda te ẹko rriaramwẹ wa vuọn re ẹko do sẹ ẹkpurhu.

²⁶ Ọ sẹtin rhuan gue izohu ẹre sokpan agbọn hia miẹn emwi dan ne ọ ru.

²⁷ Emwa ni khuẹn ifi khẹ ẹrrẹe, ọ re ọ de ye nene ifi. Iran ni rrua ekẹn, ọ re ekẹn rẹnkhẹn uan.

²⁸ Ọmwa ne u i ho ẹmwẹ ọnrẹn ọ re u gha ho ne u mu ẹmwẹ ohoghe kuan, ọfuan ọ re ẹmwẹ erẹrẹ si rre.