Itan 25 - Edo Bible (E Baibol Ẹdo) Version 1996

Avbe Itan E Solomọn Ye Nọ

¹ Ye vbe ghe eso vbe uwu itan e Solomọn ne emwa gbẹnnẹ ye otọ vbe ẹguae Hẹzekaia ne Ọba e Juda.

² Emwi ne Osanobua viọ lẹre ọ re ọ ya ima yi ọghọ nẹẹn, emwi ne avbe ọba rhan otọ ẹre, ọ re ọ ya ima rhie ọghọ ne iran.

³ A i sẹtin rẹn emwi ne ọ rre ọba ẹko, iro ẹko ẹre yo sẹẹ ima zẹ vbene uyomwẹ iso ye, ra udinmwimwẹ okun.

⁴ Viọ ivbivbi emwi ni rre uwu esiliva hinrre, avbe owinna gha sẹtin ya ẹe ru emwi ne ọ mose.

⁵ Viọ avbe emwa ni bu ọmwa ude dan hin ehe ne ọba ye rre, uyinmwẹ ẹmwata ọ re a ra ya rẹn arriọba ẹre.

⁶ U gha mudia ye odaro ọba, ghẹ gha ru emwi wẹ ne ọ ba bẹghe ruẹ ra ne u gha rhie ma wẹ okpọmwa ọre u khin.

⁷ A tie ruẹ wẹ ne u do tota ye ehe ne ọ sikẹ odaro sẹẹ, ọre ọ maa sẹẹ ne a tama ruẹn wẹ ne u kpaegbe ne ọmwa ne ọ ru okpọmwa sẹ ruẹ tota.

⁸ Ghẹ gha rhulẹ yo iko ba ẹmwẹ emwi ne arọ ruẹ sẹe. Adeghẹ osẹe ọvbehe ghi do rhan otọ ẹre, a na ghi do miẹn wẹ ohoghe ọ re u ta vbo, vbua ghi ra ru hẹ?

⁹ Adeghẹ wẹ vbe ọmwa ẹdogbo ruẹ muan ẹmwẹ ye emwi ọkpa, wa tobọ uwa bu ẹre ne egbe uwa, wa ghẹ vbe ya gha we oro.

¹⁰ Ne a ghẹ miẹn wẹ te emwa hia ghi rẹn ruẹn ye a i ye okhuo yo uma ne ẹ i vẹ, egbe ruẹ i rrọ re hiehiere ighe ekhue ne ọ rrọ.

¹¹ Ẹmwẹ ne a ta la owa ẹre, te ọ yevbe iwinna ona igoru ne a ma yan esiliva.

¹² Ude ne ọmwa ne ọ kpẹ agbọn rhie ne ọmwa ne ọ mu egbe ne ọ ya danmwehọ, ọ re ọ maa sẹẹ avbe oroka igoru emwitegbe ne a ye igoru ne ọ maa sẹẹ ru.

¹³ Ọmwa ẹmwata ne a gie ẹre uhunmwu, te ọ fu ọmwa ne ọ gie ẹre uhunmwu egbe rre zẹ vbe ne amẹ ne ọ furre fu ọmwa egbe rre vbe ẹghẹ owowo ẹghẹ emwiorhọ.

¹⁴ Emwa ni gha ve emwi ne iran i hae, te iran yevbe ẹhoho ra amẹ ne ọ bi ne ẹ i rhọ.

¹⁵ Arhẹrhẹ, izin egbe, gha sẹtin dọ ohu I i kue ne ọ ghi wegbe sẹẹ yọ, uhin ighe te ọ vbe sẹtin fi enigie ekhọe werriẹ.

¹⁶ Ghẹ lalọ amẹ owọn gberra vbene ọ ke ne uẹn sẹ, ọ gha bun gbe, ọ sẹtin ya a gha bi.

¹⁷ Ghẹ kpẹkpẹ gbe vbe otuẹ ne u mu gie emwa ẹdogbo ruẹ, egbe ruẹ sẹtin wọ ẹre, ọ ghi do gha mu ohu ruẹ.

¹⁸ Ẹmwẹ ne a zẹ ba ọmwa, emwi ne ọ sẹtin gbe ọmwa ran nọ, zẹ vbene umozo ye ra orhokhua ra ifẹnmwẹ ne ọ mu.

¹⁹ Ọmwa ne ọ ya aro kọ ọmwa ne ẹ i gia muẹtinyan vbe ẹghẹ asobọyegbe, te ọ yevbe ọmwa ne ọ ye akọn ne ọ rueghe rri evbare, ra ne ọ ye owẹ ne ọ suke khian.

²⁰ A gha so ihuan ne ọmwa ne iro han rẹn, te ọ yevbe ne a ban ọmwa ukpọn rhie fua vbe ẹdẹ ne oni fi, ra ne a zẹ umwẹ wo ọmwa ẹtẹ.

²¹ Ohanmwẹ gha gbe oghian, rhie evbare nẹẹn re, ovbamẹ gha gbẹe, sa amẹ nẹẹn wọn.

²² U gha ye vbe rrio mu erhẹn ekhue tọẹn, e Nọyaẹnmwa gha vbe san ruẹn ẹse.

²³ Ewẹwẹwẹ, ẹ i mwẹ ọ ma ya ohu mu ọmwa, zẹ vbene ẹ i mwẹ amẹ ma lele ẹhoho odẹ okuọ rre.

²⁴ A wa ya di okpo ya ọ re ọ fu egbe sẹ ne a gu okhuo ne ọ vian gha rre owa.

²⁵ Iyẹn oghọghọ ne ọ ke ehe ne ọ rrei sẹ ehe ne ọmwa ye, te ọ ye vbe amẹ ne ọ furre ne ọmwa wọẹn vbe ẹghẹ ne ovbamẹ na kaka ọmwa ẹho.

²⁶ Ọmwa esi gha rhie otọ ne ọmwa dan, te ọ ye vbe ẹzẹ ne ọ tughu ra uhae ne a zẹ eruan yi.

²⁷ Owọn gha bun gbe, ẹ i ghi maa ne ọmwa, erriọ ọ re ọ vbe ye vbe ọmwa a vbe gha ho gbe ne a gha tian irẹn.

²⁸ Adeghẹ u i guara ziengbe vbe ohu a mu uẹn, te u wa mu egbe fua, zẹ vbe ẹvbo ne a ma gbe ekẹn gaa, ẹ i sọn emwa guẹ gbinna.